OVL-UÇK kërkon shkarkimin e Bashës, përndryshe paralajmëron masa

Kategoritë e dala nga lufta kanë kërkuar shkarkimin e menjëhershëm të kryetarit të Kuvendit, Dimal Bashës dhe nisjen e hetimeve ndaj tij.

Ata kanë paralajmëruar masa nëse kërkesa e tyre nuk përfillet.

“Dimal Basha me kategoritë e dala nga lufta do të del humbës.  Z. Basha nuk mund t’i ikë përgjegjësisë me një konferencë për media. Ai është bashkëpjesëmarrës i atij punimi. Z. Basha nuk i ka dyert e hapura te ne. Me këto shpifje që janë duke iu bë UÇK-së”, ka thënë kryetari i OVL-UÇK-së, Hysni Gucati.

Në rrjete sociale të mërkurën është nxitur diskutim mbi Bashën pas publikimit të një artikulli ku thuhet se Basha kishte shkruar kundër UÇK-së.

Kryeparlamentari Dimal Basha i ka quajtur “të ulëta” dhe të rreme akuzat se ka shkruar kundër UÇK-së në një artikull që ai ka bashkëshkruar me dikë tjetër 12 vjet më parë. Ai ka thënë se nuk mban përgjegjësi për asgjë që është shkruar kundër UÇK-së në atë artikull, dhe se e mbështet luftën e Ushtrisë Çlirimtare.