Mbështete KOHËN. Ruaje të vërtetën
Arbëri

Pas fitores së Vuçiqit vlerësohet e dobët pozita e Kosovës në dialog

Fitorja bindëse e partisë së presidentit të Serbisë, Aleksandër Vuçiq, në zgjedhjet e së dielës në Serbi, shihet si fuqizim i rolit të shtetit serb në dialogun Kosovë-Serbi.

Azem Vllasi, avokat dhe njohës i zhvillimeve politike, thotë se Vuçiqi do të vazhdojë të ndjekë politikën e kohës së Sllobodan Millosheviqit.

Sipas tij, takimi i 27 qershorit në Uashington nuk do të prodhojë një marrëveshje finale e as diskutime për njohjen e ndërsjellë.

Ndërkaq, Naim Rashiti nga Grupi Ballkanik për Politika, thotë se fitorja e Vuçiqit është e rrezikshme për stabilitetin në rajon, raporton KOHA.

Por, thekson edhe si mundësi që Bashkësia Ndërkombëtare të shfrytëzojë pushtetin e tij për arritjen e marrëveshjes mes shteteve dhe njohjen e Kosovës.

Derisa Vllasi thotë se pozicioni i Kosovës në dialog është i dobët dhe se vendi është nën mëshirën e BE-së dhe Amerikës, drejtori i Grupit Ballkanit për Politika, Naim Rashiti kërkon unifikim të skenës politike të Kosovës për dialogun.

Edhe Kolumne Dialogu në pritje edhe pas humbjes së Vuçiqit në zgjedhje në Serbi

“Jemi në mëshirën e amerikanëve dhe evropianëve. Sa i përket pozicionit negociues ne jemi më të dobët se në fillim, sepse skena politike është e ngatërruar. Ka fërkime të brendshme. Çkado që ndodh në Uashington, nuk do të pranohet nga opozita. Pozicioni i Kosovës është ashtu siç e kemi elitën politike”, ka thënë Rashiti.

Për çështjen e dialogut, në Beograd ka nisur vizitën emisari i BE-së për këtë proces, Miroslav Lajçak. Pas përfundimit të kësaj vizite, Lajçak pritet të bëjë publike datat e takimit në Bruksel mes dy shteteve.

Ndërkohë, presidenti i Serbisë, Aleksandar Vuçiq, para takimit të 27 qershorit në Uashington, do të udhëtojë për në Moskë.