Skeja në emisionion “Konfront” në KTV, potencoi se vetëm prindërit e mbështetur për muri i shohin si zgjidhje personat si Arianit Sllamniku.
“Buron nga dëshpërimi që pacientët ndiejnë nga sistemi shëndetësor, që nuk po dëgjohen mjaftueshëm, që nuk po marrin mbështetje. Gjithashtu buron edhe nga kostoja kur ke një fëmijë me autizëm. Nga vështirësitë, sfidat me sistemin e arsimit. Pra, mbështetesh për muri dhe vjen dikush të thotë ja ku është zgjidhja dhe edhe nëse nuk i beson, e provon. Gruaja që e ka raportuar rastin deklaroi vetë: ne në çdo derë trokasim. Kjo do të ndodhë sërish sepse kjo tregon që nuk ka mbështetje nga shteti”, ka thënë Skeja.
Ai tutje ka deklaruar se nuk mjafton vetëm të arrestohen personat si Sllamniku por të gjinden metoda nga institucionet përgjegjëse që prindërit të mos drejtohen te alternativat e tjera jashtë atyre të aprovuara shkencërisht.
“Prej përvojës që e kemi në organizatë e kemi parë që kur po rritet dëshpërimi atëherë po kërkohen rrugët alternative për të gjetur mbështetje. Greta Thunberg që po bëhet ikonë, është e diagnostifikuar me spektrin e autizmit. Ky është një shembull që kur nuk munden ta gjejnë një mbështetje, dëshpërohen nga fakti që nuk kanë ku ta gjejnë një sistem të përkrahjes nga shteti apo rrethi i tyre dhe kjo i shtyen ta gjejnë këso mënyra alternative”, ka deklaruar Skeja në emisionin “Konfront” në KTV.
Hyseni: OJQ-të që merren me autizmin, para kolapsit - s'ka ndihmë nga shteti
Violeta Hyseni, drejtoreshë e shoqatës “Autizmi Flet”, ka thënë se organizatat joqeveritare që merren me personat me autizëm janë para kolapsit. Ajo ka theksuar se nuk ka ndihmë nga shteti.
Ajo ka shtuar se nuk kanë ndonjë mbështetje nga Ministria e Shëndetësisë.
“Ne si organizatë nuk kemi ndonjë bashkëpunim me MSH-në, kemi bashkëpunim me Komunën e Prishtinës që i ka siguruar disa hapësira. Por, sado pak ndihmë është e mirëseardhur. Fokusin e kemi pasur tek ambasadat, tash edhe ato në shumë raste janë ndërprerë. Organizatat janë në gjendje kolapsi, mungojnë donacionet, fondet, shërbimet duhet t’i paguajnë prindërit”, ka thënë ajo në Konfront.
Ramaj për rastin Sllamniku: Ministria reagoi vetëm pas presionit në publik
Saranda Ramaj, hulumtuese e politikave shëndetësore, ka thënë se Ministria e Shëndetësisë e ka standard që të reagojë pos kur kritikohet në rrjete sociale.
Ajo ka theksuar se Ministria nuk shqetësohet nga kritikat në media, e se reagimin për rastin e Arianit Sllamnikut, sipas Ramajt, e bëri vetëm pas presionit në publik.
“Jam e sigurt se po të mos fillonin qytetarët dhe zërat publikë të mos diskutonin për atë çështje, besoj se MSH prapë nuk do të reagonte. Kjo është standard për MSH. Ministria reagon kur ka presion në rrjete sociale, ata nuk ju intereson nëse e kritikon në media. Nëse kritikën që e ke në media nuk e materializon në rrjete sociale MSH-ja nuk shqetësohet”, ka thënë ajo.
Derisa ka folur për rastin e Arianit Sllamnikut, Ramaj ka theksuar se ai nuk është i vetmi person që përfshihet në rast të tillë.
Deva: Sllamniku s'është i vetmi, ka edhe të tjerë
Drejtoresha e Organizatës “Asociacioni Nacional i Autizmit në Kosovë”, Jeta Deva, ka thënë se Arianit Sllmaniku nuk është i vetmi i cili rekomandon të merren “terapi” jashtë atyre të cilat janë shkencërisht të aprovuara për fëmijët e prekur me autizëm.
Deva në emisionin “Konfront” në KTV, ka deklaruar po ashtu se ka raste kur është rekomanduar të ndalohet terapia e sjelljes, e cila siç thotë Deva është e vetmja e cila jep rezultate konkrete.
“Kemi raste të ngjashme, marrin injeksione të ndryshme. Me një fjalë eksperimentim me disa metoda që nuk funksionojnë në vende të zhvilluara dhe normale, të cilat kanë strukturë të kontorllit. Raste të cilat kanë ndikuar direkt në procesin e bllokimit terapeutik, madje kanë rekomanduar që merre këtë injeksion dhe shko të logopedi që terapia e sjelljes t’i ndalet. Terapia e sjelljes është një ndër te vetmet shencërisht me evidencë dhe rezultate konkrete që është zgjidhje funksionale dhe e logjikshme sepse bën matjen e sjelljes. Mund të përdoret edhe të fëmijët që kanë sfida të ndryshme”, ka thënë Deva.
Drejtoresha e Organizatës “Asociacioni Nacional i Autizmist në Kosovë, ka deklaruar se eksperimentimi me “ilaçe” të tjera sjell vetëm zhgënjim. Deva ka theksuar se njeh shumë prindër të cilët nuk kanë lënë asgjë pa provuar për fëmijët e tyre me autizëm, mirëpo vetëm sa kanë humbur shumë vite duke pritur për shërim.
“Kam parë shumë prindër të cilët kanë fëmijët me autizëm e nuk kanë lënë asgjë pa provuar mirëpo gjithmonë kanë qenë të zhgënjyer, kanë qenë në ankth shumë më shumë. Kanë qenë në gjendje edhe të dorëzohen sepse kanë humbur shumë vite duke pritur shërim”, ka thënë mes tjerash Deva.