Pak gjasa që vendimmarrja për vizat të trajtohet në margjinat e Samitit të BE-së

Deklaratat optimiste për vënien në lëvizje të vendimmarrjes së Bashkimit Evropian sa i përket liberalizimit të vizave për Kosovën nuk pritet të shoqërohen edhe me veprime konkrete drejt finalizimit të kësaj çështjeje.

Tema e vizave zyrtarisht nuk është në agjendën e Samitit të Bashkimit Evropian, por nuk përjashtohet ofrimi i mbështetjes politike për këtë proces.

Në Samitin që zhvillohet të enjten dhe të premten në Bruksel, në rend dite është shqyrtimi i aplikacionit të Ukrainës, Gjeorgjisë dhe Moldavisë për anëtarësim në BE.

Kjo konfirmohet edhe në letrën që presidenti i Këshillit të Ministrave të BE-së, Charles Michel, ua ka dërguar vendeve anëtare në prag të samitit.

“Ballkani Perëndimor është i rëndësishëm për BE-në dhe BE-ja është e rëndësishme për Ballkanin Perëndimor. Prandaj, ne duhet ta ringjallim procesin e zgjerimit dhe të çojmë përpara integrimin e partnerëve tanë të Ballkanit Perëndimor. Ne do t’i takojmë ata përpara takimit zyrtar të Këshillit Evropian”, deklaroi Charles Michel.

Edhe Arbëri 23 qer 2022 Sot nis Samiti i BE-së, pak gjasa që të vendoset për vizat

Disa ditë para Samitit, Michel vizitoi edhe Kosovën. Në takim me të, kryeministri Kurti shfaqi shpresën për përkrahje në liberalizimin e vizave.

Diplomatë tjerë evropianë kanë bërë thirrje që Kosovës t’i hiqen vizat pa vonesa. I dërguari special i Qeverisë së Gjermanisë për Ballkanin Perëndimor, Manuel Sarrazin, ka thënë se Kosovës duhet t’i njihen meritat për reformat e përmbushura.

“Në Kosovë, Qeveria është duke bërë reforma dhe ne duam t'i shpërblejmë. Liberalizimi i vizave për qytetarët e Kosovës është një nga ato hapa të domosdoshëm që duhet të vijojnë. Por edhe dialogu i normalizimit me Serbinë duhet të rifillojë dhe të dyja palët duhet të jenë të gatshme për progres”, u shpreh Sarrazin.

E, presidentja Vjosa Osmani, e cila përfaqëson Kosovën në Samit, ka thënë se udhëton me shpresë, por jo edhe me pritje të mëdha. Në prag të Samitit, Osmani ka takuar presidenten e Parlamentit Evropian, institucion ky që disa herë ka përsëritur kërkesën për liberalizimin e vizave.

Edhe Arbëri 13 dhj 2023 Sot në Bruksel samiti BE-Ballkani Perëndimor

“Në takimin e liderëve të BE-së dhe Ballkanit Perëndimor në Bruksel, presidentja Osmani do ta përçojë mesazhin e qartë të popullit të Kosovës mbi nevojën e përshpejtimit të procesit të integrimit, duke filluar nga liberalizimi i stërvonuar i vizave, deri te mbështetja për statusin e vendit kandidat për Republikën e Kosovës, pas aplikimit”, thuhet në njoftimin e Presidencës.

Përveç Parlamentit, edhe Komisioni Evropian në vitin 2018 kishte konstatuar përmbushjen e të gjitha kritereve për liberalizimin e vizave, por që deri tash ka munguar vendimmarrja në Këshillin e Bashkimit Evropian.