Bujanoci po përballet me një situatë të brishtë në aspektin politik dhe ekonomik, ndërkohë që udhëheqës të saj thonë se komuna nuk ka mbështetje as nga qeveria e Kosovës dhe as nga ajo e Shqipërisë.
Kryetari i Komunës, Nagip Arifi, ka thënë se politikanët shqiptarë po i vizitojnë vetëm sa për fotografi.
Arifi në një intervistë për KosovaPress ka thënë se për të dalë nga kjo gjendje, me Serbinë duhet të përdoret parimi i reciprocitetit në mënyrë që ajo që iu garantohet serbëve në Kosovë, t’u garantohet edhe shqiptarëve në Luginë të Preshevës apo në Serbi.
“Është një situatë e brishtë në aspektin politik, por edhe ekonomik. Politik kur them, është sepse Serbia në mënyrë perfide shfrytëzon metoda të ndryshme për t’i shlyer qytetarët nga gjendja civile, sidomos në hapësirën e Bujanocit. Në aspektin ekonomik kemi probleme sepse prapë Serbia nuk ka vullnet që atë vend ta zhvillojë”, ka thënë ai.
I pari i Bujanocit ka shtuar se janë duke i njoftuar të gjitha ambasadat e akredituara në Beograd lidhur me situatën në të cilën ndodhen edhe sot e kësaj dite shqiptarët atje.
“Në aspektin lokal, jemi duke i njoftuar të gjitha ambasadat e akredituara në Beograd për gjendjen që po mbretëron në komunën tonë dhe në Luginën e Preshevës. Kurse për institucionet e Kosovës dhe të Shqipërisë, shumë pak ose aspak, nuk na ndihmojnë në aspektin financiar, por edhe në aspektin e zhvillimit ekonomik, përveç që vijnë disa delegacione të fotografohen, publikohen ato fotografi, por ndihmë konkrete nuk kemi. Në përjashtim që këtë vit kemi pasur një ndihmë nga ish-qeveria Hoti, për vërshimet që kanë qenë në janar të këtij viti, në vlerë prej 200 mijë euro, kurse Preshevën e kanë financuar me 100 mijë euro, për fat të keq ndihma tjera nuk kemi”, ka thënë ai.
Arifi flet edhe për rifillimin e dialogut Kosovë – Serbi. Thotë se pala kosovare duhet të bëjë trysni që të garantohen të drejtat e shqiptarëve në Serbi.
“Për qeverinë e Kosovës, kërkesat tona janë para së gjithash që të bëjnë trysni në dialogun që po zhvillohet në Bruksel që kërkohet nga qeveria e Serbisë, të garantohen të drejtat individuale dhe kolektive. Ne nuk po kërkojmë as më shumë e as më pak, vetëm të përdoret parimi i reciprocitetit, atë që po iu garantohet serbëve në Kosovë, t’iu garantohet edhe shqiptarëve në Luginë të Preshevës apo në Serbi. Merreni me mend, sa i përket Ligjit mbi Zgjedhjet Parlamentare në Republikën e Kosovës, serbët kanë një diskriminim pozitiv, 10 deputetë janë të garantuar të zgjedhën, kurse ne këtë të drejtë nuk e kemi”, është shprehur Arifi.
Nisur nga situata e brishtë politike-ekonomike, për të është e kuptueshme edhe që të rinjtë kërkojnë të dalin jashtë vendit. Thotë se migrimi lidhet me perspektivën e zhvillimit ekonomik.
“Ka shpërngulje për një jetë më të mirë në vendet e perëndimit. Serbia ka liberalizimin e vizave dhe të rinjtë udhëtojnë në botën e jashtme, kryesisht në Gjermani, punojnë për një kohë të caktuar prej 3 muajsh, kthehen e prapë shkojnë, sepse nuk ka perspektivë të zhvillimit ekonomik. Në anën tjetër e kemi një problem shumë të theksuar, mospranimin e diplomave nga Universiteti i Prishtinës në Republikën e Serbisë, dh gjithmonë ky është një problem shumë i madh... Na brengos fakti që... qeveria e Serbisë ka filluar ndërtimin e një universiteti në Mitrovicë, kurse në anën tjetër, diplomat të cilat merren në UP nga të rinjtë shqiptarë në Luginë të Preshevës nuk i pranojnë”, ka thënë Arifi.
Kryetari i Bujanocit thotë se përkundër vështirësive kanë arritur të menaxhojnë mirë me pandeminë, teksa bënë të ditur se deri më tash janë vaksinuar me dy dozat e para të vaksinës antiCovid rreth 70 përqind e qytetarëve, ndërsa kanë filluar të marrin edhe dozën e tretë.
Derisa thotë se kanë mundësuar vaksinimin e atyre që kanë pasur dokumente me afat të skaduar dhe ai ka komentuar edhe rëndësinë e ndërtimit të autostradës Nish - Prishtinë, për çka thotë se fillimisht duhet të analizohet qëllimi i Serbisë./kp