Në një takim të mbajtur me avokatin e popullit Naim Qelaj, banorë të disa fshatrave të Klinës shprehën kundërshtinë për ndërtimin e fabrikës së çimentos afër vendbanimeve të tyre. Avokati i Popullit u premtoi atyre se do ta vazhdojë hetimin e nisur mbi këtë rast
Avokati i popullit, Naim Qelaj, ka vizituar fshatin Gremnik të Klinës, të enjten, për t’i dëgjuar ankesat e banorëve rreth ndërtimit të fabrikës së çimentos afër vendbanimit të tyre.
Qelaj paraprakisht ka pranuar një shkresë nga Komuna mbi rregullsinë për ngritjen e fabrikës, por ka thënë se ajo nuk ka ofruar fakte të mjaftueshme për t’i mbyllur hetimet mbi këtë rast.
“Mbi bazën e kësaj shkrese, ne nuk kemi mundur t’i mbyllim hetimet. Unë si avokat i popullit nuk kam pasur bazë të mjaftueshme të them: ‘në rregull, Komuna ka të drejtë në atë çka e thotë’”, ka thënë Qelaj.
Në hapësirën mes fshatrave Dollc, Gremnik dhe Volljakë, kompania “Wallingford International Kosovo” ka nisur ndërtimin e fabrikës së çimentos, në të cilën përfaqësues të saj thanë se do të investohen 300 milionë euro. Një nga ta i tha KOHËS nëpërmjet telefonit se projekti do të realizohen konform standardeve më të larta ambientale.
Por punimet janë stopuar prej kur banorët kanë nisur ta kundërshtojnë projektin.
Banorët në takimin e tyre me Avokatin e Popullit listuan argumentet që kanë kundër ndërtimit të kësaj fabrike.
“Dëgjimi publik që është mbajtur me banorët, është tentuar që banori të mbahet në terr informativ dhe nuk është publikuar në ueb faqe të komunës”, ka thënë Veton Raci, udhëheqës i grupit të banorëve që po e kundërshtojnë këtë projekt.
Edhe Ahmet Gashi, përfaqësues i banorëve, është deklaruar kundër ndërtimit.
“Neni 52 i Kushtetutës e bën ndërtimin e kësaj fabrike jokushtetues. Nëpër Komunën e Klinës kalojnë tre lumenj dhe dy të tjerë, Mirusha dhe Bistrica e Deçanit, dhe ekzistojnë kushtet që ai pluhur të notojë përmbi lumenj”, ka thënë Gashi.
Paragrafi 2 i nenit 52 të Kushtetutës thotë se institucionet e pushtetit publik angazhohen për t’i garantuar secilit mundësinë që të ndikojë në vendimet që kanë të bëjnë me mjedisin jetësor ku jeton.
Kompania që synon ta bëjë fabrikën e çimentos i ka marrë parcelat me qira nga Agjencia Kosovare e Privatizimit. “Wallingford International Kosovo” L.L.C. ka marrë lejet nga Agjencia Kosovare e Privatizimit dhe nga Komisioni i Pavarur për Miniera dhe Minerale.
Banorët e kësaj zone më herët kundërshtinë e tyre e kanë shprehur edhe me anë të organizimit të protestave dhe peticioneve dhe kanë thënë që pas mbledhjes së rreth 4 mijë nënshkrimeve, Kuvendi Komunal i Klinës i ka tërhequr të gjitha pëlqimet për ndërtimin e kësaj fabrike.