VV-ja e AAK-ja ende s’kanë aplikuar për pjesëmarrje në zgjedhje

Lëvizja Vetëvendosje e as Aleanca për Ardhmërinë e Kosovës deri në orën 18:00 nuk kanë aplikuar në KQZ për t’u certifikuar për zgjedhjet e 28 dhjetorit. Deri tash janë regjistruar dy koalicione. PDK-ja dhe LDK-ja do të marrin në zgjedhje të vetme, pa koalicione zyrtare.

Dy koalicione e 14 subjekte u regjistruan në Komisionin Qendror Zgjedhor deri në orën 18:00 të së dielës, për të marrë pjesë në zgjedhjet e parakohshme të 28 dhjetorit, ka njoftuar zëdhënësi i KQZ-së, Valmir Elezi.

Deri në fund të ditës, përfundojnë afatet për aplikim për certifikim të pjesëmarrjes në zgjedhje, për deklarimin e koalicioneve si dhe për njoftim të mospjesëmarrjes në zgjedhje.

Në KQZ, deri në orën 18:00 janë deklaruar dy koalicione nga parti që përfaqësojnë minoritetet etnike.

“Koalicionet e deklaruara janë “PAI – PDAK – LPB”, i përbërë nga 3 parti politike: Partia e Ashkalinjve për Integrim, Partia Demokratike e Ashkanlive të Kosovës dhe Lëvizja për Bashkëveprim; si dhe koalicioni “VAKAT” mes Demokratska Stranka Bošnjaka, Bošnjačka Stranka Kosova dhe Demokratska Stranka Vatan”, ka njoftuar KQZ-ja.

Deri në këtë orar, vetëm dy parti të mëdha kanë aplikuar për pjesëmarrje në zgjedhje – Partia Demokratike dhe Lidhja Demokratike.

Mungojnë Lëvizja Vetëvendosje dhe Aleanca për Ardhmërinë e Kosovës.

Me këtë njoftim të KQZ-së nënkuptohet se PDK-ja dhe LDK-ja nuk do të kenë koalicion zyrtarë të regjistruar.

I paqartë mbetet pozicionimi i Nismës Socialdemokrate të Fatmir Limajt.

Në zgjedhjet e 9 shkurtit, kjo parti ishte në koalicion me AAK-në dhe mori tre deputetë.

Limaj ka mbajtur takim me kryetarin e LDK-së Lumir Abdixhiku dhe është bërë e ditur se partitë janë të hapura për koalicion, mirëpo kushti është që Nisma të shkrihet në listën e LDK-së.

Gjatë ditës, pyetjeve të KOHËS lidhur me pozicionimin e partisë nuk i është përgjigjur Limaj.

E, Vetëvendosje në zgjedhjet e kaluara pati koalicion jo-zyrtar me Partinë Guxo dhe Alternativën e Mimoza Kusarit. Pra kandidatët e këtyre subjekteve u shkrinë në listën e LVV-së.

Mirëpo të mërkurën, në faqen zyrtare të Alternativës në Facebook është shpërndarë një video e një interviste të Kusarit ku ajo shpreh pritshmërinë që kësaj radhe koalicioni të jetë formal dhe i regjistruar në KQZ.

Në një intervistë për Kosovapressin, Daut Haradinaj, deputet i AAK-së ka thënë se janë të hapur për koalicionin, por vetëm nën shkronjat e partisë.

“Jemi shumë të interesuar të shkojmë kështu siç jemi, edhe në rast se do të ketë pjesëmarrje në listën e Aleancës, akronimet nuk do të ndërrojnë, vetëm në rast se kemi ndonjë koalicion më të madh. Do të thotë, për subjektet e tjera, për shoqërinë civile, për iniciativat qytetare janë të mirëseardhura nën logon e AAK-së”, ka thënë ai.

Sipas rregullave, koalicionet janë të pashkëputshme deri në përfundimin dhe certifikimin e zgjedhjeve.

Gjithashtu partitë që lidhin koalicion, nuk mund të përfshihen në lista të tjera, e as të garojnë në një listë të veçantë.

Afati për dorëzimin e listave në KQZ është hapur të hënën dhe do të jetë i hapur deri më 7 dhjetor.