Qytetarët e Kosovës do t’u drejtohen kutive të votimit edhe një herë, për të pestën herë në 16 muajt e fundit, nëse llogariten edhe dy rundet e lokaleve.
Të martën, në ditën e fundit të afatit kushtetues, partitë e përfaqësuara në Kuvend, kanë dështuar të zgjedhin presidentin, e për pasojë, vendi sipas aktgjykimit të fundit të Gjykatës Kushtetuese, do të shkojë në zgjedhje të parakohshme që duhet të mbahen brenda 45 ditëve.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoGjatë së martës janë bërë katër përpjekje për të zgjedhur presidentin. Përpjekja e parë u bë në orën 10:00, që ishte vazhdimësi e seancës së një dite më parë, më pas seanca ka vazhduar në orën 14:30, pastaj në 19:30 dhe në fund në orën 23:00.
Por në asnjë rast nuk pati kuorum për të proceduar me votimin për zgjedhje.
Deputetët e koalicionit qeverisës në krye me Lëvizjen Vetëvendosje ishin në sallë, por jo edhe ata të opozitës.
Në fakt, deputetët e opozitës para secilës përpjekje kanë paralajmëruar se nuk do të marrin pjesë në votim pa një marrëveshje paraprake.
Kandidate për presidente ishin Feride Rushiti dhe Hatixhe Hoxha, të propozuara nga Lëvizja Vetëvendosje pas tërheqjes të hënën mbrëma të Glauk Konjufcës dhe Fatmire Mulhaxha-Kollçakut.
Ndryshe prej së hënës mbrëma, kur ka nisur seanca për zgjedhjen e pasardhësit të Vjosa Osmanit, e kur pati votim, në katër përpjekjet e së martës nuk është votuar fare.
Edhe në seancën e fundit, kryetarja e Kuvendit, Albulena Haxhiu, iu ka bërë thirrje deputetëve të opozitës që të kthehen në sallë dhe të marrin pjesë në votim.
“Po presim nëse deputetët e opozitës do të vijnë, t’i lënë anash barrikadimet. Kjo është arsyeja pse në vazhdimësi kam bërë thirrje që deputetët e opozitës të vijnë këtu. Janë minutat e fundit të kësaj legjislature. Kjo rrugë e nisur mbarë nuk meritonte të ndërpritej”, ka thënë Haxhiu.
E gjatë kohës sa deputetët e koalicionit qeveritar po prisnin, fjalën e ka marrë ministri në Qeverinë Kurti, Hekuran Murati.
Ai ka ftuar qytetarët që në zgjedhjet e reja të mos i votojnë partitë opozitare, pasi sipas tij, po e bojkotojnë Kuvendin dhe po e sabotojnë Republikën.
“Kur këta anëtarë të opozitës nesër të shkojnë e të kërkojnë vota, qytetarët duhet të pyesin veten ‘pse t’i votojmë’. Ata janë të deleguar të popullit, por ata në këtë rast nuk po e përfaqësojnë popullin”, ka thënë Murati.
Ai po ashtu ka numëruar edhe humbjet që do të ketë vendi nga shkuarja në zgjedhje.
“Pos 10 milionëve që do të kushtojë organizimi i zgjedhjeve, do të humbin edhe dhjetëra miliona të tjerë. Kosova është paraparë të përfitojë 882 milionë euro nga Plani i Rritjes i BE-së, por për këtë duhet miratuar reformat një pas një. E pa Kuvend nuk do të jetë e mundur kjo”, ka thënë ai.
Pas tij, deputetëve në sallë u është drejtuar edhe Kurti. Ai ka thënë se në zgjedhjet e reja që po e presin vendin, VV-ja vetëm sa do të rritet si parti.
“Ata janë të vetëdijshëm që zgjedhjet nuk janë zgjidhje. Ata nuk duan përgjegjësi, nuk duan pushtet por dëshirojnë që këtë të mos e kemi as ne. Veçse për këtë nuk vendosin ata, por populli i Kosovës i cili gjithmonë e më shumë na ka mbështetur neve në përputhje me realizimin e zotimeve tona dhe përmirësimin e situatës së tij edhe në aspektin socio-ekonomik edhe në atë të sigurisë. Pas një qeverisjeje 5-vjeçare është rritur mbështetja për ne. Çdo herë kështu do të jetë. Ne do të jemi afër popullit t’i shërbejmë me aq sa dimë e mundemi dhe mbështetja për ne vetëm sa do të rritet", ka thënë Kurti.
E pas seancës Kurti ka mbajtur konferencë me kandidaten e propozuar Feride Rushiti.
"Unë e bëra këtë lëvizje vetëm e vetëm që vendi të dalë nga ngërçi politik... Udhëtimi im vazhdon me organizatën joqeveritare që unë e përfaqësoj", tha Rushiti.
Përplasjet VV-LDK
Në fakt, Kurti ka mbajtur dy konferenca gjatë së martës, ku ka shpjeguar ecurinë e procesit, sipas tij.
Në konferencën e dytë, ai ka ftuar LDK-në që të paraqesë 15 nënshkrimet e saj, e të tjerat do t’i plotësojë Vetëvendosje. Ka premtuar edhe tërheqjen e njërës prej kandidateve nga gara për t’i bërë vend asaj të LDK-së, që është përmendur të jetë Vjosa Osmani.
“Kam biseduar me të (Hatixhe Hoxhën v.j.). Ajo është dakorduar të tërhiqet nga kandidatura nëse LDK-ja i sjell 15 nënshkrime për kandidaten e saj kushdo që është. LVV-ja i jep edhe 15 nënshkrime dhe në këtë mënyrë do ta kishim një kandidat nga shoqëria civile dhe një kandidat nga LDK-ja dhe sonte le ta zgjedhim presidenten/in e Kosovës. Këtu jam, në zyrën e LVV-së këtu te Kuvendi, këtu mund të më gjejë LDK-ja dhe të m’i sjellë 15 nënshkrimet. Edhe nëse i kanë vetëm 13 a 14 nënshkrime, ne i plotësojmë, nuk e këqyrim për pak. S’kemi asnjë problem me cilindo kandidat që e sjell LDK-ja”, ka thënë Kurti.
Por pas secilës konferencë të Kurtit gjatë së martës, të tilla kanë mbajtur edhe ato opozitare, sidomos LDK-ja, ku në një rast u paraqit kryetari i saj Lumir Abdixhiku e në një shefja e Grupit Parlamentar të kësaj partie, Jehona Lushaku-Sadriu.
Abdixhiku, propozimin e Kurtit për tërheqje të njërës kandidate e quajti lojë sa për të siguruar kuorum për votim.
Ai ka thënë se LDK-ja i ka ofruar 15 nënshkrimet dhe propozimin për kandidat, por se sipas tij kryeministri Albin Kurti s’ka qenë i interesuar.
“Nënshkrimet nuk dorëzohen te LVV-ja sepse LVV nuk është subjekt ku duhet t’i dorëzosh, as Nagavci nuk është autoritet. Këto janë çështje të marrëveshjeve politike, siç jemi ulur gjithmonë të bisedojmë kemi mundur të flasim për një emër. Çka po kuptoj është e qartë që Kurti do një kundërkandidat për njërën prej kandidatëve të vet, do kuorum që të zgjedhë presidentin karate. Ne i kemi 15 nënshkrime për kandidatin e LDK. Është propozuar kandidati, duhet të merresh vesh me palën tjetër se cili është kandidat. Ai duhet të na tregoj a i ka pasur votat për Vjosa Osmanin. Sa e kuptova, ai tha kam vota për ta bërë kundërkandidate Vjosën të Ferides. Këto rrethana ai kërkon kundërkandidat. Jemi në orët e fundit. Po shkojmë në situatë të zgjedhjeve të reja”, ka thënë ai.
Abdixhiku ka shtuar se Kurti nuk e deshi rikandidimin e Vjosa Osmanit, teksa ka thënë se populli do ta zgjedhë atë pavarësisht atij, duke iu referuar zgjedhjeve të parakohshme.
“Ndiej keqardhje që Kurti nuk ka arritur as minimalisht të shprehë gatishmëri për një konsensus për një emër që e konsideroj dhe e vlerësoj shumë, ai siç duket nuk e vlerëson. Çka nuk kuptoj, pse po i pengon kaq shumë Vjosa Osmani Kurtit? Ndoshta Kurti nuk do ta zgjedhë, por jam i bindur se populli do ta zgjedhë”, ka thënë Abdixhiku.
E shefja e grupit parlamentar të LDK-së, Jehona Lushaku, ka thënë se Kurti po e shkakton një krizë dhe se po e dërgon vendin në zgjedhje, teksa ka listuar tri, siç i ka quajtur ajo, “të vërteta” për Kurtin.
“Albini Kurti nuk po e do Vjosa Osmanin presidente. Albini Kurti nuk po do kompromis me LDK-në. Albini Kurti deshi me e përmbysë rendin kushtetues. Kaq e thjeshtë është. Kjo në fakt nuk është krizë politike. Është krizë e një njeriu që s’pranon rend e ligj! Ky njeri, fatkeqësisht po na dërgon sërish në zgjedhje”, ka thënë Lushaku.
Gjatë konferencës së saj, u shkaktua edhe një “incident”.
Deputeti i VV-së, Agim Bahtiri, ndërhyri duke i thënë: “më ka çu Kurti me i marrë nënshkrimet”, duke iu referuar tezës së VV-së, se LDK-ja nuk i ka ofruar nënshkrimet në mënyrë zyrtare, aty ku duhet, por ato i ka prezantuar në media.
Për këtë ka folur edhe Kurti në konferencën e parë të së martës. Sipas tij, lista me nënshkrime kishte datën e dy ditëve më parë dhe në të nuk ishte specifikuar emri i kandidatit për president.
Ai ka folur edhe për përpjekjet që sipas tij, ka bërë ai me partitë opozitare për të arritur konsensus.
“U përpoqëm për një kandidat konsensual, por ishte e pamundur. I ftova disa herë në takim, kryetarin e LDK-së, Abdixhiku, kryetarin e PDK-së, Hamza. Ndonëse nuk ofruan asnjë propozim, në vazhdimësi jam unë ai që kam ofruar propozime edhe me emra konkretë, patjetër me funksione për ta, por morëm veçse refuzime. Ne propozime, ata refuzime. Të shtunën, e bëmë edhe një hap tutje, kërkuam nga subjektet politike, PDK dhe LDK, që së bashku të sillnin 3 emra ku përveç nënshkrimeve, njërin edhe do ta votonim. Ju e dini që as PDK, e as LDK nuk kanë deputetë për të propozuar kandidatë të tyre. LDK-ja mund të propozojë një gjysmë kandidati, sepse i ka 15 deputetë, e nevojiten 30. Ndërkaq, PDK-ja mund të propozojë 2/3 e një kandidati, meqenëse i ka 22 deputetë e nevojiten 30. Por, ato të dyja bashkë mund ta propozojnë një kandidat, e ne u thamë ja po bëhemi edhe ne bashkë me ju e le t’i propozojmë tre kandidatë, që të gjitha propozimet tuaja, ju propozoni emra, ne ua japim mbështetjen në seancë plenare. Asnjë propozim. E shtymë afatin për t’u dhënë kohë shtesë. Kot, sepse refuzim sërish”, ka thënë Kurti.
Qëndrimet e PDK-së dhe AAK-së
Gjatë ditës së martë kanë reaguar edhe dy partitë e tjera opozitare, PDK-ja dhe AAK-ja.
Partia Demokratike e Kosovës, pas mbledhjes së kryesisë së partisë, ka njoftuar se ka mbledhur edhe kryetarët e degëve të saj.
“PDK-ja rithekson se do të kundërshtojë çdo veprim të pushtetit që bie ndesh me Kushtetutën dhe rendin juridik, duke u angazhuar në të gjitha format demokratike dhe institucionale për mbrojtjen e tyre. Nëse sonte procedohet me këtë zgjedhje antikushtetuese, do të ketë reagim të organizuar politik, institucional dhe qytetar”, ka thënë Hamza para përpjekjes së fundit të Kuvendit për të zgjedhur presidentin.
Ka reaguar edhe deputetja e kësaj partie Vlora Çitaku, duke thënë se Kurti nuk po e kupton që në zgjedhjet e fundit ka fituar veç 51 për qind të votave, e jo 100 për qind.
“Albin, Nëse ka një njeri që nuk e njeh rezultatin zgjedhor në Kosovë, ai je ti. Falë atij rezultati, ti e udhëheq Qeverinë dhe Kuvendin. Po 51% nuk janë 100%. Kush është shtetar, institucionalist dhe respekton Kushtetutën, nuk dëshmohet vetëm nga e kaluara e largët, por mbi të gjitha nga veprimet e sotme. Si opozitë, pa asnjë kusht, kemi votuar zgjatjet buxhetore dhe marrëveshjet ndërkombëtare, përfshirë edhe dje, madje edhe me procedurë të përshpejtuar. Ti, Albin, nuk e njeh bashkëpunimin, as kompromisin. Ti kërkon nënshtrim. Dhe PDK-ja nuk nënshtrohet”, ka shkruar ajo në rrjetet sociale.
