Largohen nga tregu 7 produkte qumështi që nuk kanë deklaruar përmbajtjen e vajit të palmës

Inspektorati Qendror i Mbikëqyrjes së Tregut ka zhvilluar inspektime në Prishtinë, Gjilan, Podujevë, Fushë-Kosovë, Obiliq dhe Suharekë gjatë të enjtes. 

Ka njoftuar se janë realizuar gjithsej 12 inspektime në markete të ndryshme, ku janë evidentuara produkte të ndaluara për shitje nga Agjencia e Ushqimit dhe Veterinarisë. 

Ka njoftuar se gjatë inspektimeve janë tërhequr nga tregu shtatë produkte qumështi që nuk kanë deklaruar përmbajtjen e vajit të palmës. 

“Gjatë inspektimeve të sotme janë tërhequr nga tregu këto produkte: Schmand, VITA 18%, 180 g; Schmand, VITA 18%, 400 g; Schmand, VITA 18%, 800 g; Holla Cooking Cream, 1 L; Holla Barista, 3.8%, 1 L; Mazë tradicionale, DRENA, 1 kg; Schmand i freskët, BYLMETI”, ka njoftuar MINTI.  
Po ashtu është bërë e ditur se në ditët në vijim do të nisë edhe shqiptimi i gjobave ndaj operatorëve ekonomikë që nuk kanë tërhequr produktet që janë të papajtueshme sipas raportit të AUV-it. 
“Ministria e Industrisë, Ndërmarrësisë, Tregtisë dhe Inovacionit u bën thirrje të gjithë operatorëve ekonomikë që të zbatojnë pa vonesë urdhrat për tërheqjen e produkteve të përcaktuara nga autoritetet kompetente, duke respektuar vendimet e AUV-it dhe legjislacionin në fuqi”, thuhet në njoftim të MINTI-t. 

Ministria ditë më parë njoftoi për tërheqjen edhe të disa produkteve të tjera.

Aksionet po ndërmerren pasi Agjencia e Ushqimit dhe Veterinarisë gjeti përmbajtje të padeklaruara në etiketë. Nga mostrat e testuara, produktet me mospërputhje rezultuan se përmbajnë vaj palme e qumësht pluhuri.