BE-ja thotë se ura qe e gatshme që prej 2019-s, ritestimet e Qeverisë s’i vlerëson në kundërshtim me marrëveshjet

Zyrtarë të Bashkimit Evropian konfirmuan se bazuar në testimet që ia patën bërë urës kryesore mbi Ibër, ajo ka qenë e gatshme për qarkullimin e automjeteve qysh në përfundim të punimeve në vitet 2017-2019. Tek e cilësuan vendim të njëanshëm paralajmërimin e Qeverisë për hapjen e saj, në BE thanë se ritestimi i qëndrueshmërisë së urës nuk përbën shkelje të marrëveshjeve të Brukselit

Testimet të cilat ia bëri Qeveria e Kosovës urës qendrore mbi Lumin Ibër janë kryer edhe nga Bashkimi Evropian, kanë konfirmuar zyrtarë të Brukselit.

BE-ja e pati marrë përsipër rivitalizimin e urës, mbështetur në marrëveshjet e arritura në dialogun në Bruksel dhe testimet e qëndrueshmërisë, siç thanë zyrtarët e saj, janë kryer sipas standardeve të Kosovës dhe të bllokut evropian.

“Punimet e BE-së për rinovimet në urë u zhvilluan në vitet 2017-2019. Në përfundim të këtyre punimeve, ura ishte gati për t’i bërë ballë qarkullimit të automjeteve në përputhje me standardet e BE-së dhe të Kosovës”, u tha nga BE-ja.

Ndonëse e cilësuan veprim të njëanshme paralajmërimin e Qeverisë për hapjen e urës për qarkullim të automjeteve, në BE thanë se testimet e bëra nga Qeveria e Kosovës nuk janë në kundërshtim më marrëveshjet e Brukselit.

Edhe në Qeveri deklaruan se më 2019 pati një vlerësim nga Bashkimi Evropian se punimet në urë kanë përfunduar dhe se ajo duhet të hapet për qarkullimin e automjeteve, pa vonesa apo pengesa të mëtejme.

Edhe Arbëri 8 kor 2025 BE-ja kërkon koordinim dhe dialog me të gjitha komunitetet rreth urave në Mitrovicë

Në kuadër të aranzhimeve rreth hapjes së urës, në Bruksel palët patën arritur dakordim tjetër për definimin e kufijve kadastralë mes Komunës së Mitrovicës së Jugut dhe asaj të Veriut.

Por në BE nuk treguan nëse hapja e urës ndërlidhet edhe me finalizimin e kësaj çështje.

E përfaqësues komunalë në Mitrovicën e Veriut thanë se partia që ka drejtuar këtë komunë – Lista Serbe – e pati kushtëzuar hapjen e urës edhe me caktimin e kufijve kadastralë.

“Prej asaj kohe nuk ka pasur ndonjë zhvillim. Tani është punë e dy kryetarëve, Bedri Hamza dhe Erden Atiq, që t’i marrin hapat konkretë, sepse me planin e Ahtisaarit nuk janë ndarë ende kufijtë. Sidomos pjesa e Suhodollit është pikëpyetje, sepse në statut ekziston edhe në pjesën veriore, edhe atë jugore si territor i dy komunave”, tha kryesuesi i Kuvendit Komunal të Mitrovicës së Veriut, Nexhat Ugljanin.

Edhe Arbëri 30 qer 2025 BE: Autoritetet e Kosovës ishin të informuara për testimet e urës në Mitrovicë

Ani se Ligji për kufijtë administrativë thotë se “kufiri në mes të Mitrovicës së Veriut dhe Mitrovicës së Jugut do të jetë vija e përcaktuar që do të kalojë nëpër zonën kadastrale të Suhodollit”, kjo ishte kundërshtuar nga ish-kryetari dhe udhëheqja e Mitrovicës së Veriut.

Në diskutimet që u patën zhvilluar nëntorin e vitit 2016, veriorët pretendonin se Suhodolli i takon Mitrovicës Veriore dhe se nuk mund të jetë vija ndarëse, tek patën kërkuar rikthimin e çështjes në Bruksel.