Për tre vjet asnjë raport për zbatimin e marrëveshjeve të Brukselit

Institucionet e Kosovës tash e tre vjet nuk kanë vënë në letër gjetjet për situatën lidhur me zbatimin e marrëveshjeve të arritura në Bruksel. Raportet për një gjë të tillë, Qeveria i ka hartuar pothuajse për çdo vit, nga 2014-a e deri më 2018. Derisa nga ekzekutivi nuk kanë përgjigje nëse do ta vazhdojnë mbikëqyrjen e tyre, shoqëria civile konsideron se ndërprerja e raporteve për gjendjen e marrëveshjeve të Brukselit është në dëm të Kosovës.

Tre vjet bëhen në qershor qëkur Qeveria e Kosovës ka mbikëqyrur për herë të fundit zbatimin e marrëveshjeve të arritura në Bruksel.

Raporti i fundit rreth arritjeve dhe sfidave në zbatimin e marrëveshjeve në kuadër të dialogut me Serbinë mban datën 18 qershor 2018 dhe ka gjithsej 38 faqe.

Ndërprerja e praktikës së krijuar që nga viti 2014 është duke u konsideruar e dëmshme dhe pengesë për mbarëvajtjen e bisedimeve nga shoqëria civile.

Violeta Haxholli, hulumtuese në Institutin Demokratik të Kosovës, thotë se raportet e tilla duhet të bëhen sa më parë, për shkak të rëndësisë që kanë për përgatitjen e ekipit kosovar.

“Pa pasur në dispozicion të gjitha informacionit se çfarë po ndodh me marrëveshjet e kaluara atëherë je në pamundësi që të ngrit edhe çështjet të cilat i preokupojnë qytetarët lidhur me këto marrëveshje apo edhe çështjet të cilat prekin interesat nacional të Kosovës”, ka thënë Haxholli.

Mungesa e informacioneve për zbatimin e marrëveshjeve të nënshkruara sipas Grupit për Studime Politike dhe Juridike, ndikon në mbikëqyrjen e procesit të dialogut.

“Kur kemi këso shkëputjesh në dokumente dhe nuk e dimë saktë për secilën marrëveshje ku ka mbërri ku ka ngecur besoj që është e dëmshme për shkak se çalojmë pastaj në bisedime dhe nuk jemi aq konciz e preciz kundrejt palës serbe kur ti vet si palë nuk e ke dijeninë, nuk e ke saktësinë objektive për secilën marrëveshje se ku po çalon e cili është problemi”, është shprehur Arbër Fetahu, hulumtues në GLSP.

Shumica prej raporteve të hartuara për gjendjen në zbatimin e marrëveshjeve të Brukselit mbajnë nënshkrimin e ish-zv. kryeministres e ish-ministres së dialogut, Edita Tahirit. Lidhur me ndikimin e këtyre raporteve, televizioni ka provuar të kontaktojë me Tahirin, por e njëjta nuk është përgjigjur.

Pyetjeve të televizionit lidhur me marrëveshjet e Brukselit dhe zbatimin e tyre në praktikë, tash e dy javë nuk u janë përgjigjur as Qeveria e Kosovës.