Arbëri

Apeli anulon dënimin e grafiteve të Kolektivit Feminist

Dënimi i aktivisteve, që u përfshinë në aksionin e grafiteve kundër shtypjes dhe dhunës ndaj grave, është anuluar nga Gjykata e Apelit, ka njoftuar Kolektivi për Mendim dhe Veprim Feminist.

Sipas njoftimit të këtij kolektivi, Apeli ka anuluar gjobitjen që u kishte dhënë Gjykata Themelore e Mitrovicës aktivisteve për vendosjen e grafiteve në hapësira publike.

“Haram është me i mshelë gratë! Dhunuesit e grave në burg! Virgjiniteti është shpikje e burrave! Gruja nuk o rob i burrit! Gratë e kanë vendin kudo që dojnë! Trupi jem e drejta jem! Ai që të don, nuk të rreh!”. Këto grafitë ishin cilësuar si të turpshme dhe nga Themelorja në Mitrovicë ishin gjobitur me nga 100 euro secila aktiviste.

Në ankesën e aktivisteve, Apeli ka vendosur të anulojë aktgjykimin dhe të kthejë lëndën në rivendosje. Sipas njoftimit, Apeli po ashtu ka kërkuar të vërtetohet se kush është ofenduar e turpëruar nga grafitet dhe të konstatohet nëse qëllimi i aktivistëve ka qenë prishja e qetësisë publike.

Sipas Kolektivit Feminist, vendimi i Apelit ka dëshmuar se “aktgjykimi i Themelores i bazuar në vlerësimin e grafiteve nga Policia si ‘të turpshme’ si cak të vetëm kishte disiplinimin e aktivitetit feminist”.

“Andaj, ne si aktiviste/ë feministe/ë do ta vazhdojmë rezistencën tonë të përbashkët në kundërshtim të dhunës dhe shtypjes ndaj vajzave dhe grave dhe identiteteve tjera të paprivilegjuara në vend dhe kudo tjetër”, thuhet në njoftim.