Gjatë së martës, kjo parti dhe AAK-ja i kanë bërë ftesë kandidates Feride Rushiti që të tërhiqet nga gara, gjë që nuk ka ndodhur.
Shefi i Grupit Parlamentar të AAK-së, Besnik Tahiri, ka thënë se ajo ka pranuar të bëhet pjesë e lojës së Kurtit.
“Seanca e dytë as nuk duhet të mbahet dhe as të nisë sepse kjo seancë përfaqëson një vazhdim të sulmit ndaj institucionit më të lartë të Kosovës. Nuk do lejojmë të rrezikohet dhe dëmtohet më tej rendi kushtetues... Kurti foli për tre emra por ai as nuk u konsultua me partitë që i thirri po në mënyra arbitrare i solli në Kuvend dy emra therë. Kjo qasje vetëm unifikuese nuk është... Propozimi ynë është që Feride Rushiti të tërhiqet nga kandidatura sepse po bëhet pjesë e një procesi të montuar politik”, ka thënë Tahiri.
Në legjislaturën që sapo është shpërndarë, VV-ja kishte 57 deputetë, PDK-ja 22, LDK-ja 15 dhe AAK-ja 6.
20 ulëset e tjera ishin të komuniteteve.
Sipas aktgjykimit të fundit të Kushtetueses, zgjedhjet e parakohshme duhet të mbahen 45 ditë pas dështimit për të zgjedhur presidentin e ri.
Abdixhiku: Vjosën nuk e shohim si kuorum, por si presidente
Foto-ilustrim: KOHA
Kryetari i Lidhjes Demokratike të Kosovës, Lumir Abdixhiku, pas shpërndarjes së legjislaturës së 10-të, në një konferencë për media tha se vendi shkoi në zgjedhje sepse Lëvizja Vetëvendosje kandidaten e LDK-së, Vjosa Osmanin e pa vetëm si kuorum dhe jo si presidente.
Abdixhiku tha se Osmanin, LDK-ja e sheh si një presidente të denjë.
“Na janë kërkuar nënshkrimet janë ofruar ato nënshkrime por në thelb të problemit është parë që ky emër pra i Vjosa Osmanit është synuar më shumë si një korum për një president që ata e quanin karate. Ne Vjosën nuk e shohim si kuorum për presidenten e tyre që tahsmë i kishte votat e tyre, e shohim më shumë se kaq. E shohim si presidente të denjë të Republikë ssë Kosovës por këto vota nuk u dhanë nga Lëvizja Vetëvendosje. Vjosën nuk e deshën, nuk e votuan, besoj se populli i Kosovës do të ketë mendim ndryshe për këtë çështje”, ka deklaruar Abdixhiku.
Tahiri: Sot shpëtoi demokracia në Kosovë
Besnik Tahiri i Aleancës për Ardhmëri të Kosovës ka thënë se sonte ka përfunduar “episodi i fundit i një filmi triller, me të cilin qytetari i Kosovës u mbajt në ethe”.
Ai tha se kryeministri Albin Kurti edhe në seancën e fundit e keqpërdori foltoren e Kuvendit duke goditur opozitën.
“Por, nuk foli për përgjegjësinë që populli i Kosovës ia dha partisë së parë me votë. 66 deputetë, 51 për qind, nuk i mjaftuan për të arritur një marrëveshje, një dakordim për një president unifikues. Është për keqardhje. Ajo që dua të them e adresoj sot, është se sot shpëtoi demokracia në Kosovë, që është fituar me mund, sakrificë dhe gjak. Sot fitoi Kosovën. Nuk iu nënshtruam diktatit”, tha Tahiri.
Abdixhiku: Koha për bashkim të njerëzve që e duan një Kosovë normale, pa dramë, pa propagandë
Foto: Arkiv
Kryetari i Lidhjes Demokratike të Kosovës (LDK), Lumir Abdixhiku, ka deklaruar se vendi po shkon në zgjedhje për shkak të mungesës së kompromisit nga ana e pushtetit, duke theksuar se, sipas tij, është kërkuar nënshtrim dhe jo bashkëpunim politik.
Ai ka bërë të ditur se LDK-ja ka marrë pjesë në përpjekjet për konsensus, duke u përgjigjur pozitivisht ndaj ftesave për takime dhe duke ofruar propozime konkrete, përfshirë edhe emra për postin e presidentit. Megjithatë, sipas Abdixhikut, këto propozime janë injoruar dhe procesi ka përfunduar pa marrëveshje.
“Kërkuan konsensus. Ua dhamë. U takuam. Kërkuan emra. Thamë Vjosën. E injoruan. Kërkuan nënshkrime. Ua dhamë, 15 sosh, sa i kishim. Në fund, kërkuan gjënë e vetme që dinin, nënshtrimin. Këtë s’mund ta kishin. Vjosën, Presidenten e deritashme, e panë vetëm si kuorum, si numër plotësues për Presidenten e tyre “karate”. Ne e pamë ndryshe. E pamë siç duhet të ishte edhe me votat e tyre, një Presidente përfaqësuese dinjitoze e Republikës”, ka shkruar Abdixhiku në Facebook.
Abdixhiku ka theksuar se dallimi mes LDK-së dhe pushtetit qëndron në qasjen ndaj institucioneve dhe përfaqësimit, duke përmendur se partia e tij e sheh figurën e presidentit si përfaqësuese dinjitoze të Republikës, ndërsa pala tjetër, sipas tij, ka pasur qasje të ndryshme.
Në reagimin e tij, ai ka nënvizuar se vendimmarrja përfundimtare i takon qytetarëve përmes zgjedhjeve, duke shprehur bindjen se ky dallim do të reflektohet në votë.
Në fund, Abdixhiku ka bërë thirrje për bashkim të qytetarëve që, sipas tij, duan një Kosovë normale, pa tensione dhe pa propagandë.
“Dhe këtë dallim do ta vulosë populli i Kosovës. Do ta zgjedhë vet. Tani është koha për bashkimin e njerëzve të mirë të këtij vendi, që duan një Kosovë normale, pa dramë, pa propagandë, me dinjitet brenda Lidhjes Demokratike. Do ta kemi!”, ka shkruar tutje ai.
Rushiti: Pranova kandidimin vetëm që vendi të dalë nga ngërçi politik
Drejtoresha e Qendrës Kosovare për Rehabilitimin e të Mbijetuarave të Torturës, Feride Rushiti, ka thënë se ajo pranoi të kandidohej për presidente vetëm për qëllimin e stabilizimit të institucioneve dhe ecjen e Kosovës përpara.
Rushiti u paraqit në konferencë për media së bashku me kryeministrin Albin Kurti.
“Dua të bëjë të qartë se ky kandidim nuk ka qenë ambicie e as aspiratë për pushtet, ishte vetëm përpjekje e sinqertë, një kontribut për vendim tim, si një person jopartiak, që t’i jap mundësi të largohet ngërçi politik të cilin po e kalon vendi”, tha Rushiti.
E pyetur se a është ndjerë pjesë e kalkulimeve politike, Rushiti e mohoi një gjë të tillë. Ajo deklaroi se këtë propozim e pranoi pas kërkesave nga partnerët ndërkombëtarë dhe me bindjen se do ta zgjidhë ngërçin politik.
Ajo potencoi se angazhimin e vazhdon në organizatën të cilën e udhëheqë.
“Asnjëherë nuk e kam ndjerë veten pjesë të kalkulimeve politike. Pasi e kam parë që janë konsumuar të gjitha mundësitë, pas shumë kërkesave që i kam marrë edhe nga qytetarët dhe partnerët ndërkombëtarë dhe nga kauza e të mbijetuarve të cilët i përfaqësoj jam ulur dhe e kam konsideruar veten figurë unifikuese dhe me bindjen se vota e tyre (opozitës) nuk do të mungoj në Kuvend. Angazhimi im tutje do të vazhdojë në organizatën time joqeveritare të cilën e përfaqësoj”, ka deklaruar Rushiti.
Ajo tha se ka qenë në kontakt me Ambasadën e SHBA-së, dhe ka marrë përgëzime për guximin.
Bajrami: LVV-ja me duartrokitje e dërgoi vendin përsëri në zgjedhje
Hykmete Bajrami
Photo: Driton Paçarada
Deputetja e Lidhjes Demokratike të Kosovës, Hykmete Bajrami, pasi u shpërnda legjislatura e 10-të e Kuvendit të Kosovës, ka thënë se Lëvizja Vetëvendosje, me duartrokitje e dërgoi vendin sërish në zgjedhje.
Në përfundim të seancës për zgjedhjen e presidentit të Kosovës, pasi përfundoi fjalimin, kryeministri Albin Kurti u duartrokit nga deputetët e LVV-së të cilët gjendeshin në sallë.
“LVV me duartroktije e dërgoj vendin përsëri në zgjedhje, sepse Albin Kurti nuk don me qeverisë, ai don me sundu. Ai për të dytën herë e kthej prapa besimin e popullit”, shkroi Bajrami në postimin e saj në Facebook.
Kurti: Kosova për të pasur presidente të re duhet të ketë opozitë të re
Photo: Driton Paçarada
Kryeministri i Kosovës, Albin Kurti, ka thënë se partitë opozitare në Kosovë janë në rënie të lirë dhe me çdo proces zgjedhor vetëm sa po bien më tepër.
Ai ka thënë se Kosovës i duhet një opozitë e re për të pasur presidente të re.
“Opozita është e vjetër. Kjo opozitë mundet me sjellë ndonjë fytyrë të re, por zanatin e karakterin e ka të vjetër. Prandaj janë në rënie të lirë. Po bien vazhdimisht nëpër cikle elektorale. Sa më shumë po mbahen zgjedhje aq më poshtë po shkojnë. Asnjë mësim s’po nxjerrin. Do të ishin qesharakë sikur të mos ishin të gjorë”, ka thënë Kurti.
Ai tha se opozita po thotë “ose populli le të na heqë nga Kuvendi ose duhet të na dojë me zor”.
“Veç këto dy mundësi janë. Ata janë thellësisht të pakënaqur me numri ne deputetëve që kanë. Praktikisht LDK-ja po thotë që i kemi 15 deputetë por nuk më duhen asgjë. PDK-ja po thotë që i kam 22 deputetë por nuk po më duhen asgjë, sepse ju e dini 22 + 15 bëjnë 37 e në 57 e ne 66. Këtë s’po munden ta kapërdijnë mendërisht dhe çka po u thonë qytetarëve, po shkojmë në zgjedhje”, tha Kurti.
PDK: U mbrojt rendi kushtetues, zgjedhjet të caktohen sipas afateve kushtetuese
Bedri Hamza
Photo: Driton Paçarada
Partia Demokratike e Kosovës (PDK) ka deklaruar se me përfundimin e afatit kushtetues për zgjedhjen e Presidentit është mbrojtur rendi kushtetues dhe është shmangur, sipas saj, një shkelje e rëndë e Kushtetutës.
Sipas PDK-së, përpjekjet për të imponuar një proces të njëanshëm dhe jashtë kornizës kushtetuese kanë dështuar, ndërsa institucionet e Republikës dhe rendi kushtetues janë ruajtur. Kjo parti e konsideron se përgjegjësia kryesore për krizën politike bie mbi pushtetin aktual, të cilin e akuzon për krijimin e krizave të njëpasnjëshme politike, keqqeverisje dhe probleme ekonomike.
PDK-ja vlerëson se, në përputhje me Kushtetutën, vendi hyn tani në një proces të ri zgjedhor. Në këtë drejtim, ajo i ka bërë thirrje ushtrueses së detyrës së presidentes, Albulena Haxhiu, që të caktojë datën e zgjedhjeve brenda afateve kushtetuese, duke siguruar një proces të rregullt, të lirë dhe demokratik.
Po ashtu, kjo parti u ka bërë thirrje qytetarëve të Kosovës që të përgatiten për zgjedhje dhe përmes votës së tyre të refuzojnë, siç thuhet, përçarjen dhe bllokadat institucionale.
Në reagimin e saj, PDK-ja thekson se vendi ka nevojë për një drejtim të ri, stabilitet politik dhe institucione funksionale, duke kërkuar një qeverisje që respekton Kushtetutën. Sipas saj, pas zhvillimeve të fundit, vendimmarrja kalon tek qytetarët përmes procesit zgjedhor.
Murati: Shkuarja e sërishme në zgjedhje ka kosto shumë të madhe
Photo: Driton Paçarada
Ministri i Financave, Hekuran Murati, ka thënë se shkuarja në zgjedhje të jashtëzakonshme, pos që ka kosto së paku 10 mln euro, do të shkaktojë edhe humbje të fondeve nga Plani i Rritjes i Bashkimit Evropian.
