Me ndihmën italiane hapet në Pejë laboratori bujqësor me standarde të larta

Me mijëra euro janë harxhuar nga bujqit për të kryer analizat e viruseve nëpër bimët e mbjella dhe të vetë tokës.

Dhe, e gjithë kjo peripeci ka vazhduar me vite të tëra, pasi Instituti Bujqësor i Kosovës nuk ka arritur të pajiset me një laborator që do t’i kryente këto analiza të rëndësishme për bujqit dhe konsumatorët.

Meqë Ministria e Bujqësisë nuk i bleu asnjëherë pajisjet për laboratorin në fjalë, atë e siguroi qeveria italiane, e cila investoi 260 mijë euro duke sjellë laboratorët e teknologjisë së fundit.

“Laboratori është bazë për siguri ushqimore, ky laborator bën kontrollin e shumë produkteve ushqimore dhe.. ne po punojmë çdo ditë që të kemi kontrollin e gjithë produkteve në treg, treg jo shumë i rregulluar”, ka thënë

Kapllan Halimi nga Ministria e Bujqësisë.

“Me investimet e bëra, tashmë Kosova dhe Ministria kanë një bazë për të zgjidhur dhe për të dhënë përgjigje në fushën e mbrojtjes së bimëve dhe të bëhen hulumtime në bazë të standardeve evropiane. Ne jemi gjithmonë në dispozicion që ta ndihmojmë Kosovën në fushën agro-ushqimore dhe të gatshëm të hartojmë nisma të reja në këtë drejtim”, ka thënë Maurizio Raeli, nga Instituti Agronomik Mesdhetar.

Ndërsa, drejtori i Institutit, Fehmi Geci, tha se kjo do të ndikojë edhe në ruajtjen e ambientit kultivues.

“Instituti ka kompetencat e veta për siguri ushqimore dhe ruajtje të ambientit kultivues. Këto investime kanë reflektim te konsumatori dhe zhvillimi i sektorit të bujqësisë dhe mbrojtje të ambientit. Kosova deri tani nuk ka pasur kapacitet të mjaftueshëm për diagnostikim të viruseve që ndikojnë në sëmundjen e kulturave bujqësore”, ka thënë Begu.

Sekretari i Ministrisë deklaroi se janë duke punuar që në të ardhmen ky laborator të futet në laboratorët referues kombëtarë.