Lëvizja Vetëvendosje ka arritur fitore bindëse në zgjedhjet e parakohshme të së dielës. Sipas rezultateve preliminare të Komisionit Qendror të Zgjedhjeve, LVV-ja ka rritjen më të madhe me 49.3 për qind të votave ose rreth 430 mijë vota, 7 për qind më shumë krahasuar me zgjedhjet e 9 shkurtit, pa i llogaritur votat nga diaspora, votat me kusht dhe ato të personave me nevoja të veçanta. Ky rezultat ia mundëson asaj ta krijojë qeverinë e vetme, me komunitetet joshumicë joserbe. Në vendin e dytë renditet PDK-ja me 21,01 për qind, derisa rënien më të madh e ka pësuar Lidhja Demokratike duke rënë nën 14 për qind
Vetëvendosje merr gjithçka
Photo: Driton Paçarada
Me një pjesëmarrje prej 44.59 për qind, Lëvizja Vetëvendosje ka dalë forcë e parë me 49.3 për qind të votave në zgjedhjet e së dielës.
Sipas rezultateve preliminare të Komisionit Qendror të Zgjedhjeve, LVV-ja shënoi rritjen më ta madhe, duke fituar mbi 49 për qind të votave ose rreth 430 mijë vota. Rritje krahasuar me zgjedhjet e 9 shkurtit të këtij viti, kur VV-ja fitoi 396 mijë e 787 vota apo 42,30 për qind.
Në vendin e dytë është renditur Partia Demokratike e Kosovës (PDK) me 21,01 për qind ose 183,258 vota, rezultat afërsisht i ngjashëm me atë të shkurtit, apo një rritje prej 1 për qind. Lidhja Demokratike e Kosovës (LDK) ka shënuar rënien më të madhe krahasuar me zgjedhjet e 9 shkurtit, duke marrë 13,56 për qind të votave, përkatësisht 118 mijë e 490 vota. Në zgjedhjet e fillimvitit, LDK-ja pati marrë 171 mijë e 357 apo 18,27 për qind.
Aleanca për Ardhmërinë e Kosovës (AAK), mbështetur në rezultatet preliminare ka arritur ta kalojë pragun zgjedhor me 5,68 për qind ose 49,571 vota.
Nisma Socialdemokrate nuk ka arritur ta çajë pragun duke mbetur nën të me vetëm 1,72 për qind të votave.
Lista Serbe si partia më e madhe serbe ka deklaruar se i ka siguruar të gjitha dhjetë ulëset e rezervuara për komunitetin serb. Kryetari i Listës, Zllatan Ellek në një konferencë për media ka thënë se partia që ai udhëheq i ka marrë 90 për qind të votave të komunitetit serb dhe të gjitha ulëset në Kuvend. Partia e Rashiqit deri tash ka marrë 4388 vota apo më shumë se 11 për qind të votave që kanë shkuar për partitë e komunitetit serb. Rashiqi kishte siguruar një ulëse edhe në zgjedhjet e shkurtit. Si i vetmi deputet i partisë së tij, ai u zgjodh nënkryetar nga komuniteti serb pas refuzimit të shumicës në legjislaturën e nëntë për të votuar propozimet nga Lista Serbe.
LVV-ja me 56 mandate, rrugës për ta formuar e vetme qeverinë
Përkthyer në mandate, Lëvizja Vetëvendosje me pak nën 50 për qind të votave ka siguruar 56 ulëse në Kuvend.
Me përllogaritjen sipas formulës “D’Hondt”, Partia Demokratike e Kosovës me 21 për qind të votave ka 23 ulëse. Lidhja Demokratike ka 15 ulëse, ndërsa Aleanca për Ardhmërinë e Kosovës ka siguruar 6 ulëse.
Në krahasim me zgjedhjet e shkurtit, Lëvizja Vetëvendosje është rritur në Kuvend për tetë ulëse, nga 48 sa i kishte.
Ndërkaq, PDK-ja e humbi një ulëse. LDK-ja ka humbur pesë ulëse, nga 20 sa i kishte. AAK-ja në koalicion me Nismën ka pasur 8 ulëse. Kjo përllogaritje nuk i përfshin edhe votat me postë dhe ato në përfaqësi diplomatike.
20 ulëset e tjera ndahen në 10 për komunitetin serb dhe 10 për komunitetet tjera. Për zgjedhjen e kryetarit të Kuvendit dhe më pas votimit të qeverisë, janë të domosdoshme 61 vota.
Lëvizja Vetëvendosje ka dalë e para edhe në shumicën e komunave të vendit. Është konfirmuar forca kryesore në 24 komuna, përfshirë ato të cilat llogariten bastione të partive opozitare.
Është e para në Gjakovë, Gjilan, Dragash, Istog, Kaçanik, Klinë, Fushë-Kosovë, Kamenicë, Mitrovica e Jugut, Lipjan, Obiliq, Rahovec, Pejë, Podujevë, Prishtinë, Prizren, Shtime, Suharekë, Ferizaj, Viti, Vushtrri, Malishevë, Junik dhe Hani të Elezit. Partia Demokratike e Kosovës është e para në Drenas e Skenderaj. Në Deçan ka dalë e para Aleanca për Ardhmërinë e Kosovës, kurse në Mamushë KDPT-ja.