“Për shkak të bojkotit, vendi po detyrohet të shkojë sërish në zgjedhje. Do të ketë kosto shtesë së paku 10 milionë euro për zgjedhje të reja, e do të ketë kosto shumë më të madhe shtesë, si pasojë e mosfunksionimit të Kuvendit e mosmiratimit të reformave të parapara me Planin e Rritjes...Miratimi i planit të rritjes nga Kuvendi ishte vetëm hapi i parë. Por, ato fonde prej 882 milionë euro janë të gjitha të lidhura me reforma të caktuara, e të cilat nëse nuk miratohen, një pjesë e tyre kanë afat skadence deri në qershor”, tha Murati në seancën në Kuvend.
Ai ka thënë se nëse nuk ka Kuvend në maj e qershor do të humben dhjetëra miliona nga Plani i Rritjes.
“Kush e paguan këtë, e paguajnë qytetarët”, tha Murati.
Murati ka akuzuar deputetët e opozitës, duke thënë se dy ditë më parë në seancë penguan rishikimin e buxhetit.
Kurti: Mbështetja për ne vetëm sa do të rritet
Photo: Driton Paçarada
Kryeministri i Kosovës, Albin Kurti, në seancën e orës 23:00 në përpjekje për të zgjedhur presidentin apo presidenten e re, ka thënë se opozita është ajo e cila nuk po e respekton vullnetin e qytetarëve dhe vendin po çojnë në zgjedhje të reja.
Kurti ka thënë se opozita e di se zgjedhjet nuk janë zgjidhje. Ai u shpreh optimist se mbështetja e qytetarëve për Lëvizjen Vetëvendosje vetëm sa do të rritet.
“Ata janë të vetëdijshëm që zgjedhjet nuk janë zgjidhje. Ata nuk duan përgjegjësi, nuk duan pushtet por dëshirojnë që këtë të mos e kemi as ne. Veçse për këtë nuk vendosin ata por populli i Kosovës i cili gjithmonë e më shumë na ka mbështetur neve në përputhje me realizimin e zotimeve tona dhe përmirësimin e situatës së tij edhe në aspektin socio-ekonomik edhe në atë të sigurisë. Pas një qeverisje 5-vjeçare është rritur mbështetja për neve. Çdo herë kështu do të jetë. Ne do të jemi afër popullit t’i shërbejmë me aq sa dijmë e mundemi dhe mbështetja për ne vetëm sa do të rritet", ka thënë Kurti.
Opozita nuk mori pjesë as në këtë seancë.
Gjendet një mjet i dyshuar si tymuese afër Kuvendit, Policia vendos shirita
FOTO: KOHA
Një mjet i dyshuar si tymuese është gjetur afër objektit ku është edhe Kuvendi i Kosovës, e ku po mbahej seanca për zgjedhjen e presidentit.
Sipas pamjeve të siguruara nga KOHA, Policia ka vendosur shirita në vendin ku është gjetur mjeti.
KOHA ka kontaktuar me Policinë për të mësuar më shumë. Sapo të ketë përgjigje, artikulli do të përditësohet.
Haxhiu: Kjo rrugë e nisur mbarë nuk meritonte të ndërpritej
Photo: Driton Paçarada
Kryetarja e Kuvendit, Albulena Haxhiu, në nisjen e seancës së orës 23:00 për zgjedhjen e presidentit ka thënë se edhe në minutat e fundit po presin nëse deputetët e opozitës do të hyjnë në sallë.
“Po presim nëse deputetët e opozitës do të vijnë, t’i lënë anash barrikadimet. Kjo është arsyeja pse në vazhdimësi kam bërë thirrje që deputetët e opozitës të vijnë këtu. Janë minutat e fundit të kësaj legjislature. Kjo rrugë e nisur mbarë nuk meritonte të ndërpritej”, ka thënë Haxhiu.
Kanë mbetur edhe pak minuta para se vendi të shkojë sërish në zgjedhje.
Tahiri: Në këtë situatë jemi si rezultat i dramave të prodhuara nga Kurti
Arian Tahiri i Partisë Demokratike të Kosovës në konferencë për media ka thënë se kryeministri Albin Kurti është “njeri që prodhon vetëm drama”.
“Rezultat i dramave të tij jemi këtu sonte, jemi pa president. Edhe jemi të cenuar me pas tendencë me u thyer rendi kushtetues”, ka thënë Tahiri.
Ai ka thënë se PDK-së i ishte thënë nga Kurti të propozonte një kandidat dhe Lëvizja Vetëvendosje do ta propozonte një tjetër, e të shkohej në garë.
“Por i dimë numrat e deputetëve në Kuvend, 66 i kanë ata e ne 22. Epilogu dihet paraprakisht. Ishte tërësisht joserioze. I kemi thënë përgjigjemi pozitivisht kur e formalizojmë marrëveshjen”, tha Tahiri. “...Pasi s’u formalizua marrëveshja, që ne të propozojmë kandidatin e kundërkandidatin, i kemi uruar suksese në zgjedhjen e presidentit me partitë tjera”.
Berisha: Po të bëhet opozita bashkë, atëherë do të zgjidheshin krejt problemet
Shefi i Grupit Parlamentar të AAK-së, Besnik Tahiri, në konferencë për media ka thënë se partia e tij s’do të bëhet pjesë e “një shkatërrimi të rendit kushtetues, spektakli politik e publik që po zgjat tash e 4 muaj”.
“S’bëhemi pjesë e një proces që veç emrin demokraci e zgjedhje presidentit nuk e ka. Emrin e ka manipulim politik i opinionit publik. Nuk duam të jemi pjesë e krejt e këtij komploti që po i bëhet shtetit në asnjë rrethanë e asnjë moment”, tha Tahiri.
E Bekë Berisha ka thënë se AAK-ja po të kishte rol më tepër do ta zgjidhte çështjen për 15 minuta.
Berisha ka thënë se po të bashkohej opozita “atëherë do të zgjidheshin krejt problemet”. Ai ka thënë se kryeministri Albin Kurti është vetëm duke përçarë.
“Nëse e ndërpresim këtë përçarje të këtij njeriu, atëherë do të ecë përpara Kosova, do të zhvillohet e do të arrijmë të gjitha aspiratat”, tha Berisha.
Berisha tha se kjo parti e ka pasur kandidatin e saj për president, që ka qenë kryetarit i Aleancës, Ramush Haradinaj, mirëpo që i njëjti, sipas tij, nuk është përkrahur as nga LVV-ja dhe as nga PDK e LDK.
“Ne qysh në fillim i kemi ofruar një kandidat, mirëpo nuk kemi pasur mbështetje as prej këtyre që janë në qeveri dhe as prej këtyre që janë në opozitë. Kemi pasur një kandidaturë serioze për me zgjidh këtë problem”, tha ai.
Lushaku: Oferta e Kurtit ishte për t’ia mundësuar kandidates së VV-së të zgjidhet presidente
Photo: Driton Paçarada
Shefja e Grupit Parlamentar të LDK-së, Jehona Lushaku-Sadriu, ka thënë se oferta e fundit e kryeministrit Albin Kurtit do t’ia mundësonte kandidates së VV-së, Feride Rushiti, të zgjidhet presidente.
Minuta më herët, Kurti deklaroi se është i gatshëm t’i japë edhe 15 nënshkrime LDK-së nëse propozon çfarëdo kandidati dhe të ketë një garë mes Feride Rushitit dhe një kandidat të LDK-së.
Por Lushaku-Sadriu ka thënë se atë që nuk ia ka dhënë populli Kurtit, nuk mund të ia japin ata.
“Ftesa ishte për ta bërë një kandidate të dytë dhe për t’ia mundësuar kandidates së VV-së me u zgjedh presidente. Çka jemi t’u bo na? Me ja dhanë votat një kryeministri për me e kap krejt shtetin, nuk ia ka dhënë populli. Nuk mundemi ne me ia dhanë”, ka thënë ajo.
Lushaku: Oferta e Kurtit ishte për t’ia mundësuar kandidates së VV-së të zgjidhet presidente
Çitaku: Kurti kërkon kundërkandidat sa për t’ia siguruar kuorumin
Foto: Arkiv
Photo: Driton Paçarada
Nënkryetarja e Kuvendit të Kosovës nga radhët e Partisë Demokratike të Kosovës, Vlora Çitaku, ka reaguar pas konferencës për media të kryeministrit Albin Kurti ku kërkoi nga Lidhja Demokratike e Kosovës t’i sjellë 15 nënshkrimet për kandidatin e tyre për president.
Çitaku ne reagimin e saj ka thënë se Kurti që nga fillimi ka kërkuar kundërkandidat vetëm sa për t’ia siguruar kuorumin për të përzgjedhurin e tij për pozitën e presidentit.
“Pra, atë që e kemi thënë nga fillimi, doli e vërtetë: Kurti nuk ka kërkuar asnjëherë kandidatë për President nga opozita. Ai ka kërkuar kundërkandidat për të përzgjedhurin/përzgjedhurën e tij, vetëm sa për ta siguruar kuorumin. Kaq e thjeshtë. E tha vetë”, ka thënë Çitaku në reagimin e saj.
Kurti: I ofrojmë LDK-së edhe 15 nënshkrime për kandidatin e tyre, Hoxha u dakordua të tërhiqet
Photo: Driton Paçarada
Kryeministri Albin Kurti ka thënë se janë të gatshëm t’i ofrojnë LDK-së edhe 15 nënshkrime për cilindo kandidat që ata ofrojnë. Kurti ka thënë se ka folur edhe me Hatixhe Hoxhën, e cila është shprehur e gatshme ta tërheqë kandidaturën në rast se LDK-ja propozon kandidat.
Sipas Kurtit, do të kishim një përballje mes një kandidate të shoqërisë civile (Feride Rushiti) dhe një kandidat/e të LDK-së.
“Kam biseduar me të (Hatixhe Hoxhën v.j.). Ajo është dakorduar të tërhiqet nga kandidatura nëse LDK-ja i sjell 15 nënshkrime për kandidaten e saj kushdo që është. LVV-ja i jep edhe 15 nënshkrime dhe në këtë mënyrë do ta kishim një kandidat nga shoqëria civile dhe një kandidat nga LDK-ja dhe sonte le ta zgjedhim presidenten/in e Kosovës. Këtu jam, në zyrën e LVV-së këtu te Kuvendi, këtu mund të më gjejë LDK-ja dhe të m’i sjellë 15 nënshkrimet. Edhe nëse i kanë vetëm 13 a 14 nënshkrime, ne i plotësojmë, nuk e këqyrim për pak. S’kemi asnjë problem me cilindo kandidat që e sjell LDK-ja”, ka thënë Kurti.
Shtyhet për 23:00 seanca për presidentin
Photo: Driton Paçarada
Kryetarja e Kuvendit, Albulena Haxhiu, ka shtyrë edhe një herë seancën për presidentin.
Seanca është shtyrë për në orën 23:00, në përpjekjen e fundit për t’i dhënë vendit president ose shkuarje në zgjedhje të reja.
Rinis seanca për zgjedhjen e presidentit, Haxhiu i bën thirrje opozitës të vijë në sallë
Photo: Driton Paçarada
Ka rinisur seanca për zgjedhjen e presidentit, derisa në fjalimin hyrës kryetarja e Kuvendit, Albulena Haxhiu, edhe një herë i ka bërë thirrje deputetëve të opozitës të vijnë në sallë.
Haxhiu ka këmbëngulur se Gjykata Kushtetuese ka konstatuar se të gjithë deputetët duhet të jenë të pranishëm në seanca plenare.
Abdixhiku: Kurti do kuorum për ta zgjedhur presidentin karate - Osmanin do ta zgjedhë populli
Photo: Driton Paçarada
Kryetari i LDK-së, Lumir Abdixhiku, ka ripërsëritur qëndrimin se deputetët e partisë së tij nuk do të marrin pjesë në seancën për zgjedhjen e presidentit, teksa ka thënë se aktgjykimi i Gjykatës Kushtetuese e thotë qartë se deputeti e përcakton vetë nëse merr apo jo pjesë në seancë.
Ai ka thënë se LDK-ja i ka ofruar 15 nënshkrimet dhe propozimin për kandidat, por se sipas tij kryeministri Albin Kurti s’ka qenë i interesuar.
“Nënshkrimet nuk dorëzohen te LVV-ja sepse LVV nuk është subjekt ku duhet t’i dorëzosh, as Nagavci nuk është autoritet. Këto janë çështje të marrëveshjeve politike, siç jemi ulur gjithmonë të bisedojmë kemi mundur të flasim për një emër. Çka po kuptoj është e qartë që Kurti do një kundërkandidat për njërën prej kandidatëve të vet, do kuorum që të zgjedhë presidentin karate. Ne i kemi 15 nënshkrime për kandidatin e LDK. Është propozuar kandidati, duhet të merresh vesh me palën tjetër se cili është kandidat. Ai duhet të na tregoj a i ka pasur votat për Vjosa Osmanin. Sa e kuptova ai tha kam vota për ta bërë kundërkandidate Vjosën të Ferides. Këto rrethana ai kërkon kundërkandidat. Jemi në orët e fundit. Po shkojmë në situatë të zgjedhjeve të reja”, ka thënë ai.
