Federici: KFOR-i i gatshëm për ta kryer detyrën në mbështetje të stabilitetit lokal e rajonal

Shefi i KFOR-it, gjeneral-majori Franco Federici, ka vizituar njësitë e KFOR-it që janë vendosur në pikat kufitare në Jarinjë e Bërnjak.

Federici ka thënë se KFOR-i është i gatshëm të kryejë detyrën e rëndësishme në mbështetje të stabilitetit lokal e rajonal.

Për dy javët e ardhshme, njësitë e KFOR-it janë vendosur përkohësisht në pikat kufitare në Jarinjë e Bërnjak, si pjesë e marrëveshjes së arritur të enjten në Bruksel mes Kosovës e Serbisë për targat.

“Njësitë e KFOR-it janë plotësisht të gatshme për të kryer këtë detyrë të rëndësishme në mbështetje të stabilitetit lokal e rajonal. Në ditët e fundit kemi zhvilluar bisedime me të gjitha palët e përfshira dhe kemi ofruar përditësime të rregullta te Përfaqësuesi Special i BE-së për dialogun Prishtinë – Beograd, Miroslav Lajçak, dhe te zinxhiri im komandues në NATO. Falënderoj institucionet e Kosovës, kryetarët e komunave veriore dhe gjithë akterët, që me angazhimin e tyre kontribuuan në deeskalimin e situatës”, ka thënë Federici.

E gjenerali i NATO-s, Jens Stoltenberg, gjatë takimit me Lajçakun të premten, ka thënë se NATO mbetet fuqishëm e përkushtuar ndaj stabilitetit në Ballkanin Perëndimor.

NATO ka shtuar se përkrah dialogun Kosovë – Serbi të ndihmuar nga BE-ja dhe e sheh si rrugë të vetme drejt arritjes së një marrëveshje të qëndrueshme politike dhe të stabilitetit për rajonin.