Takimi inaugurues i Këshillit për Demokraci dhe të Drejta të Njeriut, në krye me presidenten e Kosovës, Vjosa Osmani, ka nisur para pak çastesh.
Osmani ka thënë se themelimi i këtij këshilli reflekton në zotimet e marra në Samitin për Demokraci në SHBA.
“Më vjen jashtëzakonisht mirë që ky këshill reflekton në strukturën e vet, të tri shtyllave të zotimeve që i kemi bërë edhe dje, respektivisht shtylla e parë lufta kundër korrupsionit, shtylla e dytë luftimi i autoritarizmit dhe shtylla e tretë avancimi i të drejtave të njeriut, diversitetit, kushtetutës dhe luftës në avancimin e të drejtave të grave dhe barazisë gjinore”, ka thënë ajo.
Ndërkaq, kryeministri Albin Kurti ka thënë se në fushën e mbrojtjes kundër autoritarizmit, Kosova i është bashkuar sanksioneve të Bashkimit Evropian ndaj Federatës Ruse pas invazionit në Ukrainë.
Ai ka thënë se vendet autoritare hyjnë në luftë dhe vendet demokratike nuk luftojnë me njëra-tjetrën.
“Po të ishte Rusia vend demokratik kurrë nuk do të kishte tentuar ta pushtojë Ukrainën dhe po të ishte Serbia vend demokratik as ajo nuk do të ishte kërcënim ndaj paqes së qëndrueshme në rajonin tonë”, ka thënë ai.
Gërvalla ka thënë se anëtarësimi në Këshillin e Evropës është hapi më i madh në avancimin e të drejtave të njeriut dhe demokracisë.
Avokati i Popullit, Naim Qelaj ka thënë se do të japin kontribut të vazhdueshëm në këtë këshill, përmes opinioneve.
{gallery}