Abdixhiku ka shtuar se Kurti nuk do rikandidimin e Vjosa Osmanit, teksa ka thënë se populli do ta zgjedhë pavarësisht atij.
“Ndjej keqardhje që Kurti nuk ka arritur as minimalisht të shpreh gatishmëri për një konsensus për një emër që e konsideroj dhe e vlerësoj shumë, ai siç duket nuk e vlerëson. Çka nuk kuptoj, pse po i pengon kaq shumë Vjosa Osmani Kurtit? Ndoshta Kurti nuk don ta zgjedhë, por jam i bindur se populli do ta zgjedhë”.
Ai ka kritikuar tutje Vetëvendosjen pasi sipas Abdixhikut synimi i saj janë zgjedhjet.
“Konsiderojmë se është kosto shumë e madhe me fatin e Republikës të luhet kaq shumë për një datë të zgjedhjeve. Shteti nuk është hajgare dhe një parti do duhej të sillej me kujdes të jashtëzakonshëm ndaj normave kushtetuese por këta janë të njohur për t’i shkelur ato”.
Bajqinovci: Presidenti do të zgjidhet
Deputeti i Lëvizjes Vetëvendosje, Mefail Bajqinovci, është shprehur optimist se presidenti do të zgjidhet sonte.
Para hyrjes në seancë, Bajqinovci ka thënë shkurt se “presidenti do të zgjidhet”, por nuk ka specifikuar detaje të tjera.
Kuvendi ka kohë deri në orën 00:00 për të zgjedhur presidentin. Ndryshe, shkohet në zgjedhje.
Lushaku: Kurti nuk po e do Vjosa Osmanin dhe as kompromisin me LDK-në
Photo: Driton Paçarada
Shefja e grupit parlamentar të LDK-së, Jehona Lushaku, i ka reaguar kryeministrit Albin Kurti pasi ky i fundit gjatë një konference për media i kërkoi LDK-së ta sjellë te shefja e grupit të LVV-së emrin e propozuar për kandidat për president.
Kurti ka thënë se LDK-ja asnjëherë nuk ia ka dërguar ndonjë propozim për president në takimet që liderët e partive kishin mbajtur lidhur me presidentin e ri. Njëjtë u përgjigj edhe kur u pyet për mundësinë e rikandidimit të Vjosa Osmanit.
E, Lushaku ka thënë se Kurti po e shkakton një krizë dhe se po e dërgon vendin në zgjedhje, teksa ka listuar tri, siç i ka quajtur ajo, “të vërteta” për Kurtin.
“Albini Kurti nuk po e don Vjosa Osmanin Presidente. Albini Kurti nuk po don kompromis me LDK-në. Albini Kurti deshti me e përmbys rendin kushtetues. Kaq e thjeshtë është. Kjo në fakt nuk është krizë politike. Është krizë e një njeriu që s’pranon rend e ligj! Ky njeri, fatkeqësisht po na dërgon sërish në zgjedhje”, ka shkruar Lushaku.
PDK-ja paralajmëron reagim politik e qytetar nëse zgjidhet presidenti ndesh me Kushtetutën
Partia Demokratike e Kosovës, pas mbledhjes së kryesisë së partisë, ka njoftuar se ka mbledhur edhe kryetarët e degëve të saj.
PDK-ja në njoftimin për media thotë se nëse sonte procedohet me zgjedhjen e presidentit, do të ketë reagim të organizuar politik, institucional dhe qytetar.
“PDK rithekson se do të kundërshtojë çdo veprim të pushtetit që bie ndesh me Kushtetutën dhe rendin juridik, duke u angazhuar në të gjitha format demokratike dhe institucionale për mbrojtjen e tyre. Nëse sonte procedohet me këtë zgjedhje antikushtetuese, do të ketë reagim të organizuar politik, institucional dhe qytetar”, citohet të ketë thënë kryetari i partisë Bedri Hamza.
Çitaku – Kurtit: Nëse ka njeri që s’e njeh rezultatin zgjedhor je ti, 51% s’janë 100%
Foto: Arkiv
Photo: Driton Paçarada
Nënkryetarja e PDK-së, Vlora Çitaku, i ka reaguar kryeministrit Albin Kurti pasi ky i fundit në një konferencë për media ka thënë se sjelljet e opozitës lidhur me zgjedhjen e presidentit janë joshtetërore dhe anti-institucionale, teksa i ka akuzuar për bllokim institucional.
E Çitaku ka thënë se Kurti nuk e njeh bashkëpunimin, por se kërkon nënshtrim të subjekteve të tjera.
“Albin, Nëse ka një njeri që nuk e njeh rezultatin zgjedhor në Kosovë, ai je ti. Falë atij rezultati, ti e udhëheq Qeverinë dhe Kuvendin. Po 51% nuk janë 100%. Kush është shtetar, institucionalist dhe respekton Kushtetutën, nuk dëshmohet vetëm nga e kaluara e largët, por mbi të gjitha nga veprimet e sotme. Si opozitë, pa asnjë kusht, kemi votuar zgjatjet buxhetore dhe marrëveshjet ndërkombëtare, përfshirë edhe dje, madje edhe me procedurë të përshpejtuar. Ti, Albin, nuk e njeh bashkëpunimin, as kompromisin. Ti kërkon nënshtrim. Dhe PDK nuk nënshtrohet”, ka shkruar ajo.
Çitaku ka akuzuar tutje Kurtin për përmbysje të rendit kushtetues me nisjen e procesit të zgjedhjes së presidentit të ri pa qenë të pranishëm 80 deputetë në sallën e Kuvendit.
“Si shkelës serik i Kushtetutës, nuk e ke problem ta përmbysësh edhe rendin Kushtetues. Por këtë nuk do ta lejojmë”.
Kurti: LDK-ja duhet ta sjellë te ne listën me nënshkrime dhe të tregojë për kë e ka fjalën
Foto: Arkiv
Kryeministri Kosovës, Albin Kurti, ka komentuar listën e paraqitur mbrëmë nga ana e Lidhjes Demokratike të Kosovës me nënshkrimet e deputetëve të kësaj partie. Kurti kërkoi që LDK-ja ta sjellë listën në mënyrë insitucionale te shefja e grupit parlamentar e Lëvizjes Vetëvendosje dhe të tregojë për kë e ka fjalën.
Kurti potencoi se nëse LDK-ja e sjellë atë listë, do të kërkoj nga kandidatja për presidente Hatixhe Hoxha të tërhiqet dhe kandidati apo kandidatja e LDK-së të hyjë në garë me kandidaten Feride Rushiti.
“Ne me mirësinë dhe kënaqësinë më të madhe do t’i pranonim. Po ta kishim të qartë emrin e LDK-së për kë, ne do ta takonim kandidaten Hatixhe Hoxhën dhe do t’i kërkonim të tërhiqet dhe ta kemi Feride Rushitin me një kandidat tjetër. Neve duhet të na i sjellin ato nënshkrime dhe duhet të jetë e qartë për kë e kanë fjalën. Ajo listë tregon që ata janë bashkë por për kë dhe për çka janë bashkë ne nuk e dimë. Duhet të tregojnë për kë janë bashkë dhe i pranoj edhe unë ashtu bashkë. Le të na e sjellin kandidatin, unë i kërkoj Hatixhe Hoxhës të tërhiqet dhe shkojmë në garë, sonte Kosova bëhet me president apo presidente të re, varet kush fiton”, ka deklaruar Kurti në konferencën për media.
Kurti ka deklaruar po ashtu se kryetari i LDK-së, Lumir Abdixhiku, asnjëherë nuk ia ka sjellë asnjë propozim për president në takimet që i kanë zhvilluar për këtë çështje.
“Ju jeni dëshmitar që Abdixhikun e kam takuar disa herë nuk ka pasur asnjëherë asnjë propozim. Unë propozime, ai refuzime. Sa i përket paraqitjes së djeshme në orët e vona të natës, ata dolën pas seancës ndërsa gjatë seancës nuk pati asnjë propozim. Letra me 15 nënshkrime mund t’i ofrohej LVV-së në mënyrë institucionale. Ose te shefja e grupit parlamentar ose te unë si kryetar i subjektit politik. Sepse në orën 23:00 të natës pasi u ndërpre seanca dolën me një listë ku ishin emrat e tyre. Ata emra duhet të m’i japin mua jo juve të nderuar gazetar”, deklaroi Kurti.
Kurti: Sjelljet e opozitës janë joshtetërore dhe anti-institucionale
Photo: Driton Paçarada
Kryeministri Albin Kurti ka deklaruar se sjelljet e opozitës në Kosovë janë joshtetërore dhe anti-institucionale, duke i akuzuar ato për bllokim të qëllimshëm të funksionimit të institucioneve.
Ai ka vlerësuar se opozita nuk ka synim tjetër përveç pengimit të qeverisjes, duke theksuar se veprimet e saj përbëjnë mosnjohje të rezultatit zgjedhor dhe të vullnetit qytetar të shprehur në zgjedhjet e 28 dhjetorit. Sipas tij, bojkotimi i seancave plenare është dëshmi e qartë e kësaj qasjeje bllokuese.
“Dëshmi për bllokadën është edhe një fakt tjetër: për ta kundërshtuar pakon ekonomike për qytetarët, përkatësisht përballjen me inflacionin, u mobilizuan të gjithë, përfshirë edhe Listën Serbe, kurse për president nuk po vijnë as në sallë. Kosovës nuk i duhen bllokada si ato të 10 muajve të vitit të shkuar. Me besim të plotë se nuk ka nevojë për zgjedhje të reja, vendit do t’ia humbnim edhe 10 milionë vetëm për organizimin e zgjedhjeve, pa i përmendur dhjetëra miliona euro nga marrëveshjet e tjera. Ne i kemi bërë të gjitha përpjekjet që të mos shkojmë në zgjedhje të përsëritura e të panevojshme”, ka thënë Kurti në konferencë për shtyp të martën pasdite.
Kurti ka përmendur se opozita është mobilizuar për të kundërshtuar pakon ekonomike për qytetarët dhe masat për përballimin e inflacionit, ndërsa nuk po merr pjesë në proceset e rëndësishme institucionale, siç është zgjedhja e presidentit. Ai ka theksuar se vendi nuk ka nevojë për bllokada si ato të vitit të kaluar dhe se zgjedhjet e reja do t’i kushtonin buxhetit rreth 10 milionë euro, pa përfshirë dëmet e tjera financiare.
Kryeministri ka thënë se ka bërë disa përpjekje për arritjen e një konsensusi, duke ftuar në takim krerët e partive opozitare, por sipas tij, nuk ka pasur asnjë propozim nga ana e tyre.
“U përpoqëm për kandidat konsensual; i ftova disa herë në takim kryetarët e PDK-së dhe LDK-së. Ndonëse nuk ofruan asnjë propozim, unë vazhdimisht kam ofruar ide, por morëm veçse refuzim. Ne propozime, ata refuzime. Dje ftuam debat parlamentar. Filluan të refuzojnë edhe takimet me mua, prandaj ftuam debat parlamentar; as aty nuk erdhën. Edhe një hap u bë mbrëmë, por asgjë nga opozita. Sërish refuzime”, shtoi ai.
Në këtë kontekst, Kurti ka përmendur edhe propozimin e kandidatëve konsensualë, duke theksuar se figura si Feride Rushiti më parë është vlerësuar publikisht nga përfaqësues të opozitës, ndërsa tani, sipas tij, mungon gatishmëria për ta mbështetur në Kuvend.
“Propozuam edhe kandidatë konsensualë. Feride Rushiti, kur nderohej me çmime prestigjioze, shumë deputetë opozitarë mburreshin me postime në rrjetet sociale për të—postime si ajo e deputetes së LDK-së, Hykmete Bajrami, apo ajo e PDK-së, Vlora Çitaku. Si është e mundur që, pas gjithë atyre vargjeve vlerësuese, sot nuk e marrin mundin të vijnë në sallë, teksa struken në zyrat e grupeve parlamentare, madje duke dërguar kërcënime për një grua që gjithë jetën ia ka kushtuar mbrojtjes së viktimave”, ka deklaruar Kurti.
Ai ka falënderuar Rushitin për gatishmërinë për të kontribuar në tejkalimin e krizës, por ka shprehur skepticizëm për mundësinë e zgjidhjes, duke kritikuar qasjen e subjekteve opozitare dhe liderëve të tyre.
“E falënderoj Rushitin për gatishmërinë për ta nxjerrë vendin nga kjo krizë. Por kjo duket e pamundur me subjekte politike dhe liderë partish që e kanë humbur arsyen, që kanë vendosur inat jo vetëm me ne, por edhe me popullin e Kosovës, që nuk po i voton më shumë e po i voton gjithnjë e më pak”, shtoi ai.
