Analistët: Propozimi i LVV-së, taktizim politik

Analistë politikë e cilësuan si taktizim politik ofertën që Vetëvendosja ua bëri partive opozitare. Një nga ta sugjeroi që opozita ta testojë sinqeritetin e kësaj partie, duke dhënë emra konkretë për president

Propozimi i Lëvizjes Vetëvendosje (LVV) që opozita të dalë me tre emra për president, vetëm tri ditë para skadimit të afatit kushtetues për zgjedhjen e kreut të shtetit, është cilësuar nga analistë si manovër politike.

Artan Muhaxhiri thotë se veprimi është marrë për të ndërtuar narrativë që mund të përdoret në fushatë, për të fajësuar opozitën për dështimin e zgjedhjes së presidentit.

“Oferta e kryeministrit Kurti dhe e LVV-së është krejtësisht e paqartë pasi nuk thuhet që me automatizëm do të pranohet një kandidaturë nga tri të propozuarat, por është mënyra kushtore, pra ekziston një kusht, një filtër nga LVV-ja që të pranohet ai. Edhe një gjë që është shumë e rëndësishme – oferta të tilla, në asnjë mënyrë nuk bëhen në mënyrë publike fillimisht, por ato duhet që të diskutohen, që të balancohen me anë të takimeve, kokë më kokë mes liderëve”, ka thënë Muhaxhiri.

Si taktizim politik e ka cilësuar propozimin edhe njohësja e çështjeve politike, Donika Emini.

“Ky është një hap i menduar mirë, megjithatë nga zoti Kurti, sepse LVV-ja e kontrollon procesin. Partitë u ftuan për të nominuar kandidatë, mirëpo nominimin ai ia kishte premtuar dhe ia ofroi edhe zonjës Osmani. Nuk është veç nominimi problem, është edhe mbështetja politike që këta kandidatë do të kenë. Pra nuk ka asnjë garanci që këta kandidatë do të kenë mbështetje politike nga LVV-ja”, ka thënë Emini

Ajo shtroi nevojën që opozita ta testojë Vetëvendosjen, duke dhënë kandidatë për president.

“Kanë tre nominime, të tretë munden që të kenë nga një kandidat, t’i propozojnë dhe të testojnë sinqeritetin e LVV-së në Kuvend përmes votave. Pastaj edhe nëse ka një proces të ri zgjedhore nuk do të jetë opozita ajo që do të konsiderohet bllokuesja e cila e kishte mundësinë e artë për tre kandidatë dhe nuk e shfrytëzoi atë”, ka thënë Emini.

Por, PDK-ja ka refuzuar ofertën, e LDK-ja e ka kushtëzuar.

Analisti Muhaxhiri thotë se zgjedhjet e parakohshme janë të paevitueshme.

“Është e tmerrshme që po shkojmë në zgjedhje të reja, sepse nuk shoh asnjë mënyrë për të dalë nga kjo bllokadë pa zgjedhje të reja. Pra, politikanët tanë kanë treguar një ofendim të madh në raport me qytetarët e Kosovës, me krizën e madhe sepse kanë qenë krejtësisht neglizhentë, noshalantë ndaj kësaj krize, ndaj nevojave të qytetarëve edhe për shkak të kokëfortësive të tyre, pa asnjë dallim, po e dërgojmë vendin drejt zgjedhjeve të reja”, ka thënë ai.

Brenda një periudhe prej pak më shumë se një viti, Kosova ka zhvilluar katër procese votimi: Zgjedhjet e rregullta që u mbajtën në shkurt të 2025-s, pastaj ato të rregullta lokale, një muaj më vonë është zhvilluar balotazhi mes kandidatëve më të votuar për kryetarë komune e në fundvit janë mbajtur edhe zgjedhjet e parakohshme nacionale.