Partitë e vogla shkrihen në të mëdhatë

Për zgjedhjet e parakohshme të 28 dhjetorit, vetëm dy koalicione të partive të vogla nga radhët e komuniteteve janë deklaruar në KQZ. Për këtë, subjektet kanë kohë vetëm deri të dielën, porse pjesa më e madhe e tyre preferojnë që në vend të koalicioneve, të shkrijnë brenda vetes partnerë të vegjël. E kjo, sipas analistit, Artan Alija, është strategji e partive për t’i rritur gjasat për rezultate me të mira zgjedhore

Partive politike u ka mbetur vetëm edhe një ditë afat për t’i deklaruar para Komisionit Qendror te Zgjedhjeve (KQZ) koalicionet parazgjedhore, porse deri të shtunën janë formalizuar vetëm dy të tilla dhe ato janë lidhur mes partive të vogla.

Sipas KQZ-së, për zgjedhjet e parakohshme të 28 dhjetorit janë bërë bashkë disa nga parti të komuniteteve, por jo edhe subjektet e mëdha shqiptare.

“Zyra për Regjistrim, Certifikim dhe Kontrollin Financiar të Subjekteve Politike është njoftuar për formimin e dy koalicioneve për pjesëmarrje në zgjedhje, si në vijim: ‘PAI-PDAK-LPB’, i përbërë nga 3 parti politike: Partia e Ashkalinjve për Integrim (PAI), Partia Demokratike e Ashkalinjve të Kosovës (PDAK) dhe Lëvizja për Bashkëveprim (LPB); dhe Koalicioni VAKAT, i përbërë nga 3 parti politike: Demokratska Stranka Bošnjaka (DSB), Bošnjačka Stranka Kosova (BSK) dhe Demokratska Stranka Vatan (DSV)”, ka bërë të ditur KQZ-ja.

Deri më tash, partitë kryesore kanë preferuar që në vend të koalicioneve, t’i shkrijnë në lista të tyre partnerë më të vegjël.

Për një listë me emra të përbashkët të shtunën u dakordua Lidhja Demokratike me Partinë e Drejtësisë.

Sipas njoftimit nga PD-së, kryetari i saj Ferid Agani dhe ai i LDK-së, Lumir Abdixhiku, janë dakorduar që në listë të përfshihen disa kandidatë të subjektit të Aganit porse nuk janë përmendur numra.

E gatishmërinë e LDK-së për t’u bërë vend njerëzve që nuk janë pjesë e saj dhe për t’i lënë jashtë anëtarët e vjetër e ka kritikuar, ish-deputeti i kësaj partie, Agim Veliu.

Ai shprehu vullnetin që të përfshihet në listën e kandidatëve të LDK-së për deputet, duke e vlerësuar të padrejtë dhe të dëmshëm vendimin për moskandidimin e tij në zgjedhjet e kaluara.

Krahas LDK-së, edhe PDK-ja është e hapur për pranimin e emrave të tjerë në listë, e të cilën zyrtarë të saj thanë se do t’ia dorëzojnë KQZ-së vetëm me siglën e subjektit.

Në këtë parti nuk treguan nëse po zhvillojnë bisedime me Nismën Socialdemokrate, pas dështimit të saj që të bëjë marrëveshje me LDK-në. Për këtë çështje nuk u përgjigjën as në Nisma.

E në Vetëvendosje e konfirmuan vazhdimin e bashkëpunimit me partitë Guxo e Alternativa, por nuk treguan nëse do të ketë zgjerim të koalicionit.

Analisti politik, Artan Alijaj, thotë se është strategji e partive që pa koalicion të madh t’i rrisin gjasat për rezultate me të mira zgjedhore, duke i hapur listat për subjekte më të vogla a individë të sferës publike.

“Duket qartë që tri partitë kryesore opozitare e kanë një qëllim të përbashkët, e ai është që pas zgjedhjeve të 28 dhjetorit të krijojnë një qeveri të tyre pa LVV-në. Ideja e tyre është që do të kenë mundësi që të zgjedhin qeverinë e vendit, por në të njëjtën kohë do të sigurojnë edhe votat e mjaftueshme për zgjedhjen e presidentit kur t’i vijë koha në pranverë”, ka thënë Alijaj.

Partitë që i zyrtarizojnë koalicionet në KQZ, nuk do të mund të tërhiqen prej tyre deri në certifikimin e rezultatit zgjedhor.