Një muaj paraburgim ia ka caktuar Gjykata Themelore në Prishtinë ish-ministrit të Zhvillimit Ekonomik, Fadil Ismajli dhe gjashtë të tjerëve të arrestuar të enjten nën dyshimin për korrupsion.
Pos Ismajlit, në këtë grup janë arrestuar një gjyqtar i Themelores që ushtroi detyrën në Graçanicë, Jovica Mitroviq dhe zyrtarë të tjerë N.K., M.D., B.D., Sh.T. dhe G.L..
Seanca e mbajtur të shtunën ka zgjatur disa orë. Gjykata në mbrëmje ka njoftuar për masën e paraburgimit.
“Gjykata Themelore në Prishtinë, Departamenti Special ka vendosur lidhur me kërkesën e Prokurorisë Speciale të Republikës së Kosovës, për caktimin e masës së paraburgimit në çështjen penale ndaj të pandehurit N.K. për shkak të dyshimit të bazuar se ka kryer veprën penale Marrja e ryshfetit, e pandehura M.B.-D për shkak të dyshimit të bazuar se ka kryer veprën penale Dhënia e ryshfetit si dhe veprën penale Ushtrimi i ndikimit, i pandehuri Sh.T. për shkak të dyshimit të bazuar se ka kryer veprat penale Dhënia e ryshfetit si dhe veprën penale Ushtrimi i ndikimit, i pandehuri G.L. për shkak të dyshimit të bazuar se ka kryer veprat penale Dhënia e ryshfetit si dhe veprën penale Ushtrimi i ndikimit, i pandehuri F.I.për shkak të dyshimit se ka kryer veprën penale Dhënia e ryshfetit, i pandehuri J.M. për shkak të dyshimit të bazuar se ka kryer veprën penale Marrja e ryshfetit si dhe i pandehuri B.D. për shkak të dyshimit të bazuar se ka kryer veprat penale Dhënia e ryshfetit si dhe veprën penale Ushtrimi i ndikimit”, thuhet në njoftim. “Gjykata vlerësoj se caktimi i masës së paraburgimit në këtë çështje penale është masë adekuate dhe konstatoi se masa e paraburgimit tani për tani është e vetmja masë për rrjedhjen e pa penguar të procedurës penale në këtë çështje juridiko – penale”.
Në dosjen e Prokurorisë thuhet se në periudhën 2023-2025 ata ndërmorën veprime për përfitim të kundërligjshëm personal përmes kompensimeve për prona të shpronësuara duke shkelur ligjet për shpronësim dhe duke realizuar propozim ankesa jashtë afateve ligjore.
Avokatët e Ismajlit kanë mohuar akuzat duke thënë se ai është kompensuar për një pronë që është bërë e papërdorshme pas shpronësimit të një prone të familjes.
“Kërkesa për kompensimin e pjesës së mbetur ka bazë të qartë ligjore dhe raste të tilla janë të shumta në gjykatat e Kosovës. Z. Ismajli është përfitues në të njëjtën mënyrë si qytetarët e tjerë që kanë kaluar nëpër procedura identike, gjë që është lehtësisht e verifikueshme dhe e mbështetur me prova konkrete”, ka thënë ekipi i tij i mbrojtjes, i përbërë nga avokatët Rafet Ferizi dhe Mehmet Berisha.
Të dyshuarit qenë arrestuar të enjten në një aksion të Policisë, me urdhër të Prokurorisë Speciale.