Agjencia e Aviacionit Civil e Maqedonisë së Veriut ka konkluduar se shërbimet në Aeroportin e Shkupit, përgjegjëse për kontrollet e sigurisë, kanë vepruar në mënyrë profesionale dhe në bazë të standardeve ndërkombëtare në rastin me presidenten e Kosovës, Vjosa Osmani.
Në raportin e AAC-së thuhet se shërbimet e aeroportit u janë përmbajtur rregullave që zbatohen ndërkombëtarisht, duke mos lejuar anashkalimin e standardeve dhe procedurave, qoftë edhe nën presionin e personave që shoqërojnë pasagjerët.
“Refuzimi për të kryer kontrollet standarde të sigurisë me të njëjtët pasagjerë, sipas të dhënave, ka ndodhur edhe në vitin 2022 dhe 2023 kur kontrollet e sigurisë u pranuan vetëm pasi piloti i avionit kishte refuzuar të pranojë pasagjerë në avion pa u kryer një kontroll sigurie”, u tha në deklaratën e AAC-së. Nëse zyrtarët në TAV Maqedoni do të vepronin ndryshe nga rregullat e përcaktuara dhe do të lejonin lëshime dhe shmangie të procedurave të parapara, do të përballeshin me sanksione serioze nga Agjencia e Aviacionit Civil si organ përgjegjës për rregullimin e tyre”, thuhet në raport.
AAC ka sfiduar që të zbatohet e njëjta procedurë në një aeroport ndërkombëtar evropian nëse dikush ka dyshime në sjelljen e shërbimeve në Shkup. Ndërsa, ka thënë se si organ i pavarur dëshiron të qëndrojë larg përplasjeve politike lidhur me këtë ngjarje.
"Në këtë rast, vetëm shërbimet e aeroportit meritojnë kërkimfalje, ndërsa duke u përpjekur të kryejnë vazhdimisht punën e tyre në përputhje me rregullat dhe praktikat ndërkombëtare të zbatuara, pësuan presione, kërcënime dhe poshtërime të panevojshme", thuhet tutje.
