Votohet Qeveria Kurti me 67 vota për

Me 67 vota për, 30 kundër pa asnjë abstenim është zgjedhur Qeveria Kurti.

Të pranishëm ishin 107 deputetë të Kuvendit të Kosovës. 

Pas fjalës së shefave të grupeve parlamentare e disa deputetëve të opozitës është votuar Qeveria.

Në fakt, pasi Goran Rakiq, ministër për Komunitete dhe Kthim nuk është deputet, u desh të votohet paraprakisht vetëm për të nga komuniteti serb dhe ai mori 10 vota.

“Goran Rakiq do te ketë përkrahjen e të gjithë deputetëve të Listës Serbe. Nuk vjen si pjesë e ndonjë koalicioni, por për shkak të votës që ka marrë nga populli serb”, ka thënë deputeti Igor Simiq para se të votohej.

E teksa Kurti mori fjalën pasi u zgjodh kryeministër, seancën e lëshuan deputetët e opozitës. Kryetari i PDK-së, Enver Hoxhaj ka thënë se "sot është parë një Qeveri e dytë e Kurtit. E kemi parë edhe në shkurtin e vitit të shkuar dhe ajo ishte e dobët".

Ai ka thënë se kanë pritur që mazhoranca nuk do të jetë arrogante dhe se ishte dashur të pritej koncensus për caktimin e seancës.

Ai ka thënë se nuk u pa program e as prioritete nga kjo Qeveri.

Deputetja e Partisë Demokratike e Kosovës, Ganimete Musliu, ka fyer kandidatin për kryeministër nga Lëvizja Vetëvendosje, Albin Kurtin, duke i thënë se do jetë kryeministri i parë shqiptar që fëmijët e tij, nuk i flasin gjuhën shqipe.

Kryetari i Kuvendit, Glauk Konjufca, ka reaguar menjëherë duke bërë thirrje që në Kuvend të hiqet fjalori denigrues. Ai ka thënë se ky është paralajmërim për të gjithë deputetët.

Igor Simiq, deputet i Listës Serbe, ka thënë se kandidati për kryeministër, Albin Kurti, ka shkelur që në nismë Kushtetutën. Sipas tij, Lista Serbe i ka 11 deputetë në grupin e saj parlamentar, duke llogaritur edhe deputetin e komunitetit goran.

Simiq tha se me 11 deputetë, Listës Serbe i takojnë dy ministri, e jo një sa ia ka ndarë Kurti.

“Për këtë do të ankohemi në Kushtetuese. Ua kemi dëshmuar me firma në takimet që kemi pasur se i kemi 11 deputetë dhe na takojnë dy ministri. Është nisje e keqe nga ana juaj z. mandatar, është mesazh i keq për të gjithë qytetarët. Lista Serbe nuk do të votojë qeverinë dhe do të ankohemi në Kushtetuese”, shtoi Simiq.

Në Qeverinë Kurti, pritet të jetë vetëm një ministër serb, Goran Rakiq.

Besnik Tahiri nga AAK-ja ka thënë se janë të vetëdijshëm që gara zgjedhore ka përfunduar dhe tani urojnë që të kenë tema që i bashkojnë për të mirën e vendit.

Ai ka thënë se AAK vlerëson se kjo seancë që duhej të ishte konstituive e solemne, ka filluar me një rend jodemokratik.

Tahiri ka thënë se fituesi që nga fillimi ka ndërtuar diskurs publik përjashtues.

“I shtyrë nga logjika populiste, fituesi ka zgjedhur procedurën para përmbajtjes. Kemi një ekspoze që flitet për kauzat që Kurti i ka sulmuar më së shumti. Fituesi ka zgjedhur të veprojë shkëputur para se të veprojë në bashkëpunim. Ne jemi kundër secilës logjikë dominuese e arbitrare. Refuzojmë këtë kulturë të njëanshme. Mbi çdo interes të veçantë qëndron kultura jonë politike. Ajo që dua të them është se jemi të vetëdijshëm për sfidat megjithatë shihet qartë se qasja të cilën e ka marrë fituesi është qasje arbitrare që nuk i duhet vendit”, ka thënë ai.

Ai ka thënë se po marrin përgjegjësi opozitarizmin, që ta ballafaqojnë Kurtin me të gjitha ato që i ka adresuar në opozitë.

