Kuvendarët e Prizrenit nderojnë heroizmin e Jasharëve

Seancë solemne për 24-vjetorin e rënies heroike të Adem Jasharit dhe familjes së tij, ka mbajtur të shtunën edhe Kuvendi i Komunës së Prizrenit. Kuvendarët nga partitë e ndryshme me këtë rast kanë thënë se lufta deri në flijim e Jasharëve vendosi themelet për lirinë dhe pavarësinë e Kosovës.

Anëtarët e Kuvendit të Komunës së Prizrenit me rastin e shënimit të 24-vjetorit të Epopesë së UÇK-së, kanë vlerësuar heroizmin e Jasharëve në Prekaz, duke theksuar se falë trimërisë e sakrificës së tyre, është realizuar ëndrra e brezave të shumtë për lirinë dhe pavarësinë e Kosovës.

Sipas tyre, marsi i vitit 1998 paraqet kthesën historike kur gjithçka ndryshoi për shqiptarët e Kosovës.

Gjatë seancës solemne, ata kanë porositur që bazuar në këto vlera të punohet për krijimin e shtetit të barabartë për të gjithë.

Aktivitetet e Komunës së Prizrenit për shënimin e Epopesë së UÇK-së vazhdojnë të dielën, me homazhe te varrezat e dëshmorëve si dhe te lapidarët e heronjve kombëtarë.

Seanca solemne për shënimin e Epopesë së UÇK-së, krahas Prizrenit, kanë mbajtur edhe kuvendet komunale në Skenderaj e Drenas, ashtu si edhe në Deçan e Gjilan.