Lirohet ish-pjesëtari i UÇK-së, Avni Qenaj, i cili u arrestua nga Serbia në nëntor

Ish-pjesëtari i Ushtrisë Çlirimtare të Kosovës, Avni Qenaj, është liruar të hënën, pasi ishte arrestuar nga autoritetet në Serbi në fund të nëntorit të vitit të kaluar. 

Lajmin për lirimin e Qenajt e ka konfirmuar për KOHËN avokati i tij Xhevdet Smakiqi. 

“Është duke ardhur në Kosovë nën përkujdesjen e familjarëve pa asnjë mbështetje nga Qeveria”, ka thënë Smakiqi. 

Qenaj ishte arrestuar në Serbi më 25 nëntor të vitit të kaluar. Atij i ishte gjetur një kartelë e veteranit të UÇK-së.

Sipas Ministrisë serbe për Punë të Brendshme, Qenaj në prill të vitit 1998 i është bashkuar shtabit lokal të UÇK-së për fshatin Romajë në Komunën e Prizrenit dhe se si pjesëtar i brigadës 138 “Agim Ramadani” ka marrë pjesë në Koshare në vitin 1999.