Në fund, Kurti i ka bërë thirrje opozitës që të jetë në Kuvend në seancën e orës 19:00, duke theksuar se institucionet nuk mund të funksionojnë përmes bojkotit dhe bllokadave.
PDK mbledh kryesinë: Po rrezikohet rendi kushtetues
Partia Demokratike e Kosovës, ka mbledhur kryesinë e partisë me ç’rast deklaruan se po rrezikohet rendi kushtetues.
Në një njoftim për media PDK-ja ka thënë se përpjekja për zgjedhjen e presidentit në mënyrë të njëanshme është shkelje flagrante e Kushtetutës së Kosovës.
“Në përfundim, Partia Demokratike e Kosovës zotohet se do të ndërmarrë të gjitha veprimet e nevojshme politike dhe institucionale për mbrojtjen e Kushtetutës, rendit demokratik dhe të ardhmes së vendit, duke ftuar njëkohësisht qytetarët të jenë vigjilentë dhe aktivë në mbrojtje të shtetit të së drejtës”, thuhet në njoftimin për media të PDK-së.
Vazhdon drama, seanca shtyhet sërish
Photo: Driton Paçarada
Kryeparlamentarja Albulena Haxhiu ka shtyrë edhe një herë seancën për zgjedhjen e presidentit, në mungesë të kuorumit.
Haxhiu ka njoftuar se vazhdimi i seancës do të mbahet prej orës 19:00.
“Për shkak të mungesës së opozitës, dhe gjithnjë duke u përpjekur që t’i kemi ata në seancën për zgjedhjen e presidentit dhe për shkak të obligimeve... Ju njoftoj që kjo seancë vazhdon sot në orën 19:00”, ka thënë ajo.
Edhe AAK-ja bën thirrje që Rushiti të tërhiqet nga gara për president
Shefi i grupit parlamentar të AAK-së, Besnik Tahiri, ka thënë se seanca për zgjedhjen e presidentit, ashtu siç ka nisur pa 80 deputetë të pranishëm, as nuk mund të vazhdojë tutje. Ka theksuar se në këtë mënyrë po cenohet rendi kushtetues.
Tahiri ka shtuar se Feride Rushiti duhet të tërhiqet nga gara për presidentin.
“Seanca e dytë as nuk duhet të mbahet dhe as të nisë sepse kjo seancë përfaqëson një vazhdim të sulmit ndaj institucionit më të lartë të Kosovës. Nuk do lejojmë të rrezikohet dhe dëmtohet më tej rendi kushtetues... Kurti foli për tre emra por ai as nuk u konsultua me partitë që i thirri po në mënyra arbitrare i solli në Kuvend dy emra therë. Kjo qasje vetëm unifikuese nuk është... Propozimi ynë është që Feride Rushiti të tërhiqet nga kandidatura sepse po bëhet pjesë e një procesi të montuar politik”, ka thënë Tahiri.
Një ditë më parë Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën. Rushiti mori 63 vota në rundin e parë, ndërsa Hoxha asnjë votë.
Partitë opozitare që bojkotuan mbledhjen, kritikuan pushtetin që ka nisur seancën pa praninë e 80 deputetëve, duke e cilësuar si shkelje kushtetuese.
Haxhiu ripërsërit thirrjet për prani të opozitës në sallë
Photo: Driton Paçarada
Kryetarja e Kuvendit të Kosovës, Albulena Haxhiu edhe në vazhdimin e seancës i ka thirrur deputetët e opozitës që të jenë prezent në seancën plenare për zgjedhjen e presidentit.
Haxhiu ka thënë se sipas vlerësimit që ka bërë Gjykata kushtetuese deputetët janë të zgjedhur të popullit dhe duhet të ushtrojnë funksionin e tyre në interesin më të mirë të Kosovës.
Sipas saj është obligim kushtetues i secilit deputet që të jetë në seancë.
Ajo i ka ftuar në seancë deputetët me emra të përveçëm, duke thënë se arsye për mungesë ka marrë vetëm nga deputetja e Vetëvendosjes Afërdita Hajrizi.
“Edhe njëherë i ftoj deputetët, i lus ata të jenë të pranishëm në këtë seancë. Në vend që të bëjmë presion për kandidatet që të tërhiqen nga gara i ftoj ata që të vijnë, e jo të flasin nga ambiente të tjera. Ky është vendi ku flasim e argumentojmë”, ka theksuar Haxhiu.
Hamza: Sot jemi përballë një akti të rrezikshëm për të ardhmen e shtetit
Kryetari i PDK-së, Bedri Hamza, e ka quajtur akt të rrezikshëm nisjen e procesit të zgjedhjes së presidentit të ri pa qenë 80 deputetë në sallë.
Ai ka thënë se kjo po bëhet njëanshëm dhe me shkelje flagrante të Kushtetutës. Siç ka theksuar ai, përpjekja për zgjedhjen e presidentit në këtë mënyrë minon rendin demokratik.
“Sot jemi përballë një akti të rrezikshëm për të ardhmen e shtetit tonë. Përpjekja për zgjedhjen e Presidentit në mënyrë të njëanshme dhe me shkelje flagrante të Kushtetutës është sulm ndaj shtetit të së drejtës, që minon rendin tonë demokratik. Partia Demokratike e Kosovës e kundërshton çdo tendencë politike për t’i shpërfillur procedurat kushtetuese. Ne nuk do të lejojmë që një subjekt politik ta shfrytëzojë pushtetin për të injoruar vullnetin e qytetarëve dhe për t’i dobësuar institucionet legjitime të vendit tonë”, ka shkruar Hamza.
Hamza ka shtuar se nisja e këtij procesi pa shumicë parlamentare rrezikon ta çojë vendin drejt “një anarkie politike” dhe ta destabilizojë vendin.
“Kosova është ndërtuar mbi vlerat e lirisë, drejtësisë e barazisë dhe nuk do të lejojmë që këto vlera të cenohen përmes abuzimit me pushtetin apo shkeljes së Kushtetutës”, ka shtuar Hamza duke u bërë thirrje qytetarëve për vëmendje që “të mos lejojnë shkelje”.
PDK-ja i bën thirrje Rushitit të tërhiqet nga gara për presidentin
Photo: Driton Paçarada
Partia Demokratike e Kosovës i ka bërë thirrje Feride Rushiti, të tërhiqet nga kandidatura për presidente. Nënkryetarja e kësaj partie, Vlora Çitaku, ka thënë se Rushiti do t’i bënte nder shtetit dhe vetes po që se largohet nga kandidimi.
Në një konferencë për media para vazhdimit të seancës për presidentin me fillim prej orës 14:00, Çitaku akuzoi partinë në pushtet, Lëvizjen Vetëvendosje, dhe kryetarin e saj Albin Kurti për “tejkalim të të gjithë kufijve”.
“Në këtë situatë reagimi opozitar dhe qytetar është detyrim për të mbrojtur rendin kushtetues dhe të ardhmen e vendit tonë Ne si subjekt politik opozitar do t’ i ndërmarrim të gjitha masat e nevojshme për këtë. Sot nga Kuvendi dua të apeloj te partia në pushtet që t’i ndërpresë të gjitha këto veprime karateje të dhunës politike. S’është kuvend i karatesë, por institucion i të zgjedhurve të popullit. Nga zemra i bëj thirrje zonjës Feride Rushiti të tërhiqet nga kjo lojë politike antikushtetuese e Albin Kurtit. E turpshme për shtetin dhe atë vet. Më vjen keq që ka pranuar të huazojë emrin e saj për maskaradë politike”, ka thënë ajo.
Çitaku ka thënë po ashtu se shkelja e qëllimshme e Kushtetutës është rrezik për themelet e shtetit.
“Këtë nuk do ta lejojmë dhe këtë bashkë me qytetarët e Kosovës do ta ndalojmë”, ka thënë ajo.
Kuvendi me fillim prej orës 14:00 pritet të vazhdojë seancën për zgjedhjen e presidentit.
Një ditë më parë Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën. Rushiti mori 63 vota në rundin e parë, ndërsa Hoxha asnjë votë.
Partitë opozitare që bojkotuan mbledhjen, kritikuan pushtetin që ka nisur seancën pa praninë e 80 deputetëve, duke e cilësuar si shkelje kushtetuese.
Bardiqi kërkon falje për "karatenë", e quan sarkazëm
Deputeti i Lëvizjes Vetëvendosje, Naim Bardiqi, ka kërkuar falje për gjuhën e përdorur në një mesazh privat në telefonin e tij gjatë seancës së nisur të hënën për zgjedhjen e presidentit, ku ka përdorur fjalën “karate”.
Ai ka deklaruar se publikimi i mesazheve të tilla përbën cenim të privatësisë, duke theksuar se Kuvendi është vendi i punës së deputetëve dhe komunikimet private nuk duhet të bëhen publike.
Sipas Bardiqit, mesazhi në fjalë është shkruar me sarkazëm dhe nuk ka pasur qëllim ofendues ndaj askujt. Ai ka kërkuar falje nëse përmbajtja e tij është keqinterpretuar.
“Konsideroj se është cenim i privatësisë, Kuvendi është vend i punës për deputetin prandaj mesazhi në privat nuk e konsideroj se janë për t’u publikuar. Ato mesazhe janë me sarkazëm, kërkoj falje nëse ka pasur ndonjë keqkuptim qoftë për LVV-në, qytetarët apo votuesit. S’ka të bëjë me asgjë, asgjë ofenduese. E keni parë që është në thonjëza, me sarkazëm e përdorur e që nënkupton se edhe në mungesë të opozitës, deputetët e mazhorancës do të bëjnë votimin sipas rregullave dhe procedurave”, ka thënë ai.
Ai ka shtuar se bëhej fjalë për një komunikim mes miqsh dhe jo për një qëndrim që cenon seriozitetin e procesit të zgjedhjes së presidentit.
"Po e zgjedhim 'karate'. Pastaj të shohim çfarë thotë Kushtetuesja", ishte mesazhi telefonik i Bardiqit i publikuar në një fotografi dje në media.
VIDEO:
Bajqinovci pasi Haradinaj paralajmëroi protesta: Kush del në rrugë pas oligarkëve politikë
Deputeti i Lëvizjes Vetëvendosje Mefalil Bajqinovci, ka reaguar pasi që kryetari i Aleancës për Ardhmërinë e Kosovës (AAK) paralajmëroi protesta për të kundërshtuar ato që i ka cilësuar shkelje të rënda kushtetuese.
“Po kush del në rrugë pas oligarkëve politikë? Populli ua dha përgjigjen me 51.11% me Albin Kurti. E tash, kur s’kanë votë, kërkojnë zhurmë. Ani kur i sheh kush po bën thirrje, të njëjtit që e shfrytëzuan shtetin, e sot kërkojnë “revolta” për me u kthyer prapë. Por koha e tyre ka kalu, populli nuk del për ta, populli i ka çu në opozitë”, ka shkruar Bajqinovci në një status në Facebook.
Para vazhdimit të seancës për zgjedhjen e presidentit, Haradinaj ka thënë se Kosova ka hyrë në drejtim të rrezikshëm.
Një ditë më herët, Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën. Rushiti mori 63 vota në rundin e parë, ndërsa Hoxha asnjë votë. Partitë opozitare që bojkotuan mbledhjen, kritikuan pushtetin që ka nisur seancën pa praninë e 80 deputetëve, duke e cilësuar si shkelje kushtetuese.
Haradinaj thirrje deputetëve të VV-së: Mos u bëni pjesë e turpit, pasojat do të jenë të përjetshme
Photo: Driton Paçarada
Kryetari i AAK-së, Ramush Haradinaj, ka thënë se kushdo që bëhet pjesë e seancës për zgjedhjen e presidentit të martën do të ketë pasoja të rënda.
Ai ka shtyrjes së seancës nga ora 11:00 në orën 14:00 për shkak të mungesës së opozitës në sallë ka thënë se këtë situatë nuk e ka parë asnjëherë në Kosovë.
Haradinaj u ka bërë thirrje deputetëve të LVV-së që të mos vazhdojnë me seancë.
“Është situatë ndryshe nga të gjitha zhvillimet që kam pa në Kosovë pas pavarësisë. Ata që ushtrojnë funksionet shtetërore dje kanë bë shkelje kushtetuese. Është një drejtim i rrezikshëm dhe u bëjë thirrje të ndalen, të mos vazhdojnë në këtë drejtim. Ruajtja e pushtetit, mbajtja, ardhja në pushtet është e mundshme duke respektuar Kushtetutën, demokracinë, nëse shkojmë në këtë rrugë të rëndësishme po na pamundësojnë funksionet në bazë të Kushtetutës dhe nuk mendojnë rrugë tjetër pos t’i kthehemi popullit. I thërras vetëdijes së të gjithëve të mos bëhen pjesë e shkeljes kushtetuese, këtij turpi. Nëse bëhen pjesë e dhunimit të Kushtetutës, kësaj sjellje të rrezikshme, pasojat do të jenë të përjetshme për të gjithë ata që bëhen pjesë”, ka thënë Haradinaj.
