Lumi Llap vërshohet nga mbeturinat, qytetarët ankohen e komuna thotë se pastrohet vazhdimisht

Grumbuj mbeturinash e kanë vërshuar shtratin e lumit Llap në qendër të Podujevës.

Qytetarët thonë se do të duhej të mirëmbahej më mirë shtrati i lumit Llap, pasi kjo pjesë e qytetit shfrytëzohet edhe si vend për shëtitje, raporton KOHA.

Për këtë gjendje të lumit, disa i kanë fajësuar banorët e fshatrave afër burimit për hedhje të mbeturinave në lumë, e disa përgjegjës e kanë bërë Komunën, që sipas tyre, do të duhej ta mirëmbante më shpesh.

Në anën tjetër, zyrtarët komunalë të Podujevës thonë se shtrati i Lumit Llap pastrohet vazhdimisht në pjesën e qytetit, nga dy kompani që grumbullojnë mbeturinat.

Sipas zëdhënësit të Komunës, Nazmi Elezi, punëtorët e kompanisë “Pastrimi” për shkak të vëllimit të madh të ujit, nuk kanë mundur të intervenojnë këto ditë.

Edhe Arbëri 18 kor 2019 Lumi Llap vërshohet nga mbeturinat

Ndërkohë, zëdhënësja e kompanisë “Pastrimi”, Arbnore Ademi, nëpërmjet një përgjigje me shkrim, ka thënë se mbeturinat do të largohen me rënien e nivelit të ujit, dhe sipas saj, kompania, po i kushton rëndësi të veçantë lumit Llap.

Zyrtarët komunalë të Podujevës thonë se edhe sivjet do të vazhdojë ndërtimi i shtratit të lumit Llap dhe se ky projekt do të përfshijë pjesën e qytetit, por nuk kanë treguar nëse do ta mirëmbajnë më mirë apo do ta lënë sikur tash me plot bërllok.