1 perditesime
Arbëri

Në Kosovë arrin grupi tretë i afganëve

Në Kosovë arrin grupi tretë i afganëve
Foto: Alban Bujari / KOHA
17:18

Në Kosovë arrin grupi tretë i afganëve

Grupi i tretë i qytetarëve afganë, arriti në Kosovë më 31 gusht. Aeroplani i forcave amerikane aterroi në Aeroportin "Adem Jashari" rreth orës 17:00 me 131 afganë në bord.

Deri më tani, Kosova ka strehuar 355 afganë, të cilët do të qëndrojnë përkohësisht në Kosovë derisa t'iu rregullohet dokumentacioni për t'u vendosur në Shtetet e Bashkuara apo në ndonjë shtet anëtar të NATO-s.

Më herët gjatë së martës, ministri i Punëve të Brendshme, Xhelal Sveçla bëri të ditur se pak pas mesnate, në Kosovë arritën 113 afganë, që ishin bashkëpunëtorë të NATO-s dhe familjet e tyre.

“Strehimi i tyre është i përkohshëm edhe bazuar në vendimet e qeverisë. Ne kemi marrë zotimin e aleatëve tanë që strehimi i tyre të zgjatë sa më shkurt që është e mundur. Bëhet fjalë për çështje javësh, mos të them muajsh”, tha ai.

Sveçla tha se nuk e di numrin e saktë të fëmijëve në grupin e dytë, por edhe të grupit të tretë që erdhi më 31 gusht. Megjithatë, ai tha se nëse është e nevojshme, Kosova do të mundësojë që ata të edukohen.

“Jam i bindur se strehimi i tyre nuk do të zgjasë aq shumë sa të fillohet me përgatitjet e vitit shkollor”, theksoi Sveçla.

Sipas tij asnjë nga shtetasit afganë nuk është i infektuar me koronavirus dhe ata do të vaksinohen me vaksinën e kompanisë Johnson & Johnson, të ofruar nga Shtetet e Bashkuara.

Ai po ashtu tha se afganët që kanë ardhur në Kosovë janë regjistruar në databazën e policisë kufitare dhe janë akomoduar në ish-kampin e Bechtel-Enka në Ferizaj.

Sipas minstrit Sveçla, tha se kushtet në këtë vend janë të mira, por ai shtoi se këta persona, që kanë ikur nga lufta, kanë nevojë edhe për ndihmë psiko-sociale, e cila "do t'iu ofrohet në koordinim me shtetet e NATO-s dhe SHBA-së".

"Ne nuk do të kursehemi me mundësitë dhe kapacitetet tona", tha Sveçla.

Në Kosovë të dielën, më 29 gusht arriti grupi i parë prej 111 qytetarët e parë afganë, të cilët kanë ikur nga shteti i tyre, pasi talibanët morën kontrollin. Prej tyre, 55 janë gra dhe fëmijë, kurse të tjerët janë burra. Ata arritën në Prishtinë më 29 gusht.

Ministri i Punëve të Brendshme në Qeverinë e Kosovës, Xhelal Sveçla, më herët pati deklaruar se rreth 2.000 shtetas afganë pritet të vijnë në Kosovë.

Shpat Balaj nga Qendra Kosovare për Studime të Sigurisë (QKSS), thotë për Radion Evropa e Lirë se Kosova ka kapacitete teknike për strehimin e tyre.

“Strehimi i qytetarëve afganë nga Kosova është një vendim i drejtë, jo vetëm nga aspekti moral dhe humanitar që Kosova po e zgjatë dorën e ndihmës për njerëzit në nevojë në kohë të krizave, por gjithashtu rikonfirmohet pozicionimi strategjik i Kosovës karshi aleatëve të NATO-s”, thotë Balaj.

Javë më parë, Qeveria e Kosovës ka bërë të ditur se do të strehojë përkohësisht qytetarët afganë, të cilët kanë punuar me forcat amerikane dhe ato të NATO-s apo edhe me organizata të huaja.

Autoritetet kosovare kanë thënë se sipas ligjeve, afganëve do t’u ofrohet strehim i përkohshëm me kohëzgjatje deri në një vit.

Qindra afganë janë strehuar edhe në Shqipëri dhe Maqedoninë e Veriut.

Shtetet e Bashkuara më 30 gusht e kanë përfunduar tërheqjen e plotë nga Afganistani pas 20 vjetësh të prezencës ushtarake atje.

Vendi tashmë është nën kontrollin e talibanëve dhe shumë afganë e kanë të paqartë të ardhmen e tyre nën sundimin taliban. \ REL

11:23

Sot pritet të vijë grupi i tretë prej 139 refugjatësh afganë

Ministri i Punëve të Brendshme, Xhelal Sveçla, ka thënë se Qeveria e Kosovës ka nxjerrë vendim për mbrojtje të përkohshme të shtetasve afganë të cilët kanë ndihmuar SHBA-në.

Ai ka thënë se tashmë kanë mbërritur dy grupe të shtetasve afganë. I fundit sipas tij ka qenë mbrëmë pas mesnatës ku 113 shtetas afganë, bashkëpunëtorë të NATO-s së bashku me familjarë të tyre kanë ardhur dhe janë proceduar sipas ligjeve të Kosovës dhe janë akomoduar në ish-kampin e Bechtel Enkas.

Sveçla ka thënë se sot do të vijnë 139 shtetas tjerë afganë me një fluturim të ri dhe të njëjtit do të akomodohen në të njëjtin kamp.

Ai ka thënë se deri tash nuk ka asnjë shtetas afganë të infektuar me COVID-19.

“Është bërë regjistrimi i tyre në databazat e Policisë së kufirit dhe do të vazhdojmë në trajtimin e tyre bazuar në ligjet e Kosovës”, ka thënë ai.

Ai ka thënë se strehimi afatshkurtër me ligj është një vit, në raste specifike edhe një vit tjetër, por sipas tij, po flitet për shtetas afganë që SHBA-ja do t’i pranojë.

Ai ka thënë se një pjesë e kampit Bondsteel është i përshtatshëm për akomodim kur do që të ketë nevojë.

Sveçla ka thënë se vaksinimi it tyre do të bëhet me vaksinat Johnson&Johnson të cilat janë ofruar nga shtetet e NATO-s.

“Numrin e saktë të fëmijëve tash nuk e di, natën e parë kanë qenë 54 gra dhe fëmijë, dje numri ka qenë më i vogël. Nuk e kam marrë ende listën e shtetasve afganë për ditën e sotme. Kushtet atje janë realitivisht të mira. Përveç shërbimeve të tjera do të ketë edhe aktivitete që do t’u shërbejnë moshave të reja. Atyre do t’u ofrohet ndihmë psiko-sociale”, ka thënë ai.

Sveçla ka thënë se është i bindur që strehimi i tyre nuk do të zgjas edhe aq shumë sa fëmijët t’i nënshtrohen procesit mësimor.

Ai ka shtuar tutje se për shpenzime të gjitha i kanë marrë përsipër SHBA-ja dhe NATO-ja.