Seanca shtyhet ende pa nisur
Photo: Driton Paçarada
Kryeparlamentarja Albulena Haxhiu ka shtyrë për në orën 14:00 seancën për zgjedhjen e presidentit, akoma pa e nisur atë të paralajmëruarën për në orën 10:00.
Ajo e arsyetoi këtë duke thënë se po i pret deputetët e opozitës, që i ka ftuar të marrin pjesë në seancë. Haxhiu ka thënë se ky është obligim kushtetues.
Nagavci: Nuk jemi njoftuar për nënshkrimet e LDK-së as unë e as Kurti
Photo: Driton Paçarada
Shefja e Grupit Parlamentar të Lëvizjes Vetëvendosje, Arbërie Nagavci, ka thënë se për nënshkrimet e mbledhura nga Lidhja Demorkatike e Kosovës, të cilat i paraqiti mbrëmë kryetari i saj, Lumir Abdixhiku, nuk është njoftuar as kryeministri Albin Kurti, e as ajo si shefe e deputetëve të VV-së.
Në deklarimin e saj para mediave pak minuta para fillimit të seancës, Nagavci ka bërë thirrje të ndalen akuzat mes deputetëve dhe të gjendet zgjidhje për zgjedhjen e presidentit.
“Besoj që Kryetarja e Kuvendit kur të fillojë vazhdimin e seancës do të bëjë edhe një thirrje për opozitën, jemi dëshmitarë që edhe deputetët e opozitës janë shumica prej tyre këtu në Kuvend dhe i ftojmë që të vijnë në sallë dhe të bëhen pjesë e këtij procesi të rëndësishëm për të vazhduar tutje punën duke shmangur edhe një palë zgjedhje të reja. E kemi parë dje edhe kryetarin e LDK-së që prezantoi një listë me nënshkrime ndonëse pa një emër specifik, por e vërteta është që ato nënshkrime nuk i janë njoftuar as kryeministrit Kurti as mua si shefe e GP-së në mënyrë që të bashkëngjisim nënshkrimet e deputetëve tanë... Konsideroj që përtej fajësimit ose hedhjes së akuzave, e rëndësishme është të gjejmë zgjidhjen dhe ta zgjedhim presidentin”, ka thënë ajo.
Nagavci ka vlerësuar se kandidatura e Feride Rushitit do t’i bënte nder të gjithë vendit.
Haxhiu: Deputetët të detyruar të jenë të pranishëm në seancën për presidentin
Photo: Driton Paçarada
Kryeparlamentarja Albulena Haxhiu ka thënë se deputetët janë të detyruar të jenë të pranishëm në seancën për zgjedhjen e presidentit.
Në nisje të seancës, Haxhiu ka thënë se deputetët është dashur të lajmërojnë për arsyet për mospraninë në seancë.
Sipas saj, këtë e ka bërë vetëm deputetja Afërdita Hajrizi e Grupit Parlamentar të VV-së që ka thënë se mungon “për shkaqe shëndetësore”.
Haxhiu ka arsyetuar pretendimin e saj duke thënë se obligimi i deputetëve për të marrë pjesë në seanca të tilla paraqitet në aktgjykime të Kushtetueses.
Deputetët e VV-së në sallë, gati për të nisur seanca
Photo: Driton Paçarada
Deputetët e Lëvizjes Vetëvendosje kanë hyrë në seancën e Kuvendit kur pritet të vazhdojë seanca për zgjedhjen e presidentit.
Në sallë janë futur edhe kryeministrit Albin Kurti e ministrat e kabinetit qeveritar.
Një ditë më herët, Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën. Rushiti mori 63 vota në rundin e parë, ndërsa Hoxha asnjë votë. Partitë opozitare që bojkotuan mbledhjen, kritikuan pushtetin që ka nisur seancën pa praninë e 80 deputetëve, duke e cilësuar si shkelje kushtetuese.
Haradinaj paralajmëron protesta
Photo: Driton Paçarada
Kryetari i Aleancës për Ardhmërinë e Kosovës, Ramush Haradinaj, ka paralajmëruar edhe protesta për të kundërshtuar ato që i ka cilësuar shkelje të rënda kushtetuese.
Para vazhdimit të seancës për zgjedhjen e presidentit, Haradinaj ka thënë se Kosova ka hyrë në drejtim të rrezikshëm.
Një ditë më herët, Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën. Rushiti mori 63 vota në rundin e parë, ndërsa Hoxha asnjë votë. Partitë opozitare që bojkotuan mbledhjen, kritikuan pushtetin që ka nisur seancën pa praninë e 80 deputetëve, duke e cilësuar si shkelje kushtetuese.
“Votimi pa 2/3, ashtu siç e parasheh Kushtetua, është shkelje e rëndë, drejtim i gabuar, drejtim i rrezikshëm që ka marrë vendi. Unë edhe një herë i bëj thirrje u.d. të presidentes, kryetares së Kuvendit, kryetarit të Qeverisë që të ndalen, të mos vazhdojnë në këtë drejtim të rrezikshëm. Nëse shkojnë në këtë rrugë, nuk na lënë rrugë tjetër pos që të vihemi në mbrojtje të Kushtetutës”, ka thënë kryetari i AAK-së. “Kjo është një situatë shumë ndryshe. Kushtetuta mund të mbrohet tani vetëm nga sovrani, ai i zgjedh mënyrat e veta, të protestave, e mënyra të tjera”.
Kurti: Ne i bëjmë përpjekjet maksimale, ta shohim a vjen opozita
Photo: Driton Paçarada
Kryeministri Albin Kurti, ka thënë se do të bëjnë përpjekje maksimale për ta zgjedhur presidentin.
Tek ka hyrë në Kuvend, Kurti ka theksuar se po presin nëse deputetët e opozitës do të shkojnë në seancë.
“Ne i bëjmë përpjekjet maksimale, tash ta shohim a do të vinë deputetët e opozitës që e kanë obligim kushtetues të përfaqësojnë popullin, të marrin pjesë në votim”, është shprehur shkurt Kurti.
Ai nuk është përgjigjur kur është pyetur nëse do ta përkrahin Vjosa Osmanin për presidente.
Kutia e votimit gati
Photo: Driton Paçarada
Kuvendi është bërë gati për vazhdimin e votimit për zgjedhjen e presidentit. Në sallën e seancave është bërë gati kutia për fletëvotimet, siç ka raportuar fotoreporteri i KOHËS Driton Paçarada.
Një ditë më herët, Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën.
Rushiti mori 63 vota në rundin e parë, ndërsa Hoxha asnjë votë. Partitë opozitare që bojkotuan mbledhjen, kritikuan pushtetin që ka nisur seancën pa praninë e 80 deputetëve, duke e cilësuar si shkelje kushtetuese.
LDK-ja nuk merr pjesë në seancë
Photo: Driton Paçarada
Lidhja Demokratike e Kosovës nuk do të marrë pjesë as sot në seancën e thirrur për presidentin nga Lëvizja Vetëvendosje.
Këtë e ka konfirmuar deputeti i LDK-së, Armend Zemaj.
Ai u përgjigj shkurt për mediat, duke thënë: “Jo, në këtë seancë jo”, tha ai./EO
Ymeri e LDK-së: U testua nëse mund të vendoset Republika e Kurtit – koha e xhaxhit është varrosur
Deputetja e Lidhjes Demokratike të Kosovës, Janina Ymeri, ka akuzuar Lëvizjen Vetëvendosje se me votimin me më pak se 80 vota për president, siç kërkohet nga Kushtetuta për dy raundet e para, u testua “nëse mund të vendoset Republika e Kurtit”.
Në një shkrim në Facebook, ajo ka komentuar mesazhin telefonik të deputetit të VV-së, Naim Bardiqi, “Po e zgjedhim ‘karate’. Pastaj të shohim çfarë thotë Kushtetuesja”.
Sipas saj, ajo që ka ndodhur mbrëmë ka qenë më e rrezikshme.
“Mbramë nuk ka qenë karate, është ofendim për sportin për një fushë të cilën rrufitën premtime e para pa punë. Karate ka rregullat e veta. Mbramë ishte testim, nëse ka mundësi të vendoset Republika e Kurtit e që nëse lejohet, të vendoset sistem paralel partiak për Gjyqësor e për çdo gjë që nuk e ka kap ende kopja e zbehtë e Xhaxhit. Jeni në Republikën e Kosovës edhe koha e xhaxhit është varrosur”, ka shkruar Ymeri në Facebook.
GLPS: Votimi pa kuorum për president, rrezik për rendin demokratik
Photo: Driton Paçarada
Grupi për Studime Juridike dhe Politike (GLPS) e ka cilësuar rrezik për rendin demokratik vazhdimin e votimit për presidentin pa përmbushur kriterin për praninë e 2/3 të të gjithë deputetëve.
Lëvizja Vetëvendosje të hënën e nisi procesin e votimit për dy kandidate edhe pse në sallë ishin më pak se 80 deputetë. Në fund Feride Rushiti i mori 63 vota ndersha Hatixhe Hoxha asnjë. Seanca u ndërpre dhe u paralajmëruar për të vazhduar të martën.
GLPS-ja në një reagim publik ka thënë se kjo seancë u zhvillua në kundërshtim me Kushtetutën dhe një prej proceseve më të rëndësishme shtetërore u kthye në lojë politike.
“Gjykata Kushtetuese, në Aktgjykimet e rasteve Nr. KO 29/11, KO47/16 dhe KO68/26 ka qenë e qartë se për zhvillimin e votimit të Presidentit/es kërkohet prania e 2/3 të të gjithë deputetëve. Çdo procedim përtej kësaj nuk është çështje interpretimi, por shkelje e drejtpërdrejtë e rendit kushtetues. Thënë këtë, përveç se janë ‘nule’ të gjitha veprimet e ndërmarra në seancën e mbrëmshme, GLPS vlerëson se thirrja për vazhdimin e saj sot në të njëjtën formë përbëjnë cenim serioz dhe të papranueshëm të Kushtetutës. Veprimet që injorojnë këtë rregullim nuk mund të justifikohen as me nevojën për funksionalitet institucional, sepse funksionaliteti nuk mund të ndërtohet mbi shkelje të Kushtetutës. GLPS rikujton se Kushtetuta e Republikës së Kosovës nuk lejon interpretime politike të përshtatura sipas interesit të momentit, por imponon detyrime të qarta dhe të padiskutueshme. Çdo tentativë për ta relativizuar këtë kërkesë, qoftë përmes interpretimeve procedurale të zgjeruara apo përmes vazhdimit të seancave pa përmbushjen e këtij kushti, përbën shkelje të drejtpërdrejtë të Kushtetutës. Një qasje e tillë nuk është vetëm e papërgjegjshme por e rrezikshme për rendin demokratik, sepse normalizon shkeljen dhe e vendos vendin në një trajektore ku normat kushtetuese zëvendësohen nga arbitrariteti politik”, thuhet në reagim.
GLPS-ja u ka bërë thirrje deputetëve të ndalin këto veprime.
“Në këtë drejtim, GLPS i bën thirrje deputetëve që të ndalin menjëherë këto veprime të paligjshme dhe të rrezikshme dhe thekson që vazhdimi i kësaj qasjeje përbën veprim të drejtpërdrejtë kundër interesit të qytetarëve të Republikës së Kosovës dhe është abuzim i pastër me mandatin publik. Përgjegjësia për këtë degradim bie plotësisht mbi ata që, me vetëdije, zgjedhin të shkelin Kushtetutën. Personat që shkelin Kushtetutën duhet të mbajnë përgjegjësi të plotë publike dhe institucionale për veprimet e tyre. Shkelja e rendit kushtetues nuk është çështje politike që mund të relativizohet apo të justifikohet sipas rrethanave, por një devijim serioz nga detyrimi themelor ndaj interesit të shtetit dhe qytetarëve”, thuhet në reagim të GLPS-së.
Çka thotë Kushtetuta për zgjedhjen e presidentit
Photo: Driton Paçarada
Të martën është dita e fundit e afatit kushtetues që Kuvendi ta zgjedhë presidentin. Në rast se dështon edhe sot deri në mesnatë, Kosova përballet me zgjedhje të reja parlamentare brenda 45 ditësh.
Të hënën, në votimin e parë morën pjesë më pak se 80 deputetë. Kjo nga opozita dhe organizata të shoqërisë civile u konsiderua si shkelje kushtetuese.
Zgjedhja e presidentit rregullohet me nenin 86 të Kushtetutës së Kosovës.
Neni 86 [Zgjedhja e Presidentit]
1. Presidenti i Republikës së Kosovës zgjedhet nga Kuvendi, me votim të fshehtë.
2. Zgjedhja e Presidentit të Republikës së Kosovës duhet të bëhet jo më vonë se tridhjetë (30) ditë para përfundimit të mandatit të Presidentit aktual.
3. Secili shtetas i Republikës së Kosovës mund të nominohet si kandidatë për President të Republikës së Kosovës, nëse ajo/ai siguron nënshkrimet e të paktën tridhjetë (30) deputetëve të Kuvendit të Kosovës. Deputetët e Kuvendit mund të nënshkruajnë vetëm për një kandidatë për President të Republikës së Kosovës.
