Bashkimi Evropian në raportin për të drejtat e njeriut ka thënë se situata në veri të Kosovës mbetet sfiduese, veçanërisht sa i përket gjykimit të korrupsionit, krimit të organizuar dhe kushteve për lirinë e shprehjes, përfshirë sulmet ndaj profesionistëve të medias.
Raporti thekson se dorëheqja masive e serbëve të Kosovës nga institucionet publike dhe ngritja e postblloqeve pasuese ndikuan negativisht në siguri, ku ndër të tjera thuhet se sistemi i drejtësisë dhe policia funksionojnë me kapacitet shumë të reduktuar.
“Në vitin 2022, Kosova gëzonte stabilitet politik, ku qeveria kishte një shumicë solide në Kuvend. Ky mjedis politik ka qenë i favorshëm që Kosova të shtojë përpjekjet e saj për të forcuar demokracinë dhe sundimin e ligjit. Megjithatë, puna e Kuvendit vazhdoi të ndikohet negativisht nga një atmosferë e polarizuar politike dhe mungesa e kuorumit vendimmarrës”, thuhet në raport.
Raporti përmend edhe angazhimin në dialog. Thuhet se BE-ja vazhdon të lehtësojë dialogun për normalizimin e marrëdhënieve ndërmjet Kosovës dhe Serbisë.
“Ka pasur kriza të përsëritura në marrëdhëniet ndërmjet Kosovës dhe Serbisë në vitin 2022 dhe situata në terren mbetet e brishtë. Megjithatë, në vitin 2022, palët miratuan një Udhërrëfyes për Zbatimin e Marrëveshjeve të Energjisë, ranë dakord për udhëtimin vetëm me karta identiteti dhe arritën një marrëveshje që të përmbahen nga veprimet e mëtejshme për targat për të lejuar që dialogu të fokusohet në propozimin e fundit të BE-së për normalizimin e marrëdhënieve”, thuhet tutje në raport.
Raporti thekson gjithashtu se procesi zgjedhor i Kosovës ka ende nevojë për fuqizim për të adresuar dobësitë gjatë gjithë ciklit zgjedhor, siç thotë se janë identifikuar në misionet e njëpasnjëshme të vëzhgimit të zgjedhjeve të BE-së, dhe më së fundi nga Misioni përcjellës i zgjedhjeve të BE-së, i vendosur në Kosovë në nëntor të vitit 2022.
Edhe
Raporti për Kosovën, BE-ja thotë se mungon gjykimi i krimit dhe korrupsionit
Raporti vë në fokus se Kosova duhet të punojë më shumë për të zbatuar ligjet për të drejtat themelore të njeriut.
Në raportin për të drejtat e njeriut të publikuar nga BE-ja, thuhet se kuadri ligjor të cilin e posedon Kosova garanton mbrojtjen e të drejtave themelore dhe është në përputhje me standardet evropiane.
“Kapaciteti i qeverisë për të përmirësuar dhe mbikëqyrur politikat dhe legjislacionin për të drejtat themelore kërkon përmirësim, duke përfshirë koordinimin e mekanizmave për mbrojtjen e të drejtave të njeriut, barazisë gjinore dhe komuniteteve joshumicë, si në nivel qendror ashtu edhe në atë lokal. Çështjet e të drejtave themelore duhet të shfaqen më lart në agjendën politike. Burimet njerëzore dhe financiare mbeten të munguara dhe autoritetet përkatëse janë ende të varura nga mbështetja e donatorëve dhe duhet të marrin pronësi më të madhe. Ndërgjegjësimi i publikut për të drejtat e personave LGBTI mbetet i ulët. Duhet bërë më shumë për të garantuar barazinë gjinore dhe mbrojtjen e fëmijëve në praktikë. Nevojiten përpjekje të mëtejshme për të garantuar në mënyrë efektive të drejtat e personave që u përkasin pakicave, duke përfshirë romët, ashkalitë dhe egjiptianët, personat me aftësi të kufizuara dhe personat e zhvendosur”, thuhet në raport.
