Numërimi i votave të zgjedhjeve të mbajtura më 7 qershor i është afruar fundit. Deri tash janë numëruar 96.60 për qind e votave apo 2760 nga 2857 kuti votimi në total.
Tash kur po numërohen edhe votat e diasporës, Lëvizjes Vetëvendosje i janë shtuar gjithsej pesë mandate duke siguruar 53 ulëse në Kuvend. Në këtë fazë të numërimit, partia ka fituar mbi 47.08 për qind të votave të procesuara. Të martën VV-ja ka fituar ulësen e pestë falë votave nga diaspora. Fillimisht, nga votat e numëruara brenda Kosovës, partia kishte siguruar 48 mandate parlamentare.
Partia Demokratike e Kosovës ka 22 ulëse dhe renditet e dyta me 19.49 për qind të votave, Lidhja Demokratike e Kosovës ka 18 ulëse dhe rënditet e treta me 16.74 për qind dhe Aleanca për Ardhmërinë e Kosovës rënditet e katërta me shtatë ulëse në Kuvend dhe me 6.73 për qind të votave.
Komisioni Qendror i Zgjedhjeve ka pranuar rreth 85 mijë zarfe me vota nga diaspora. Deri tani janë përpunuar të dhënat e afërsisht 11 mijë votave.
Për formimin e Qeverisë dhe zgjedhjen e kryetarit të Kuvendit nevojiten së paku 61 vota në Kuvend. Në mandatin e kaluar, Vetëvendosje arriti ta formojë qeverinë me mbështetjen e deputetëve nga komunitetet joshumicë.
Ndërkohë, për zgjedhjen e presidentit kërkohet pjesëmarrja e të paktën 80 deputetëve në procesin e votimit, një çështje që ishte ndër arsyet kryesore që çoi vendin në zgjedhjet e 7 qershorit.
Në zgjedhjet e fundit votuan rreth 725 mijë qytetarë brenda Kosovës, ndërsa mbi 100 mijë shtetas që jetojnë jashtë vendit e ushtruan të drejtën e votës përmes përfaqësive diplomatike ose me postë.
Edhe tetë kuti të panumëruara, KQZ-ja paralajmëron përmbylljen e procesit sot
Photo: Driton Paçarada
Komisioni Qendror i Zgjedhjeve pritet që gjatë ditës së sotme, e mërkurë, të përmbyllë numërimin e të gjitha fletëvotimeve që i takojnë zgjedhjeve të parakohshme për Kuvendin e Kosovës.
Gjatë ditës së sotme, pritet të numërohen tetë kutitë e mbetura, në të cilat janë sistemuar fletëvotimet nga votimi me postë jashtë Kosovës dhe fletëvotimet nga votimi me kusht dhe i personave me nevoja të veçanta.
Lajmi është bërë i ditur nga Zëdhënësi i KQZ-së, Valmir Elezi.
“Gjatë ditës së sotme, më konkretisht në ditën e 10 pas ditës së zgjedhjeve, KQZ do të përmbyllë aktivitetet paszgjedhore, të cilat, KQZ i zhvillon për të ardhur deri tek rezultatet përfundimtare të zgjedhjeve. Në Qendrën e Numërimit dhe Rezultateve do të numërohet pjesa e mbetur e fletëvotimeve nga votimi jashtë Kosovës dhe fletëvotimet nga votimi me kusht dhe i personave me nevoja të veçanta”, ka thënë ai.
Ndërkaq, KQZ-ja mëngjesin e së mërkurës ka përditësuar të dhënat nga procesi i numërimit në QNR. Sipas këtyre të dhënave, nga 223 kuti votimi në të cilat janë sistemuar fletëvotimet nga votimi me postë janë numëruar 215 dhe 8 të tjera do të numërohen gjatë ditës.
Njëkohësisht, KQZ-ja ka filluar me numërimin e fletëvotimeve nga votimi me kusht, i cili është mundësuar në 52 vendvotime me kusht, ku janë evidentuar 8,751 votues. Po ashtu, ka filluar edhe numërimi i fletëvotimeve nga votimi i personave me nevoja të veçanta, i realizuar jashtë vendvotimeve, ku për këtë lloj votimi kanë qenë të regjistruar 3,144 votues./ksp