Në 21 vjetorin e rënies së komandantit të Brigadës 113, Mujë Krasniqi dhe 40 dëshmorëve të kombit, kryeministri në detyrë i Kosovës Ramush Haradinaj ka thënë se Alleksandar Vuçiqi dhe kolegët e tij nuk mund ta mohojnë që djemtë e UÇK-së i kanë përzënë ata nga Kosova.
Në akademinë përkujtimore kushtuar 41 dëshmorëve të kësaj brigade, Haradinaj ka thënë se shqiptarët nuk mund të thyhen nga askush, e këtë e dëshmon më së miri vepra e komandant Mujë Krasniqit.
Aty u tha se 14 dhjetori sjell në kujtesë heroizmin e njërit prej komandantëve më emblematik të UÇK-së, Mujë Krasniqit, i njohur si komandant Kapuçi.
Nga kjo akademi përkujtimore, kryeministri në detyrë i dërgoi porosi presidentit serb Vuçiq, i cili ditë më parë mohoi masakrën e Reçakut, duke i thënë se “nuk e mohon dot faktin që ushtarët e UÇK-së e kanë përzë nga Kosova”.
“Vuçiqi, edhe kolegët e tij, Vullini e Daçiqi e të tjerë e mohojnë Reçakun, por një gjë nuk mund ta mohojnë, djemtë e UÇK-së e kanë përzënë prej Kosovës, pra edhe Milloshin edhe Vuçiqin edhe krejt. Tash ai prej atje le t’i mohon, por a mund ta mohojë këtë, që dikur këtu ka qenë ai këmbëkryq, nuk është më. Ju e dini ‘Grandin’, kush ka qëndruar në Grand? Shtabi i kujt ka qenë? Nuk janë më, lëre që nuk kanë do të kthehen më, por ne do të forcohemi si popull në të drejtën tonë gjithë. Kush mundohet ta thyejë shqiptarin, le të mësojë pak prej historisë: nuk ka kush që e thyen shqiptarin, nuk ka mundur kurrë askush ta lëkund shqiptarin në të drejtën e vet. Pse nuk mundet? Veç merreni shembullin e Mujë Krasniqit, në çdo luftë, çdo ushtri, atë njeri e kishin heq prej frontit, fizikisht ka qenë i paaftë të luftojë, ai ka qenë i plagosur rëndë, ka qenë njeri që është dashur që shtrihej në spital, por ai vet ka marrë vendim, jo vetëm të ngarkohet me armë, por edhe të hyjë në vija të luftës”, tha Haradinaj, raporton Kps.
Haradinaj u shpreh i bindur se shqiptarët, kudo që janë, jo vetëm në Kosovë, do të ecin çdo herë me hapa përpara armiqve.
E Xhavit Jashari nga Shoqata e Familjeve të Dëshmorëve të Kombit, tha se duke nderuar Mujë Krasniqin dhe dëshmorët e tjerë, i dërgojnë porosi Gjykatës Speciale, se asnjë drejtësi e anshme nuk mund të shkelë mbi gjakun e dëshmorëve të kombit.
“Duke nderuar dhe duke kujtuar 166 dëshmorët e kombit të Brigadës 113 ‘Mujë Krasniqi’, ne nderojmë dhe kujtojmë të gjithë dëshmorët e kombit kudo që kanë rënë për lirinë, për të drejtën historike të shqiptarëve, për jetën e përbashkët të shqiptarëve brenda gjeografisë së tyre kombëtare. Andaj duke nderuar këtë gjak të derdhur për lirinë tonë, i dërgojmë porosi edhe asaj Gjykate Speciale që është krijuar vetëm për ushtarët e lirisë, se asnjë drejtësi e njëanshme, siç edhe asnjë padrejtësi, nuk mund të shkelë mbi gjakun e dëshmorëve të kombit. Në të njëjtën kohë u dërgojmë porosi të gjithëve, edhe politikës shqiptare edhe asaj evropiane, edhe gjykatave speciale, se kur burgosni ushtarët e UÇK-së, keni burgosur një pjesë të bartësve të lirisë sonë, në emër të së cilës edhe ju sot jeni në Kosovë”, tha ai.
Ai tha se shteti ka obligim të nderojë dëshmorët e kombit, të kujdeset dhe të mbështesë familjet e dëshmorëve të kombit, të kujdeset për invalidët e për veteranët, dhe të mbrojë lirinë që është fituar falë gjakut të dëshmorëve të kombit.
Në akademinë kushtuar 41 dëshmorëve të Brigadës 113, ka folur edhe Hysni Shabani, ushtar i kësaj brigade.
“Ata e dinin se rruga drejt lirisë është e gjatë, por më e gjatë dhe e rëndë ishte robëria shekullore nën regjimin serb, janë 181 dëshmorë të Brigadës 113 që dhanë jetën në altarin e lirisë. Aktet heroike dhe gjaku i tyre dëshmuan vullnetin e zjarrtë për liri, andaj liria që e gëzojmë sot nuk ka zbritur nga qielli, por është kurorëzim, mund, sakrificë e luftës dhe rënies së ushtarëve të UÇK-së. Por dihet se kauza të mëdha kërkojnë heroizma, flijime e sakrifica të mëdha”, tha ai.
Shabani tha se të gjithë dëshmorët që përkujtojnë sot janë figura të ndritshme që ranë për idealin më të madh jetësor, çlirimin e atdheut.
Ndërsa në emër të familjeve të dëshmorëve, motra e komandant Mujë Krasniqit, Selvete Krasniqi, falënderoi për organizimin e akademisë, dhe u zotua se do të jenë çdo herë në shërbim të tokave shqiptare.
“Një gjë u premtojmë të gjithëve: çdo kund e ne çdo moment, sa herë të jetë nevoja për këtë vend, do të jemi në shërbim të tokave shqiptare”, tha ajo.
Në 21 vjetorin e rënies së Mujë Krasniqit, kujtojmë se ai bashkë me 40 luftëtarë të UÇK-së ranë heroikisht më 14 dhjetor të vitit 1998, në një pritë nga forcat serbe, afër kufirit Kosovë-Shqipëri.
Mujë Krasniqi, i njohur si komandant Kapuçi, ishte një prej luftëtarëve të parë të UCK-së.
