1 perditesime
23:35

Fejzullahu: “Elektroseveri” s’ka të drejtë të ofrojë çmime nën ato të tregut

Ymer Fejzullahu, kryetarit i Bordit të Zyrës së Rregullatorit Energjetik, ka thënë se “Elektroseveri” nuk ka të drejtë të ofrojë nën çmime të tregut, pasi ZRRE-ja mund t’ia tërheqë licencën.

Fejzullahu thotë se sipas ligjeve në Kosovë shitja me çmim më të lirë e rrymës sesa tregu mund të hetohet penalisht.

“Në bazë të ligjeve në Kosovë, nuk lejohet të shkaktojë prishjen e tregut me ofru nën çmime të tregut. Ka të drejtë të nisin hetimet penale nga organet përgjegjëse të Kosovës. ZRRE nëse identifikon se ka prishje të tregut, e tërheq licencën e Autoriteti i Konkurrencës nis hetime”, ka thënë ai në “Interaktiv”.

Sipas marrëveshjes së arritur në Bruksel, minimumi i shfrytëzimit të licencës nga “Elektroseveri” është pesë vjet, ndërsa maksimumi 25, shtoi Fejzullahi.

“Nuk është domosdoshmërisht pesë vjet, pasi nëse nuk respektohet licenca, ZRRE-ja ka të drejtë t’ia tërheqë atë”, ka thënë ai.

23:18

Fejzullahu: Marrëveshja për energjinë nuk është më e mira e mundshme

Marrëveshja që Kosova e Serbia kanë arritur për çështjen e energjisë në katër komunat veriore të Kosovës nuk është më e mira e mundshme, sipas kryetarit të Bordit të Zyrës së Rregullatorit të Energjisë, Ymer Fejzullahu.

Në “Interaktiv” të KTV-së ai ka refuzuar të japë shumë komente se pse sipas tij kjo s’është marrëveshja më e mirë e mundshme. Megjithatë ka thënë se nga ana pozitive mund të shihet se KOSTT-i (Operatori i Sistemit, Transmisionit dhe Tregut) do të ketë qasje në asetet e veta në veri dhe se buxheti s’do të pësojë humbje nga mospagesa e energjisë.

Rezervë kryesore ai e ka quajtur aktivitetin e mirëmbajtjes për “Elektroseverin”.

“Duhet të themi se nuk është më e mira e mundshme. Do të ishte më mirë që një produkt, si energjia, të paguhej nga të gjithë qytetarët... ka pasur pengesa politike e strukturat paralele. Edhe atëherë edhe tani ka pas pengesa, por me optimizëm tash e tutje s’do të kemi humbje nga ana e KOSTT-it për shkak të shfrytëzimit të aseteve nga Serbia e s’do të ketë humbje të buxhetit”, ka thënë ai.

Sipas tij, për shkak të marrëveshjes së Brukselit, licenca për “Elektroseverin”, e lëshuar të premten, ka disa specifika.

“Është e kufizuar në katër komunat në veri. Do të duhej të diskutonim të mos ketë këso pengesa e të ishte e zakonshme. Por janë aktivitete të pazakonta të furnizuesit, siç janë ato të mirëmbajtjes që s’është e zakonshme që ta ketë çdo furnizues... Ka qenë vërejtje kryesore që e kemi pasur. Ka qenë ndër shqetësimet që e kemi pasur edhe në të kaluarën. Parimisht ‘Elektroseveri’ s’do të duhej të ishte, meqenëse merret veç me furnizim, të kishte barrën shtesë të aktiviteteve të mirëmbajtjes. KEDS-i, si i licencuar për aktivitete të OSHC-së, do të ishte më mirë të kryente edhe në veri”, ka thënë ai.

Sipas tij, ZRRE-ja ka refuzuar aplikacionin për licencim si operator të sistemit të shpërndarjes.

“Kërkesa e ‘Elektroseverit’ ka qenë edhe për furnizim edhe për OSHC. Por ZRRE-ja ka refuzuar aplikacionin për licencim si operator të sistemit të shpërndarjes. Me legjislacion e kemi monopol natyror dhe një operator të transmisionit. Me këtë marrëveshje pse s’iu lëshua licenca, kushti kryesor ka qenë që të kemi qasje në asetet e transmisionit, në nënstacionin e Valaçit dhe në asetet e distribucionit”, ka thënë ai.

Sipas tij, nënstacioni i Valaçit do të kontrollohet nga KOSTT-i. Ai ka thënë se KOSTT-i dhe KEDS-i kanë qasje të pakufizuar në asetet e tyre në katër komunat veriore.

“Meqenëse kanë insistuar që të jenë pjesë përbërëse edhe në nënstacion, kanë insistuar edhe që planin e investimeve të jetë pjesë e përpilimit ët raporteve. Me legjislacion s’i jepet dhe e kemi refuzuar këtë kërkesë. ‘Elektroseveri’ ka të drejtë gjatë dërgimit të planit zhvillimor t’i dërgojë komentet.... por asnjë të drejtë për qasjen në nënstacionin e Valaçit, pos të drejtave si furnizuesit tjerë”, ka thënë tutje Fejzullahu.

Anë pozitive të “Elektroseverit”, Fejzullahu e ka quajtur regjistrimin e saj sipas legjislacioneve të Kosovës, edhe pse është degë e një kompanie shtetërore në Serbi.