-
Nga:
Donisa Fazliu
- 10 shkurt 2026 09:10
- Shpërndaje në:
Është liruar nga akuza arsimtari, Muhamet Hajredinaj, i cili akuzohej për veprën penale “Nxitje e përçarjes dhe mosdurimit”, pasi që kishte hedhur në shportë të mbeturinave plisin dhe flamurin kombëtar.
Kryetari i trupit gjykues, Leon Perlaska, të martën në shpallje të aktgjykimit e ka dhënë arsyetimin për lirimin nga akuza të të akuzuarit Hajredinaj.
“Gjykata vlerësoi se i pandehuri nuk ka pasur për qëllim nxitjen e urrejtjes apo mosdurimit kombëtar apo fetar, por se reagimet e të pandehurit kanë rrjedhur si reaksion i situatës së tensionuar të krijuar në klasë në mes të mësimdhënësit dhe nxënësve, andaj si të tilla këto veprime nuk i përmbushin elementet e veprës penale për të cilën i pandehuri u lirua nga akuza”, është shprehur Perlaska.
Hajredinaj akuzohej se në cilësinë e mësimdhënësit të gjuhës angleze në shkollën fillore “Xhemajl Mustafa”, në Prishtinë, duke ditur që më 27 nëntor të 2024-tës kremtohej në shkollë Dita e flamurit kombëtar, në prani të nxënësve ka marrë flamurin kuqezi dhe plisin dhe i ka hedhur në shportën e mbeturinave.
Pas rastit, i akuzuari Hajredinaj ishte pezulluar nga puna në shkollën "Xhemail Mustafa".