Pensionistët paralajmërojnë protesta nëse nuk ndryshohet Ligji mbi skemat sociale

Pensionistja Naile Neziri, ka paralajmëruar se nëse nuk rregullohet Ligji mbi skemën pensionale, atëherë pensionistët do të dalin në protesta para Qeverisë. Ajo kërkon që të hiqet pjesa e 15 vjet stazh para luftës për t'u kualifikuar për pensionin kontributdhënës. 

Neziri, që para se të dilte në pension kishte punuar kohë të gjatë si zyrtare ligjore në Gjykatën Themelore të Gjilanit, ka thënë se Ligji mbi skemat pensionale është diskriminues. 

“Ministri Andin Hoti nëse nuk na pranon të bisedojmë e ta rregullojmë Ligjin mbi skemën pensionale, atëherë ne do të dalim edhe në protesta. Do të bëjmë thirrje për protesta para Qeverisë së Kosovës. E ndoshta do t’i vret ndërgjegjja e do ta rregullojnë këtë Ligj njëherë e përgjithmonë. Ligji ka qenë diskriminues qysh nga fillimi. Qysh i kërkohet njerëzve t’i kenë 15 vjet përvojë pune para luftës në mënyrë që të merret pensioni kontributdhënës. Ka njerëz që i kanë 30 vjet përvojë pune, vetëm pse nuk i kanë 15 vjet para lufte, e marrin pensionin bazik. A nuk është mëkat kjo?” – ka thënë Neziri në emisionin “tre8tre” në KTV. 

Ajo ka thënë se deputetët duhet t’i vret ndërgjegjja. 

“Pensionistët janë në gjendje të tmerrshme. Një deputet 150 euro, sa është pensioni bazik, i shpenzon vetëm për një drekë. Si të jetojë pensionisti me 150 euro”, tha Neziri.