Presidentja Vjosa Osmani ka përsëritur kërkesën që partnerët ndërkombëtarë ta rrisin presionin mbi Serbinë për zbardhjen e fatit të të zhdukurve nga lufta e Kosovës.
Në një shkrim në Facebook, në Ditën Ndërkombëtare të Personave të Zhdukur me Dhunë, Osmani ka thënë se regjimi i Aleksandar Vuçiqit në Serbi vazhdon të flejë mbi varreza masive.
“Varret e hapura janë dëshmi e gjallë e krimeve të luftës dhe krimit te përsëritur nga regjimi gjenocidal serb, si dhe kujtesë e përditshme se drejtësia nuk është vënë ende në vend. Për sa kohë sa mijëra qytetarë tanë mbesin të zhdukur, paqja mbetet e paplotë. Regjimi i Vuçiqit vazhdon të fle mbi varreza masive, duke mbajtur peng zbardhjen e fatit të të zhdukurve. Është koha që partnerët ndërkombëtarë ta rrisin presionin mbi Serbinë, sepse vetëm zbardhja e fatit të të zhdukurve si dhe drejtësia mund t’u japin familjeve qetësinë që meritojnë”, ka shkruar Osmani në Facebook.
Gjatë luftës së viteve 1998-1999, në Kosovë janë vrarë rreth 13 mijë persona, janë zhvendosur mbi 800 mijë, ndërsa janë zhdukur me forcë rreth 6 mijë, 1 mijë e 584 prej të cilëve janë ende të pagjetur.
Më 2 maj të 2023-s, kryeministri Albin Kurti dhe presidenti i Serbisë, Aleksandër Vuçiq, e nënshkruan, në kuadër të dialogut të Brukselit, Deklaratën për të Pagjeturit dhe e bënë zotimin ta lejojnë qasjen në të gjitha dokumentet në posedim të tyre. Por arkivat e Ushtrisë dhe të Policisë së Serbisë deri më tani kanë mbetur të paqasshme për autoritetet në Kosovë.