LB-ja s’pajtohet me vlerësimin e MAPL-së, deponon sërish ankesë

Lëvizja për Bashkim në Obiliq ka deponuar sërish ankesë në Ministrinë e Administrimit të Pushtetit Lokal (MAPL) lidhur me listën e pronave komunale për dhënie në shfrytëzim dhe përbërjen e Komitetit për Politikë dhe Financa.

Ky subjekt politik nuk është pajtuar me vlerësimin e ligjshmërisë që kjo Ministri u ka bërë dy prej tri vendimeve të Kuvendit Komunal të Obiliqit.

MAPL-ja i kishte hedhur poshtë tri ankesat e Grupit të këshilltarëve të LB-AAK, por ky subjekt tash nuk e ka ripërsëritur ankesën vetëm për renditjen e emrave për kryesues të KK-së.

Në shkresën që është dorëzuar në MAPL gjatë ditës së premte, LB-ja ka kërkuar rishqyrtim të ligjshmërisë për listën e pronave dhe përbërjen e KPF-së.

“Ne vazhdojmë të mendojmë se ka shkelje ligjore të Ligjit nr. 06/L-092 për dhënien në shfrytëzim dhe këmbim të pronës së paluajtshme të komunës, gjegjësisht ka shkelje të nenit 5-pika 1.2 dhe neni 13-pika 2 të Ligjit, si dhe nenit 4-pika 1.4 dhe nenit 6-pika 2 e Rregullores (QRK) nr. 09/2020 për përcaktimin e procedurave të dhënies në shfrytëzim dhe këmbim të pronës së paluajtshme të komunës. Shkeljet në nenet e sipërcekura konsistojnë në faktin se komuna nuk ka plan zhvillimor-hapësinor të miratuar dhe dokumentit të ofruar për votim i mungon destinimi”, thuhet në shkresën e re të dorëzuar më 21.01.2022 në MAPL.

Lëvizja për Bashkim po ashtu konsideron se ky subjekt politik duhet të përfaqësohet në Komitetin për Politikë dhe Financa.

Edhe Arbëri 20 jan 2022 MAPL-ja hedh poshtë tri ankesa të grupit të këshilltarëve LB-AAK në Obiliq

“Ne kosniderojmë se edhe këtë vendim duhet anuluar, arsyet tona konsistojnë në Ligjin nr.03/L-040, siç ceket më poshtë: Neni 52.1 Komiteti për Politikë dhe Financa kryesohet nga kryesuesi i Kuvendit të Komunës dhe përbërja e tij duhet të reflektojë përfaqësimin e entiteteve politke në kuvendin e komunës. Kjo mbështetet edhe në Udhëzimin Administrativ (MAPL) nr. 05/2020 për procedurën e themelimit, përbërjen dhe kompetencat e komiteteve të përhershme dhe komiteteve tjera në komunë”, thuhet tutje në shkresën e LB-së. “Duke pas parasysh një përfaqësim gjithpërfshirës ne mendojmë se LB duhet të përfaqësohet me një anëtar në KPF, ashtu siç përfaqësohet LDK që është forcë e barabartë me nga dy anëtarë në Kuvendin Komunal”.

KOHA ka raportuar për pakënaqësinë e Grupit të LB-AAK-së me përgjigjen që kanë marrë nga MAPL lidhur me pronat dhe KPF-në. Këshilltari i AAK-së, Xhelal Kraniqi, kishte paralajmëruar se do t’i shterin të gjitha mundësinë ligjore që këto vendime të Kuvendit të Obiliqit të rishikohen.