Seancat e Kuvendit të Kosovës për çështje të rëndësishme, kryesisht mbahen në orët e mbrëmjes, raporton KTV.
Njëjtë ka ndodhur edhe të martën kur vetëm pas orës 20 ka nisur seanca e jashtëzakonshme e Kuvendit të Kosovës e thirrur nga opozita për liberalizim vizash. Shumë qytetarë thonë se nuk i kanë përcjellë deri në fund zhvillimet meqë ajo ka zgjatur shumë.
Të martën ishte vendosur që në orën 17, Kuvendi të mbajë seancë të rregullt me shumë pika të papërfunduara nga seancat e kaluara.
Meqë sërish dështoi një iniciative e tillë, deputetët kërkuan mbajtjen e një seance të jashtëzakonshme për të diskutuar për dështimin e Kosovës në procesin e liberalizimit të vizave.
Por, shumë pak qytetarë i përcollën deri në fund zhvillimet në Kuvend që zgjatën deri në 1 pas mesnate.
Janë të shumtë qytetarët që thonë se nuk e dinë se çfarë u diskutua
Të moshuarit thonë se nuk e kanë përcjellë deri në fund seancën.
Sipas tyre, punimet e Kuvendit duhet mbajtur gjatë ditës kur të gjithë kanë mundësi t’i përcjellin ato.
Edhe për ata që monitorojnë punën e Kuvendit, seancat e vonshme janë të pakuptimta.
Qytetarët thonë se deputetët nuk po punojnë sa duhet dhe se për tema të rëndësishme siç është liberalizimi, do të duhej të diskutohet me kohë, e jo vetëm kur të dështojnë proceset.