4. Zgjedhja e Presidentit bëhet me dy të tretat (2/3) e votave të të gjithë deputetëve të Kuvendit.
5. Nëse asnjëri kandidat nuk merr shumicën prej dy të tretave (2/3) në dy votimet e para, organizohet votimi i tretë në mes të dy kandidatëve të cilët kanë marrë numrin më të lartë të votave në votimin e dytë dhe kandidati që merr shumicën e votave të të gjithë deputetëve, zgjedhet President i Republikës së Kosovës.
6. Nëse në votimin e tretë, asnjëri kandidat nuk zgjidhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda dyzet e pesë (45) ditësh.
Edhe në aktgjykimin e fundit për “vlerësim të kushtetutshmërisë për procedurën për zgjedhjen e Presidentit të Republikës së Kosovës”, Gjykata Kushtetuese ka konstatuar se:
(i) Presidenti i Republikës së Kosovës zgjedhet nga Kuvendi i Kosovës, në përputhje me procedurën e përcaktuar në nenin 86 të Kushtetutës;
(ii) zgjedhja e Presidentit zhvillohet në 3 (tri) raunde të votimit, ku në 2 (dy) raundet e para kërkohen votat e dy të tretave (2/3) të të gjithë deputetëve të Kuvendit, ndërsa në raundin e tretë kërkohet shumica e të gjithë deputetëve të Kuvendit;
(iii) Në mënyrë që 2 (dy) raundet e para të jenë të vlefshme në procedurën për zgjedhjen e Presidentit, kërkohet që të paktën 2/3 (dy të tretat) e të gjithë deputetëve të jenë të pranishëm dhe të votojnë. Ndërsa për raundin e 3-të (tretë) kërkohet të paktën prania dhe votimi i shumicës të të gjithë deputetëve; dhe
(iv) votimi për zgjedhjen e Presidentit zhvillohet me votim të fshehtë.
Çitaku: Për keqardhje që dy gra huazuan emrat në një maskaradë të rrezikshme e antikushtetuese
Foto: Arkiv
Photo: Driton Paçarada
Nënkryetarja e Kuvendit të Kosovës nga radhët e PDK-së, Vlora Çitaku, ka thënë se procedura që u zhvilluar të hënën në mbrëmje për zgjedhjen e presidentit është shkelje e Kushtetutës dhe siç ka thënë ajo, flet për mentalitetin e kryeministrit Albin Kurti.
“Vetë ideja që, me vetëdije, i hyjnë një procesi për të zgjedhur personin që do të udhëheqë institucionin më të lartë në vend, duke shkelur me të dyja këmbët Kushtetutën, flet shumë për mentalitetin e Albin Kurti”, ka shkruar Çitaku në Facebook.
Ajo ka thënë se është për keqardhje që kandidatet e propozuar nga Vetëvendosja, Feride Rushiti dhe Hatixhe Hoxha, kanë pranuar të bëhen pjesë e procesit.
“Është për keqardhje që dy gra kanë pranuar të huazojnë emrin e tyre në një maskaradë të rrezikshme dhe antikushtetues”, ka shkruar Çitaku. “Po, ky popull ka sakrifikuar shumë për të pasur liri, pavarësi dhe institucione. Dhe nuk do të lejojmë përmbysjen dhe rrënimin e gjithçkaje që është ndërtuar me aq shumë mund. Zullumi këputet prej së trashi, thotë populli”, ka shkruar tutje ajo.
IKD: Procesi për zgjedhjen e presidentit, cenim serioz i rendit kushtetues
Në një reagim dërguar mediave thuhet se procesi që duhej të reflektonte standardet më të larta të ligjshmërisë dhe përgjegjësisë institucionale, është karakterizuar nga një improvizim procedural dhe interpretim të gabuar të normave juridike, siç thuhet, duke ngritur shqetësime të drejtpërdrejta për funksionimin e demokracisë.
“Së pari, mungesa e kuorumit për mbajtjen e seancës së jashtëzakonshme e bën të pavlefshëm vetë zhvillimin e procedurës. Kushtetuta kërkon praninë e së paku 80 deputetëve për nisjen e seancës dhe zhvillimin e dy raundeve të para të votimit, ndërkohë që në sallë kanë qenë vetëm 64 deputetë. Në këto rrethana, çdo veprim i mëtejshëm procedural përbën një precedent të rrezikshëm që cenon rëndë parimin e shtetit të së drejtës dhe krijon hapësirë për anashkalimin sistematik të rregullave kushtetuese”, thuhet në reagim.
Tutje IKD-Ja e ka cilësuar si shkelje të standardeve minimale të transparencës dhe pjesëmarrjes, mënyrën e thirrjes së mbledhjes së Komisionit për Legjislacion, siç thuhet, vetëm dy minuta para mbajtjes së saj.
“Një afat i tillë e pamundëson pjesëmarrjen efektive të deputetëve dhe e redukton procesin në një formalitet, duke cenuar legjitimitetin e çdo vendimi të marrë”, thuhet në reagim.
Sipas IKD-së edhe çështja e nominimit dhe e nënshkrimeve të deputetëve është trajtuar në kundërshtim me kuadrin kushtetues dhe praktikën gjyqësore. “Kushtetuta kërkon së paku dy kandidatë për President, kusht që është përmbushur fillimisht më 5 mars 2026 me kandidaturat e Glauk Konjufcës dhe Fatmire Mulhaxha-Kollçakut. Megjithatë, tërheqja e tyre nga gara nuk e rikthen procesin në pikën zero në aspektin juridik të nënshkrimeve, pasi këto të fundit konsiderohen të konsumuara në momentin e dorëzimit. Secili kandidat kishte siguruar mbi minimumin prej 30 nënshkrimeve, të cilat, për shkak të natyrës së tyre juridike, janë të lidhura ekskluzivisht me kandidatin përkatës dhe nuk mund të transferohen apo ripërdoren për kandidatë të tjerë”, thuhet në reagim.
Ky interpretim, krahasimisht, thuhet se “mbështetet edhe nga praktika e Gjykatës Kushtetuese në rastin KI 47/10, ku është theksuar se nënshkrimet e deputetëve, pasi dorëzohen si pjesë e një kërkese, nuk mund të tërhiqen në mënyrë arbitrare dhe konsiderohen të konsumuara. Po ashtu, thuhet se Rregullorja e Kuvendit e lejon tërheqjen e nënshkrimeve vetëm deri në momentin e dorëzimit në Zyrën për propozime dhe parashtresa, çka në këtë rast, thuhet se, nuk ka ndodhur.
“Të gjitha veprimet e mësipërme, nga mungesa e kuorumit, shkeljet procedurale në funksionimin e komisioneve dhe keqinterpretimi i rregullave e bëjnë të gjithë procesin juridikisht të pavlefshëm. Lejimi i një praktike të tillë përbën rrezik serioz për demokracinë, pasi vendos një standard ku rregullat kushtetuese anashkalohen krijohen rrugë për kriza të përsëritura institucionale”, thuhet në reagim.
IKD-ja i ka bërë thirrje kryetares së Kuvendit, Albulena Haxhiu, që të respektoj Kushtetutën dhe aktgjykimet e Gjykatës Kushtetuese, ashtu që, siç thuhet, të mos procedojë me asnjë veprim në seancë, nëse në sallë nuk janë të pranishëm 80 deputetë.
Çka ndodhi mbrëmë në seancën për presidentin?
Photo: Driton Paçarada
Kuvendi i Kosovës, me praninë e deputetëve të partisë në pushtet, pa Haxhi Avdylin, të hënën mbrëma votoi për dy kandidatet për presidente të propozuara nga Lëvizja Vetëvendosje, Feride Rushitin dhe Hatixhe Hoxhën.
Feride Rushiti mori 63 vota në rundin e parë, ndërsa kandidatja Hoxha asnjë votë. Një votë tjetër ishte e pavlefshme.
Partitë opozitare nuk morën pjesë në këtë seancë të jashtëzakonshme për zgjedhjen e presidentes së Republikës së Kosovës.
Kryetarja e Kuvendit, Albulena Haxhiu, në vazhdimësi i bëri thirrje deputetëve të grupeve tjera parlamentare që t’i bashkohen kësaj seance. Haxhiu madje me të nisur seanca, deklaroi se kanë informacione që ata gjenden në zyrat e tyre brenda ambientit të Kuvendit të Kosovës.
Kryetarja e Kuvendit, pas përfundimit të rundit të parë të votimit, tha se seanca do të vazhdojë të martën.
Kësaj seance i parapriu një tjetër në orën 17:00 e cila u ftua vetëm për të diskutuar për çështjen e presidentit e ku tërhoqën kandidaturat e tyre për këtë pozitë, zëvendëskryeministri aktual, Glauk Konjufca, dhe deputetja Fatmire Mulhaxha-Kollçaku. As në këtë seancë nuk morën pjesë partitë opozitare.
E gjatë kësaj seance, kryeministri i Kosovës Albin Kurti, deklaroi se opozita e ka bojkotuar procesin e zgjedhjes së presidentit të Kosovës dhe se sipas tij, kjo mund të kuptohet vetëm si mosrespektim i verdiktit të popullit.
Sipas Kurtit, nuk qëndron as arsyetimi i opozitës se nuk duan që Vetëvendosja të mbajë tri pozitat kyçe të udhëheqjes së shtetit, sepse ai thotë se opozitës ia ka ofruar pozitën e kryeparlamentarit, e po ashtu është bërë ofertë që të propozohen tre emra për president konsensual.
“Aman na ndihmoni të mos i kemi tri pozitat. Po kërkojmë mbështetjen, ndihmën e opozitës. Boll na dalin dy pozita. Si duam tri. Të dashur deputetë të opozitës ejani na ndihmoni të mos i kemi tri pozita, se tash i kemi tre pozita”, ka thënë Kurti.
Seanca për zgjedhjen e presidentit vazhdon më 28 prill me fillim në orën 10:00. Kjo është data e fundit e zgjedhjes së presidentit apo presidentes së Republikës së Kosovës.
Opozita: Cenim i rendit kushtetues dhe tentim grushtshteti
Shefi i Grupit Parlamentar të Aleancës për Ardhmëri të Kosovës, Besnik Tahiri, ka thënë se fillimi i seancës për zgjedhjen e presidentit pa pjesëmarrjen e 2/3 të deputetëve, është cenim i rendit kushtetues dhe tentim grushtshteti.
Tahiri ka folur pas seancës, ku u zhvillua rundi i parë për zgjedhjen e presidentit.
“Ajo që sot kryetarja e Kuvendit dhe ushtruesja e detyrës së presidentes ndërmori është pa asnjë dyshim goditje e rëndë që i është bërë rendit kushtetues, Kushtetutës së Kosovës, duke e nisur një seancë plotësisht në kundërshtim me rregullat, që janë të mirëpërcaktuara, ku në seancë për zgjedhjen e presidentit duhet të kishte prezencën e 2/3 të deputetëve. Kjo situatë kaq serioze dhe kaq e rrezikshme për demokracinë e vendit, pa asnjë dyshim është cenim i rendit kushtetues dhe tentim grushtshteti”, ka thënë Tahiri.
Derisa Tahiri po fliste, kryeparlamentarja Haxhiu i tha atij “në seancë deputet, seancë në orën 10:00”.
Tahiri iu përgjigj: “Ke bërë një shkelje të madhe kushtetuese”.
Ndërsa, nënkryetarja e Kuvendit nga radhët e Partisë Demokratike, Vlora Çitaku, ka thënë se është joserioze mënyra se si është thirrur seanca për zgjedhjen e presidentit.
Çitaku në postim në Facebook ka thënë se ftesën e ka pranuar në orën 20:26 për seancën e paraparë të mbahet në 20:30. Seanca për zgjedhje të presidentit ende s’ka nisur.
“Pra, në ora 20:26 na vjen ftesa për seancë që duhet të mbahet në ora 20:30. Kaq serioz janë këta për të zgjedhur Presidentin”, ka shkruar Çitaku.
Për seancën ndërkohë ka reaguar edhe kryetari i Partisë Demokratike e Kosovës, Bedri Hamza. Ai ka thënë se fillimi i votimit për presidentin pa pasur 2/3 e deputetëve të pranishëm në sallën e Kuvendit, është një “puç kushtetues”.
“Sonte joserioziteti, papërgjegjshmëria e ka arritur kulmin. Ky është një puç kushtetues. Është derdhur shumë gjak, shumë mund, shumë sakrificë e shumë vuajtje që ne ta kemi lirinë e Kushtetutën. E kemi thënë vazhdimisht që për ne vendimet e Gjykatës Kushtetuese respektohen edhe atëherë kur ne mund të kemi ndonjë koment, prapë se prapë janë vendime që respektohen. Sonte veçse është shkelur Kushtetuta e Kosovës. Ka hyrë në procedurë të votimit çështja e zgjedhjes së presidentit apo presidentes në mënyrë antikushtetuese dhe kjo praktikë duhet të ndërpritet me qëllim që të ruhet stabiliteti politik dhe institucionet e vendit, sepse në të kundërtën ka rrezik dhe ky rrezik është Lëvizja Vetëvendosje dhe Albin Kurti. Nuk dua të besoj që të prodhohet situatë ku vendi mund të shkojë në anarki”, ka thënë Hamza.