Sipas tij, Kurti gjithmonë ka kritikuar dhe asnjëherë nuk ka dhënë alternativë.

Tahiri ka thënë se refuzojnë të votojnë Qeverinë Kurti.

Enver Hoxhaj, ushtrues i detyrës së kryetarit të PDK-së, në fjalën e tij në seancën e Kuvendit ku pritet të votohet Qeveria Kurti 2, ka folur për ato që sipas tij, VV-ja dhe Albin Kurti në vazhdimësi kanë kritikuar në kohën sa PDK-ja ishte në pushtet.

Pasi ka folur gjatë e ka kërkuar sqarime nga Kurti për të gjitha marrëveshjet që sipas tij, janë kritikuar në forma të dhunshme, sipas tij, edhe në mënyra të dhunshme, ai ka thënë se PDK-ja nuk do ta votojë Qeverinë Kurti 2.

“Për tri arsye s’do ta votojmë, jemi kundër jush si përmbajtje, si program dhe si përbërje”, shtoi ai.

Hoxhaj e ka quajtur bashkëpunimin e Albin Kurtit dhe Vjosa Osmanit “koalicion për karrige”.

“Unë e njoh gjatë dhe kam pasur mundësinë të bashkëpunojë me z. Kurti, ajo që e kam dëgjuar çdoherë në Kuvend më shumë e kam pak te ky vetëdijen politike se sa njeriun, sot më shumë e pash njeriun me një listë të dëshirave se sa vetëdijen që e prisja, e ajo do të ishte një program i plot qeveritar, jo një ekspoze. Në atë ekspoze nuk pashë plane konkrete as si do të sigurohen vaksinat, as kur do të vijnë, nuk dëgjova një politikë të fortë ekonomike që duhet të adresonte problemet e pandemisë, nuk e pashë arsimin, nuk e pashë politikën e jashtme si një orientim strategjik, se si do te duket Kosova në vitet ardhshme”, ka thënë Hoxhaj.

Deputeti i Lidhjes Demokratike të Kosovës, Lumir Abdixhiku, ka deklaruar se nga Qeveria e ardhshme Kurti pret që vendi të ketë zgjidhje për çdo problem dhe stabilitet në shumë çështje. Ai para deputetëve ka deklaruar se roli i LDK-së si opozitë do të jetë për të ofruar stabilitet, duke respektuar rolin e saj opozitar.

“Nga ju presim zgjidhje për ta gjitha problemet që i keni përmendur, zgjidhje për të gjitha rezolutat e ngritura nga ju dhe të tjerët”, ka deklaruar ia.

Deputeti i LDK-së ka shtuar se vullneti i qytetarëve i shprehur në zgjedhjet e 14 shkurtit duhet të respektohet mirëpo sipas tij, edhe opozita duhet t’i përfaqësojë interesat e votuesve.

“Respektimi i këtij vullneti s’do duhej të shihej si akt i madh por vetëm si respektim i demokracisë. Ne si LDK këtë kapitull e mbajmë të mbyllur dhe respektojmë mendimin e njerëzve që sot janë me ju e nesër me ne. Shumica prej 50% duhet t’i kujtojë vetes që 50% tjetër e ka opozitë dhe ndonëse pozita është më e madhja, s’është e tëra”, ka shtuar ai.

Abdixhiku ka kritikuar prezentimin e planeve të Kurtit për qeverinë e ardhshme duke thënë se nuk u ka njoftuar më parë për këtë ekspoze, në mënyrë që ta vlerësojnë.

“LDK-ja me 15 deputetë do mbajë rol konstruktiv dhe opozitar, do mbesim zë mbrojtës i pakompromis i vendit”, ka thënë tutje.

Mimoza Kusari-Lila ka thënë se Kosova nuk është njëjtë pas 25 marsit të vitit 2020, dhe vendi nuk është njëjtë pas 14 shkurtit.

Ajo ka thënë se çfarë qytetarët kanë thënë është se vullneti i tyre duhet të dëgjohet.

Kusari-Lila ka thënë se është hera e parë që ka një rezultat zgjedhor që nuk lë asnjë dyshim për suksesin e këtyre zgjedhjeve.

