Kërkohet ristrukturimi i RTK-së

Kryetari i Komisionit për Buxhet dhe Transfere, Hekuran Murati pas mbledhjes së këtij komisionit ka bërë të ditur se pikë e rendit të ditës ishte miratimi i buxhetit të Trustit Pensional dhe miratimi i kërkesës buxhetore për muajin qershor për RTK-në dhe për qëndrueshmërinë afatgjate të këtij mediumi publik.

Murati tha se kanë vërejtur keqperformancë në RTK sa i përket të hyrave nëpër vite, teksa shtoi se problem mbetet edhe moskompletimi i Bordit gjë që kërkoi nga Kuvendi ta ketë ndër prioritetet e saj.

Ai tha se për të pasur një menaxhim më të mirë brenda këtij mediumi, duhet të ndodhë një ristrukturim i shpejtë.

“Ka qenë vendim i qeverisë, edhe i Kuvendit, kur është miratuar buxheti që të ketë një shkurtim prej 20 për qind që nuk e prek pjesën e pagave, për pjesën tjetër të të hyrave, shpenzimeve operative po besoj që i takon menaxhmentit që të menaxhojë më mirë edhe shpenzimet, por edhe të rrisë të hyrat meqenëse kemi pas rënie të vazhdueshme të hyrave nëpër vite. Ka keqpërformancë sa i përket të hyrave. Por në të njëjtën kohë u shtrua problem edhe kompletimi i bordit sepse pa kompletimin e bordit është vështirë të ndërhyhet në disa shpenzime, pra edhe kjo duhet të jetë prioritet i Kuvendit në mënyrë që ta kemi një ristrukturim sa më të shpejtë dhe një menaxhim më të mirë të RTK-së”, ka thënë ai.

Murati ka thënë se në këtë mbledhje u diskutua edhe për funksionimin e Trustit Pensional të Kosovës.

Edhe Arbëri 3 dhj 2021 Komisioni shqyrton buxhetin në lexim të dytë, Muratit i kërkohet rritja e buxhetit për RTK-në

Ai tha se kanë marrë zotimet nga drejtues të Trustit që deri në fund të vitit do të vazhdojnë ta ulin kryesisht taksën menaxhuese dhe të fokusohen në fonde investive.

“Sa i përket Trustit, fillimisht ata e kanë dorëzuar raportin e tyre në fillim të vitit, mirëpo kemi kërkuar me i bë disa kursime, mirëpo raporti i ri ose kërkesa e re buxhetore e tyre ka diku rreth 600 mijë euro shkurtesa. Po ashtu kemi zotimin e tyre që deri në fund të vitit do të vazhdojnë ta ulin kryesisht taksën menaxhuese, të fokusohen në fonde investive që kanë taksë menaxhuese më të lirë, duke mos e rrezikuar as diversifikimin por as përformancën e fondit”, ka thënë ai.