Ai tha se nuk mund të shkohet në rundin e dytë pa u kaluar rundi i parë.
“Duhet të jenë 80 deputetë në sallë prezent dhe të votojnë që të konsumohet rundi i parë, të njëjtën gjë e kërkon edhe rundi i dytë. Nuk mund të shkohet në rundin e dytë pa kaluar rundi i parë. Sa joseriozë dhe të papërgjegjshëm janë, e thërrasin seancën në orën 20:30 e neve na ftojnë në orën 20:25. Kemi ftesë për nesër për seancë në orën 10:00, por ne konsiderojmë që nuk janë plotësuar kushtet që të kalohet në rundin e dytë. Dua të besoj që këta nuk vazhdojnë tutje”, tha Hamza.
Abdixhiku tregon 15 nënshkrimet e deputetëve të LDK-së për propozimin e kësaj partie
Kryetari i Lidhjes Demokratike të Kosovës, Lumir Abdixhiku, ka treguar 15 nënshkrimet e deputetëve të kësaj partie për mbështetjen e nominimit të një kandidati nga ajo. Abdixhiku ka thënë se e ka cekur se kandidate mund të ishte edhe Vjosa Osmani.
“LDK-ja i ka pasur gjithmonë 15 nënshkrime për propozimin e Lidhjes Demokratike të Kosovës. Ja ku janë nënshkrimet e LDK-së. Unë nuk flas asnjëherë në emrin tim, flas në emrin e LDK-së. Këto nënshkrime nuk kam dashur t’i bëj publike për lojëra politike”, tha Abdixhiku.
Abdixhiku ka thënë se duan një marrëveshje serioze, institucionale.
“Unë besoj që në monologun që e pati LVV-ja e refuzoi propozimin tonë. Si është e mundur të flasësh dy orë dhe të mos flasësh për propozimin për marrëveshje politike të LDK-së. Dua të shpresoj që rundi i parë nuk është konsumuar, përndryshe LDK-ja do t’i mbledhë të gjitha organet e veta partiake për të konsideruar hapat e mëtutjeshëm. Ne nuk mund të marrin në skenarë të palaçove politike. Duam marrëveshje serioze, institucionale”, tha Abdixhiku.
KDI: Zgjedhja e presidentit pa kuorumin e nevojshëm cenon rendin kushtetues
Instituti Demokratik i Kosovës (KDI) ka dënuar ashpër përpjekjen për ta çuar përpara zgjedhjen e presidentit pa përmbushjen e kuorumit të kërkuar kushtetues.
“Një veprim i tillë cenon drejtpërdrejt themelet e rendit kushtetues dhe funksionimin e demokracisë parlamentare në vend. Vendimet dhe praktika e Gjykatës Kushtetuese kanë sqaruar qartë standardin që duhet ndjekur, sipas së cilit përcaktohet që procedura e zgjedhjes së Presidentit kërkon pjesëmarrjen e së paku dy të tretave të të gjithë deputetëve në raundin e parë dhe të dytë të votimit, ndërsa vetëm pas përmbushjes së këtij kushti procedura vazhdon në raundin e tretë. Çdo tentativë për ta anashkaluar këtë rend kushtetues dhe për të zgjedhur Presidentin me një numër të kufizuar deputetësh në sallë përbën shkelje të hapur të Kushtetutës dhe deformim të qëllimshëm të parimeve kushtetuese. Për më tepër, nuk ekziston asnjë bazë juridike që lejon uljen e kuorumit mbi bazën e pretendimeve për mungesën e deputetëve”, thuhet në reagim të KDI-së.
KDI vlerëson se kjo qasje krijon një precedent të rrezikshëm dhe hap rrugë për interpretime të njëanshme të rregullave kushtetuese.
“Prandaj, KDI-ja u bën thirrje deputetëve që të respektojnë standardet kushtetuese dhe të shmangin veprime që thellojnë krizën institucionale. Po ashtu, atyre u bëjmë thirrje edhe që të ndalojnë çdo veprim që cenon rendin kushtetues dhe të rikthehen në respektimin e plotë të procedurave kushtetuese”, tha KDI.
Kryetarja e Kuvendit të Kosovës dhe ushtruesja e detyrës së presidentes, Albulena Haxhiu, para nisjes së seancës së jashtëzakonshme për zgjedhjen e presidentit/es ka ftuar deputetët e partive opozitare që t’iu bashkohen.
“Ndërkohë presim që deputetët që nuk janë të pranishëm në këtë seancë të na bashkohen. I ftoj grupet parlamentare që nuk janë të pranishme në këtë seancë që të vijnë. Sipas informacioneve që kemi ata janë në zyrat e tyre andaj i ftojmë të vijnë e të na bashkohen”, ka thënë Haxhiu.
Më pas është lexuar biografia e dy kandidateve për presidente, Feride Rushiti dhe Hatixhe Hoxha. Pas prezantimit kryeparlamentarja Albulena Haxhiu ka ftuar Komisionin për Legjislacion që të mblidhet e t'i shqyrtojë dy kandidaturat.
Paraprakisht, dy emrat e propozuar për president në seancën e 5 marsit janë tërhequr nga kandidatura, përkatësisht zëvendëskryeministri Glauk Konjufca dhe deputetja e Lëvizjes Vetëvendosje, Fatmire Mulhaxha-Kollçaku .
Kurti: Opozita qëllim e ka dëmtimin e Lëvizjes Vetëvendosje
Kryeministri i Kosovës, Albin Kurti, ka thënë se këtë bojkot të opozitës në lidhur me zgjedhjen e presidentit mund ta kuptojë vetëm si mosrespektim të verdiktit të popullit.
Kurti ka thënë se arsyetimi i opozitës se nuk duan që Vetëvendosja të mbajë tri pozitat, nuk qëndron. Thotë se është ofruar pozita e kryeparlamentarit, e po ashtu është bërë ofertë që të propozohen tre emra për president konsensual.
Kryeministri i Kosovës, Albin Kurti, në seancën e jashtëzakonshme të Kuvendit të Kosovës për çështjen e presidentit që nisi në orën 17:00 ka thënë se nuk qëndrojnë deklarimet se Lëvizja Vetëvendosje nuk do marrëveshje politike.
Sipas Kurtit, ka koalicione paszgjedhore të cilat nuk po deklarohen por që është arsye e madhe e kësaj bllokade. Kurti deklaroi se qëllim kanë ta dëmtojnë LVV-në.
“Vitin e kaluar Nisma me tre deputetë sillej sikur t’i kishte 48. Ndërkohë, LDK-ja përbuzi çdo ofertë që ia bëmë duke refuzuar edhe takimet. Ata që sot thonë se Lëvizja Vetëvendosje nuk do marrëveshje politike dhe nuk mund të qeverisë në koalicion nuk e thonë të vërtetën. Koalicionet parazgjedhore janë formë e ndershme e marrëveshjes politike sepse qytetarët e dinë paraprakisht se kush do të qeverisë bashkë. Por ne kemi koalicione paszgjedhore që nuk po lidhen por që po dihen se janë koalicione paszgjedhore dhe këtu është një pjesë e madhe e arsyes së bllokadës. Pikërisht për shkak se ka preferenca për koalicione të padeklaruara. Kjo është kronologjia e fakteve, të tjerat janë supozime e manipulime që njëjtë si vitin e kaluar, qëllim e kanë dëmtimin sado pak të subjektit fitues, Lëvizjes Vetëvendosje", deklaroi Kurti mes tjerash.
Zëvendëskryeministrja e Kosovës, Emilia Rexhepi, u ka bërë thirrje deputetëve të Kosovës që të lënë dallimet dhe ta zgjedhin presidentin. Ai ka thënë se po rrezikohet futja në një cikël të mosstabilitetit të madh.
“T’i dërgojmë mesazh të qartë rajonit se Kosova është shtet që di t’i kalojë dallimet politike kur është më e nevojshme, që institucionet e saja janë stabile dhe se ka përgjegjësi përtej interesave politike”, tha Rexhepi në seancën e Kuvendit.
Opozita me një zë për bojkot të seancës
Seanca që u thirr për të “diskutuar” për çështjen e presidentit u bojkotua nga partitë opozitare, PDK, LDK dhe AAK.
Kryetari i Partisë Demokratike të Kosovës, Bedri Hamza, ka deklaruar se për subjektin që drejton ai, kjo çështje është e mbyllur.
I pyetur nëse votojnë për një kandidat nga familja Jashari, Hamza ka thënë se nuk kanë ndryshuar qëndrim për ndonjë kandidat nga kjo familje, mirëpo për Vjosa Osmanin, ai nuk ka shprehur mbështetje.
Hamza deklaroi para mediave se Osmani mund të zgjidhet presidente edhe për një mandat tjetër edhe pa votat e PDK-së.
“Nuk mund të flasim mbi bazën e situatave hipotetike. E ruajmë vlerësimin dhe konsideratën më të lartë për familjen Jashari. E kemi dhënë qëndrimin tonë dhe qëndrimi ynë nuk ndryshon. Zyrtarisht i kemi vetëm dy kandidatë. Kemi thënë që fillimisht të ketë marrëveshje mbi parime të caktuara dhe pastaj të vijmë dhe t’i propozojmë emrat. Emrat nuk kemi thënë që duhet të jenë nga PDK-ja. Po që se LDK-ja e sjell Vjosa Osmanin si kandidate për presidente, mund të zgjidhet me votat me Lëvizjes Vetëvendosje dhe LDK-së, ndoshta edhe deputetëve të tjerë të Kuvendit të Kosovës”, ka thënë Hamza.
Kryetari i LDK-së, Lumir Abdixhiku ka njoftuar se kjo parti nuk do të marrë pjesë në seancën për diskutime lidhur me zgjedhjen e presidentin. Ai ka thënë se kjo seancë është “show propagandues i VV-së”.
“Nuk marrim pjesë në seancë”, ka thënë kreu i LDK-së para mediave.
Edhe Shefi i Grupit Parlamentar të Aleancës për Ardhmëri të Kosovës, Besnik Tahiri, njoftoi se deputetët e partisë së tij s’do të marrin pjesë në seancën e ftuar nga ora 17:00 për të diskutuar lidhur me zgjedhjen e presidentit.
“Kosova i kishte tre muaj me diskutu seriozisht zgjedhjen e presidentit, që nga themelimi i qeverisë. E kemi thënë nga dita e parë, diskutimet për zgjedhjen e presidentit kanë qenë spektakël politik, performancë publike, me qëllim të vetëm me ardhur në këtë situatë...AAK-ja s’ka qenë e ftuar për diskutime. S’kemi marrë pjesë, e rrjedhimisht s’marrim pjesë në një diskutim që prapë është një performancë publike. Kësaj radhe po shihet është performancë publike, diskutim me fol vet me veti. Kurti në vend se të flasë në organe të partisë, do që platformën e Kuvendit ta kthejë në diskutim të brendshëm”, ka thënë Tahiri.
Ai tha se është “vazhdim i spektaklit publik, që fatkeqësisht po e çon vendin në zgjedhje”.
Shefja e Grupit Parlamentar të Lëvizjes Vetëvendosje, Arbërie Nagavci, para se të nis seanca e orës 17 ka ftuar partitë politike të marrin pjesë në seancën e Kuvendit për të diskutuar për zgjedhjen e presidentit. Nagavci ka thënë se Vetëvendosje është e gatshme të tërheqë kandidaturat e Glauk Konjufcës dhe Fatmire Kollçakut, nëse PDK-ja e LDK-ja ofrojnë tre emra për presidentë që janë jashtë skenës aktuale politike dhe janë unifikues.
E pyetur nëse Vetëvendosje është e gatshme t’i ofrojë nënshkrimet për ish-presidenten Vjosa Osmani, Nagavci para seancës së Kuvendit tha se deri më tash asnjë parti opozitare s’ka deponuar nënshkrimet për asnjë kandidaturë.
“Përtej deklaratave e deklarimit se i kemi 15 nënshkrime, ato duhet të shihen. Unë kam të gatshme nënshkrimet edhe për seancë edhe për president. S’mjaftojnë deklaratat. Kemi pritur gjithë fundjavën, e pritëm edhe sot paradite të ofrohen nënshkrimet dhe t’i plotësojmë me nënshkrimet tona. Të ofrohen 15 nënshkrime nga LDK e 22 nga PDK-ja e të japim nënshkrimet tona. Nuk ka hapa seriozë”, tha Nagavci.
Ajo tha se zgjedhjet e reja s’i nevojiten askujt dhe duhet shmangur.