Partia “Guxo” do ta propozojë deputetin Haxhi Avdyli për ministër të Shëndetësisë, pas dorëheqjes së Rifat Latifit, ka bërë të ditur një nga kryetaret e këtij subjekti, Donika Gërvalla.
Në një deklaratë për televizionin publik të premten, Gërvalla ka thënë se këtë propozim do t’ia bëjë kryeministrit Kurti duke shprehur pajtim me deklaratën e deputetit Burim Meta se ky institucion duhet të udhëhiqet nga “Guxo”.
“Për mua, Haxhi Avdyli më duket se është kandidati më i mirë i mundshëm”, ka thënë ajo.
Latifi u dorëhoq të premten. Një ditë pas dorëheqjes së tij, kryeministri Albin Kurti nuk ka pranuar të flasë për arsyet se përse ata ndanë rrugët. I pyetur nga gazetarët, kreu i ekzekutivit ka ikur, duke refuzuar të përgjigjet. Gjatë ditës Kurti e Latifi janë takuar, por sërish nuk janë dhënë detaje. Deri në emërimin e një personi tjetër në këtë pozitë, Kurti e ka caktuar ushtruese detyre Dafina Gexha Bunjakun.
