Autoritetet në Kosovë, thonë se integrimi i sistemit të drejtësisë në veri të vendit ka mbetur i ngrirë si pasojë e zhvillimeve politike, mos zbatimit të marrëveshjes së arritur në Bruksel dhe bllokimit të procesit të dialogut ndërmjet Kosovës dhe Serbisë.
Sistemi i drejtësisë në veri, për 17 vite është organizuar dhe ka funksionuar paralelisht me atë të Kosovës. Me qëllim të integrimit, Prishtina dhe Beogradi patën arritur një marrëveshje, por e cila nuk po zbatohet ende.
Ministria për Dialog në Qeverinë e Kosovës, në një përgjigje për Radion Evropa e Lirë ka bërë më dije se "ministrja Edita Tahiri ka pezulluar çdo bisedë për dialogun derisa është në fuqi rezoluta e Kuvendit të Kosovës për pezullimin e bisedimeve".
Kurse, Ministrja e Drejtësisë në Qeverinë e Kosovës, Dhurata Hoxha, tha për Radion Evropa e Lirë se institucionet e Kosovës kanë kryer të gjitha obligimet dhe kanë respektuar marrëveshjet për drejtësi të arritur në dialogun Prishtinë - Beograd.
Hoxha tha po ashtu se ministria ka kryer të gjitha për punët për kandidatët serbë që kanë aplikuar për të qenë pjesë e sistemit të drejtësisë së Kosovës.
Edhe
Asnjëra prej katër marrëveshjeve të nënshkruara në Bruksel nuk po gjen zbatim
"Ne i kemi përfunduar obligimet tonë që kemi pasur, pra në marrëveshjen për drejtësi. Ne jemi gati të vazhdojmë t'i licencojmë dhe të bëhet betimi i gjyqtarëve, prokurorëve dhe të tjerëve. Mirëpo në anën tjetër mbetet që edhe pjesa tjetër e marrëveshjes të zbatohet", tha Hoxha.
Kryesuesi i Këshillit Gjyqësor të Kosovës, Nehat Idrizi, tha për Radion Evropa e Lirë se shtrirja e sistemit të drejtësisë ka mbetur në udhëkryq për shkak të rrethanave të krijuara në veri të Kosovës dhe ndërprerjes së dialogut mes Kosovës dhe Serbisë.
"Rrethanat që u krijuan për shkak të murit dhe trenit, dhe ngjarjet që u zhvilluan, kjo punë ka mbetur ende në nivelin e Ministrisë për Dialog për tu konsultuar në Bruksel. Kur të normalizohen raportet dhe të krijohen rrethanat, atëherë do të procedohet tutje. Pra, pengesa është për shkak të rrethanave që u krijuan në ndërkohë", tha Idrizi.
Këshilli Gjyqësor Kosovës, sipas tij, ka përfunduar të gjitha punët sa i takon intervistimittë kandidatëve për të qenë pjesë e sistemit të drejtësisë në veri të Kosovës.
Megjithatë, ai theksoi se emrat e kandidateve potencial [grupit të dytë] nuk janë dërguar në presidence për dekretim.
Edhe
Qeveria e shpall të finalizuar integrimin e gjyqësorit, i mban sekret të emëruarit
"Ne kemi mbetur edhe njëherë për t'i proceduar. Ne momentin që do të marrim sinjalin ne do të veprojmë. Në presidencë ka shkuar vetëm grupi i parë, por ka mbetur që edhe një herë të ripërsëritet dhe të dërgohet edhe një herë si grup në tërësi", tha Idrizi.
Lidhur me çështjen e mos dërgimit të emrave për dekretim, ministrja Hoxha tha se një gjë e tillë nuk mund të ndodh përderisa ka ende gjyqtarë e prokurorë në veri që janë pjese e sistemit të drejtësisë së Serbisë.
"Ne nuk mund ta bëjmë procedimin e betimit apo listave të gjyqtarëve dhe prokurorëve që duhet të betohen, nëse ata veç ende janë duke punuar si gjyqtarë në një shtet tjetër", tha Hoxha
Emrat e 34 gjyqtarëve serbë, që pritet të punojnë në Gjykatën Themelore në veri të Mitrovicës, në fund të vitit nuk u dekretuan nga presidenti i Kosovës, Hashim Thaçi, pasi që siç është thënë, kanë kaluar afatet ligjore për emërimin e tyre.
Marrëveshja ndërmjet Prishtinës dhe Beogradit për integrimin e sistemit gjyqësor në veri, ishte arritur në dialogun e Brukselit, më 2015.
Edhe
Në veri ende nuk zbatohet Marrëveshja për drejtësi
Pas një rishikimi të marrëveshjes, zbatimi i saj ishte caktuar për datën 10 dhe më pas 17 janar të këtij viti. Por, kjo nuk kishte ndodhur.
Numrit i përgjithshëm i gjyqtarëve që do të pranohen që të punojnë në veri të Kosovës është paraparë të jetë 48 gjyqtarë kryesisht nga komuniteti serb.
