Kontestohet ligjshmëria e konkurseve në Inspektoratin e Punës

Caktimi i Rizah Plakollit ushtrues detyre të kryeinspektorit të punës, për të cilin Këshilli i Pavarur Mbikëqyrës për Shërbyes Civilë e kishte shpallur të kundërligjshëm, rrezikon që të kthejë në pikën zero edhe konkurse të tjera të shpallura nga Inspektorati i Punës. Për disa prej tyre, tashmë Këshilli ka pranuar ankesa nga kandidatët

Rreth 23 konkurse me mbi 70 pozita pune të shpallura nga Inspektorati Qendror i Punës nuk janë përmbyllur ende që nga marsi i këtij viti.

Ato rrezikojnë të kthehen në pikën zero shkaku i kontestimit të ligjshmërisë së tyre.

Sipas ankesave të parashtruara në Këshillin e Pavarur Mbikëqyrës për Shërbyesit Civilë (KPMSHCK), disa prej të cilave i posedon edhe KOHA, kontestuese është hartimi i planit të personelit të Inspektoratit dhe miratimi i tij, nga persona për të cilët Këshilli kishte konstatuar se janë emëruar kundërligjshëm.

“Plani i personelit ku është paraparë kjo pozitë sipas ligjit, është miratuar nga u.d. Drejtori Ekzekutiv, Rizah Plakolli, i cili në bazë të informacionit publik si vendimet e publikuara të KPMSHCK-së, gjegjësisht vendimet e publikuara të KPMSHCK-së, gjegjësisht vendimit A.Nr. 432/2025 dhe vendimit A.Nr. 267/2025, rrjedh se z. Rizah Plakolli po ashtu nuk ka pasur autorizim ligjor ta ushtrojë detyrën e Drejtorit Ekzekutiv të IQP-së. Për shkak se është profesional 2., nuk ka kompetencë ta ushtrojë detyrën e Drejtorit Ekzekutiv. Prandaj, ligjërisht, nëse organit autorizimi ligjor nuk i rrjedh nga një ligj, atëherë ai nuk ka kompetencë”, thuhet në një nga ankesat.

Ministri në detyrë i Financave, Hekuran Murati, në mars ka caktuar në pozitën e ushtruesit të detyrës së kryeinspektorit, Rizah Plakollin.

Edhe Arbëri 20 kor 2025 Ish-drejtori Gashi pretendon se edhe konkursi për ta zëvendësuar atë në MASHT ishte i kundërligjshëm

Por caktimi i tij ishte kundërshtuar nga zëvendëskryeinspektori, Agim Millaku, i cili kishte parashtruar ankesë në KPMSHCK.

“Kolegji i Këshillit vlerëson se ministri i Ministrisë së Financave, Punës dhe Transfereve, me rastin e nxjerrjes së vendimit me numër protokolli 701/2025 të datës 06.03.2025 për emërimin e nëpunësit civil z. R.P në pozitën ‘Zyrtar Shpenzues dhe i Pasurisë’ e cila është  pozitë e kategorisë profesionale (Profesional 2), nuk ka vërtetuar në mënyrë të drejtë dhe të plotë gjendjen faktike dhe gabimisht e ka zbatuar të drejtën materiale, duke vepruar kështu në kundërshtim me dispozitat e Ligjit Nr.08/L-197 për Zyrtarët Publikë dhe Ligjit Nr.05/L-031 për Procedurën e Përgjithshme Administrative, sikurse Vendimi me numër protokolli 701/2025 i datës 06.03.2025 i Ministrit të Ministrisë së Financave, Punës dhe Transfereve”, thuhet në vendimin e KPMSHCK-së. “Ky është akt administrativ i paligjshëm, sikurse përcaktohet me dispozitat e nenit 52 paragrafi 1 nën paragrafi 1.3, dhe 1.5 të Ligjit Nr.05/L-031 për Procedurën e Përgjithshme Administrative dhe si i tillë është shfuqizuar sikurse në dispozitivin e këtij vendimi”.

Por, përkundër këtij vendimi, Murati e kishte marrë një vendim të ri, duke e caktuar sërish Plakollin në të njëjtën pozitë.

KOHA ka adresuar pyetje lidhur me këtë vendim dhe atë paraprak në Ministrinë e Financave, por për më shumë se dy javë nuk ka marrë përgjigje.

Çështja e caktimit të Plakollit në këtë pozitë tashmë është duke u trajtuar edhe nga Prokuroria.

Edhe Arbëri 29 kor 2026 Inspektorati i Punës pas vdekjes së punëtorit nga rrëzimi i vinçit: Herët të nxirren konstatime

Përveç Plakollit, KPMSHCK-ja ka nxjerrë vendim se edhe caktimi ushtrues detyre i drejtorit të Njësisë për Menaxhimin e Burimeve Njerëzore, Naim Shalaku, i cili është hartues i planit për personel për 2025, është i kundërligjshëm.

Ky vendim përmendet edhe në ankesat ndaj konkurseve të kontestuara nga kandidatët për pozitat e shpallura.

“Kolegji i Këshillit konstaton se as z. N. Sh. në kuptim të nenit 59 paragrafi dhe 2 të Ligjit Nr.08/L197 për Zyrtarët Publikë, si dhe nenit 6 paragrafi nën paragrafi 4.1 të Rregullores (QRK) Nr.01/2024 për Disiplinën e Nëpunësve Civilë, nuk ka mandat ligjor për inicimin e kërkesës disiplinore ndaj ankueses, për faktin e pa kontestueshëm se i njëjti nuk është mbikëqyrës i drejtpërdrejtë i ankueses, ngase i njëjti kundërligjshëm, përmes Vendimit me numër protokolli 2942 të datës 08.11.2024, ishte caktuar nga z. H. N. dhe atë në pozitën e z. F. K. atë të Menaxherit të Personelit, mirëpo Këshilli përmes Vendimit A.nr.1571/2024 e kishte shfuqizuar si të paligjshëm vendimin për transferimin e z. F. K. në pozitën e Udhëheqësit të Divizionit për Arkiv, duke kthyer këtë të fundit në vendin e punës atë Menaxherit të Personelit sipas Aktemërimit me numër protokolli 02/2021 të datës 19.04.2021”, thuhet në vendimin e KPMSHCK-së.

Lidhur me këtë, KOHA prej pesë ditësh ka kërkuar një përgjigje nga ana e Inspektoratit Qendror të punës, por nuk ka marrë përgjigje.

Ky institucion është pyetur edhe për pasojat, nëse këto konkurse kthehen në pikën zero.

Edhe Arbëri 20 kor 2026 Inspektorati i Punës ndalon punën në 13 vendpunishte në Prishtinë dhe Fushë Kosovë

Përgjigje KOHA nuk ka marrë as nga Rizah Plakolli e Naim Shalaku.

Edhe ushtruesi paraprak i detyrës së kryeinspektorit, Hekuran Nikqi, ishte caktuar në mënyrë të kundërligjshme në pozitën e kryeinspektorit. Kjo, përveç KPMSHCK-së, është vërtetuar edhe nga Gjykata Themelore, ajo e Apelit dhe Supremja.