“Asnjëherë nuk e kemi pasur më të rëndë situatën në terren. Demokracia, qeverisja e mirë dhe modernizimi nuk mund të importohen nga jashtë. Të gjithë ne e kemi fatin e vendit në dorë. Ju thërras të gjithë juve që të jemi bashkë në këtë rrugëtim për shkuarjen e re të historisë së Kosovës”, ka thënë ajo.

Kandidati për kryeministër, Albin Kurti, në ekspozenë e tij para deputetëve të porsazgjedhur, ka thënë se më nuk do të jetë asnjë kompromis nga Kosova.

Sipas tij, kompromiset janë bërë me Pakon e Ahtisaarit për shpalljen e pavarësisë dhe se pas kësaj nuk do të bëhet më asnjë.

“Asnjë kompromis tjetër nuk do ta bëjmë, këtë duhet të thënë qartë në çdo tryezë. Orientimi ynë është i qartë me SHBA-në dhe aleanca trans-atlantike do të thellohet. Rruga drejt BE-së mund të jetë sfiduese, por s’ka alternativë tjetër”, ka thënë Kurti.

Kandidati për kryeministër nga Lëvizja Vetëvendosje, Albin Kurti, ka deklaruar se procesi i vettingut në drejtësi do të vazhdojë aty ku kishte mbetur në Qeverinë e kaluar Kurti.

Ai para deputetëve ka thënë se vettingu do bëhet ndaj institucioneve të drejtësisë në nivele të larta.

“Do të jetë një proces i mirë përgatitur, fer dhe jo hakmarrës që institucionet e vendit të ofrojnë siguri dhe drejtësi”, ka deklaruar ai.

Kurti tutje ka thënë se do bëjnë reforma në sistemin arsimor, duke i shndërruar shkollat në vende ku dalin shkencëtarë.

“Do bëjmë ndërlidhjen e arsimit me tregun e punës ku diploma siguron një vend pune dhe do kthejmë dinjitetin e mësimdhënësve”, ka thënë ai.

Kandidati për kryeministër, Albin Kurti, në ekspozenë e tij si kandidat për të parin e Qeverisë ka thënë se sot është një ditë e re për të gjithë qytetarët

Pas shumë pengesave, ai ka thënë se ajo që dukej e paarritshme është bërë realitet.

Kurti ka thënë se janë mbledhur për të jetësuar vullnetin e qytetarëve më 14 shkurt.

“Ashtu edhe siç ka votuar, populli pret që ne të zgjedhim Qeverinë që t’i fillojmë punët e mëdha. Sfidat para qeverisë së re janë të reja e të vjetra. Pandemia mbetet sfidë kryesorë. Ne do të fillojmë me plan për uljen e rasteve me COVID-19. Brenda vitit synojmë sigurimin e vaksinave për 60 për qind të popullsisë. Shëndetësia, arsimi, drejtësia të gjitha kanë nevojë për reformë. Në Kosovën e papunë çdo vit është më i rëndë për qytetarët. Ankthi për gjetjen e një vendi të punës është shtuar nga pandemia. E kuptoj dhe e di sa e vështirë është jeta për qytetarët sepse kemi varfëri të lartë. Do të jetë rrugë e gjatë dhe e mundimshme por së bashku do të arrijmë”, ka thënë ai.

Ka nisur të mbahet seanca në Kuvendin e Kosovës ku pritet të votohet Qeveria Kurti 2.

Seanca ishte paraparë të fillonte nga ora 17:00.

Deri tash një numër i madh i deputetëve nga të gjitha partitë janë mbledhur në sallë.

Arben Gashi nga LDK ka thënë se nuk do ta votojnë Qeverinë Kurti.

Ai ka thënë se ka dyshime të shumta për mbajtjen e kësaj seance dhe kandidatin i cili do të propozohet për kryeministër.

“Kemi një person që është dekretuar për kryeministër ndaj të cilit ka dënim në tri vitet e fundit. Është raportuar në media që LDK-ja ka votuar një serb për nënkryetar të Kuvendit dhe kjo nuk është e vërtetë. LDK-ja nuk e ka përkrahur. Nuk do ta votojmë Qeverinë Kurti”, ka thënë ai.

