Osmani udhëton në Slloveni, merr pjesë në Asamblenë Parlamentare të NATO-s

Presidentja Vjosa Osmani, ka udhëtuar të dielën për në Slloveni, ku do të marrë pjesë në Asamblenë Parlamentare të NATO-s, që po mbahet në Lubjanë.

Në njoftimin e Presidencës thuhet se Osmani është e ftuar speciale në këtë sesion nga presidenti i Asamblesë Parlamentare të NATO-s, Marcos Perestrello.

“Gjatë vizitës njëditore në Slloveni, presidentja Osmani do të zhvillojë një takim bilateral me presidenten e Republikës së Sllovenisë, Natasha Pirc Musar. Po ashtu, gjatë qëndrimit në Lubjanë, presidentja Osmani do të marrë pjesë në pritjen zyrtare të organizuar për nder të sesionit të Asamblesë Parlamentare nga kryetarja e Asamblesë Kombëtare të Sllovenisë, Urška Klakočar Zupančič”, thuhet në njoftimin e Presidencës.

Osmani thuhet se do të zhvillojë edhe takime të tjera gjatë këtij sesioni të Asamblesë Parlamentare të NATO-s.