Lideri i Lëvizjes Vetëvendosje, Albin Kurti, ka mbërritur në Kuvendin e Kosovës, ku pritet të propozohet për kryeministër të vendit nga partia e tij.

Përveç deputetëve të Lëvizjes Vetëvendosje, edhe deputetë të PDK-së janë duke hyrë në sallë.

I pari ka shkuar kryetari i PDK-së Enver Hoxhaj i cili nuk ka përshëndetur Kurtin.

Pas tij kanë shkuar edhe deputetë të tjerë të PDK-së.

Në sallë kanë shkuar edhe kryetari i Kuvendit Glauk Konjufca e nënkryetarë të Kuvendit.

Në sallë tashmë janë edhe disa deputetë të LDK-së.

Kujtojmë që në zgjedhjet e 14 shkurtit të këtij viti Kurtit nuk i ishte lejuar të futej në listën zgjedhore për shkak të një vendimi të Gjykatës Kushtuese, ku ndalonte të kandidonin në zgjedhje personat që ishin të dënuar në tri vitet e fundit.

Deputetët e Lëvizjes Vetëvendosje janë duke u mbledhur në sallën e seancave në Kuvend ku pritet të votohet Qeveria Kurti 2.

Ndonëse Kryesia e Kuvendit është mbledhur nga ora 16:30 për të caktuar orën e mbajtjes së kësaj seance, ende nuk ka ndonjë deklarim zyrtar.

Më herët është thënë se seanca do të mbahet nga ora 17:00.

Është mbledhur Kryesia e Kuvendit të Kosovës.

Kjo mbledhje vjen pas kërkesës së 52 deputetëve për seancë të jashtëzakonshme për votimin e Qeverisë.

Seanca për votimin e Qeverisë Kurti pritet të mbahet nga ora 17:00.

Lëvizja Vetëvendosje iu është përgjigjur letrës së u.d të presidentit, Glauk Konjufcës për propozimin e mandatarit për kryeministër. KOHA mëson nga Grupi Parlamentar i VV-së se Konjufca ia ka propozuar anëtarëve të Kuvendit të Kosovës kandidatin për kryeministër, derisa Lëvizja Vetëvendosje i ka bërë nënshkrimet për të ftuar seancë të jashtëzakonshme në orën 17:00.

"Grupi Parlamentar i Lëvizjes Vetëvendosje përmes kësaj kërkese kërkon thirrjen e seancës së jashtëzakonshme për votimin e qeverisë, duke marrë parasysh rrethanat e vakumit institucional dhe vullnetin e qytetarëve të Republikës të dalë nga zgjedhjet e parakohshme të 14 shkurtit 2021, si dhe me faktin se Republika e Kosovës nuk ka qeveri kushtetuese me legjitimitet qytetarë”, thuhet në letrën e Grupit Parlamentar të VV-së.

16:20- Kryesia e Kuvendit mblidhet në orën 16:30

Kuvendi i Kosovës ka njoftuar se mbledhja e Kryesisë do të mbahet nga ora 16:30.

Sipas njoftimit mbledhja do të mbahet për caktimin e seancës së jashtëzakonshme për votimin e Qeverisë.

Seanca do të mblidhet me kërkesën e 52 deputetëve.

Ushtruesi i detyrës së presidentit, Glauk Konjufca, i ka dërguar letër liderit të Lëvizjes Vetëvendosje, Albin Kurtit, që ky subjekt ta propozojë mandatarin për kryeministër.

Duke iu referuar dispozitave kushtuese dhe njoftimit të KQZ-së, Konjufca në letër ka theksuar se VV-ja ka fituar shumicën e nevojshme në Kuvend për të krijuar Qeverinë e re.

"Duke pasur parasysh dispozitat e lartëcekura të Kushtetutës së vendit, si dhe njoftimin e KQZ-së, dhe duke pasur parasysh se Lëvizja Vetëvendosje e ka të drejtën e propozimit të kandidatit për formimin e Qeverisë pas zgjedhjeve të 14 shkurtit, si u.d President i vendit ju lus që të propozoni emrin e mandatarit për kryeministër. Ju lutem pranoni konsideratën time më të thellë”, thuhet në letër.

© KOHA. Të gjitha të drejtat janë të rezervuara.