Zgjedhjet parlamentare të 28 dhjetorit kanë hyrë në histori sa i përket daljes së qytetarëve në vendvotimet brenda Kosovës. Të drejtën e votës e kanë shfrytëzuar 899 mijë e 521 qytetarë, pa i llogaritur votat nga diaspora, votat me kusht dhe ato të personave me nevoja të veçanta.
Në përqindje, i bie se të drejtën e votës e kanë shfrytëzuar afro 45 për qind e atyre me të drejtë vote. Rekordi i pjesëmarrjes në zgjedhje ishte vendosur më 9 shkurt sivjet. Atë kohë në qendrat e votimit në Kosovë kishin votuar 871 mijë e 662 votues. Ndërkaq bashkërisht me votat e diasporës dhe atyre në përfaqësi, numri kishte mbërritur në 966 mijë vota.
Kurti: Institucionet do t’i krijojmë shpejt, pres bashkëpunim me opozitën
Nga selia e Vetëvendosjes, kandidati për mandatin e tretë qeverisës, Albin Kurti, u është drejtuar qytetarëve si fitues i zgjedhjeve, tek tha se janë rrugës për ta thyer edhe rekordin e 21 shkurtit të vitit 2021.
“Më 9 shkurt fitoi Lëvizja Vetëvendosje, më 28 dhjetor fitoi populli dhe Republika e Kosovës. Urime fitorja më e madhe në histori të vendit”, ka thënë ai.
Kurti tutje u shpreh se sapo të certifikohen rezultatet, do të krijojnë institucionet dhe të vazhdojnë punët. Përmendi marrëveshjet ndërkombëtare, duke thënë se pret bashkëpunimin me partitë opozitare për t’i çuar përpara tek ato i falënderoi edhe për kampanjën zgjedhore.
“Na presin shumë punë përpara. Duhet të ecim përpara, pa vonesa. Sapo të certifikohen rezultatet, aq më shpejt do na duhet të krijojmë institucionet dhe të vazhdojmë me punën e mirë. Na pret Plani i Rritjes i BE-së në vlerë 880 milionë euro dhe tri marrëveshje me Bankën Botërore në vlerë 120 milionë. Pra mbi 1 miliard. Ftoj nga tash partitë opozitare për bashkëpunim në Kuvend për marrëveshjet ndërkombëtare, marrëveshjet e mira dhe për interesin publik të qytetarëve”, ka deklaruar Kurti.
Ai është pyetur edhe për çështjen e presidentit të vendit pasi t’i skadojë mandati Vjosa Osmanit në mars të vitit të ardhshëm.
Kurti tha se për këtë do të duhet të flitet edhe me opozitën. Por paraprakisht u shpreh se do të takohet edhe me presidenten aktuale, Vjosa Osmani.
“Na duhet të bisedojmë edhe me opozitën për çështjen e presidentit. Paraprakisht, do të ulem me presidenten aktuale dhe më pas do t’i ndërmarrim edhe hapat e ardhshëm në mënyrë që të ecim përpara bashkë sepse dihet që si për marrëveshjet ndërkombëtare, ashtu për zgjedhjen e presidentit, duhet së paku të qëndrojnë në sallë 80 deputetë edhe nëse votojnë kundër. Ky është hapi i tretë”, ka thënë Kurti.
Kryetari i Vetëvendosjes mori pjesë edhe në festën me simpatizantë të kësaj partie, ku tha se fitorja e 28 dhjetorit është e popullit të Kosovës, ndryshe prej asaj të 9 shkurtit kur fitoi VV-ja me partnerët e koalicionit.
“Kësaj radhe ka fituar populli dhe Republika, e bëri të mundur fitoren, vizioni dhe programi ynë. Të gjitha zotimet tona do t’i përmbushim një nga një. Ju jeni kuptimi i ekzistencës së pozitave dhe funksioneve tona”, ka thënë Kurti tek premtoi realizim të zotimeve të dhëna gjatë fushatës zgjedhore.
Ndryshe prej Kurtit që foli për bashkëpunim me opozitën, nuk munguan talljet e partnerëve që ishin në koalicion me LVV-në pas rezultatit të zgjedhjeve të së dielës. Kryetari i Mitrovicës, njëherësh bashkëkryetar i Listës Guxo, Faton Peci është marrë me LDK-në duke ia kujtuar refuzimin që të futej në koalicion me VV-në pas zgjedhjeve të 9 shkurtit.
“Hajdi n’qeveri, jo s’po dojmë, hajdi more, jo s’po dojmë. Ani shkoni pra”, ka thënë Peci në një video.
Abdixhiku e merr përgjegjësinë për rezultatin, s’e përjashton dorëheqjen
Kryetari i Lidhjes Demokratike të Kosovës, Lumir Abdixhiku, ka marrë përgjegjësinë për rezultatin në zgjedhjet e 28 dhjetorit, në një paraqitje pak para mesnatës të dielën. Ai ka njoftuar se ditëve në vijim do ta ftojë Kuvendin e partisë për të shqyrtuar të gjitha çështjet dhe përgjegjësitë si kryetar.
Ai ka deklaruar se rezultati i LDK-së nuk është ai që e kanë pritur dhe ky do të jetë moment reflektimi, tek shtoi se e respekton verdiktin e qytetarëve.
“Duke marrë përgjegjësinë, ditëve në vijim do ta thërras Kuvendin e LDK-së dhe para tij do t’i shpalosim e shqyrtojmë të gjitha çështjet dhe përgjegjësit që mbaj si kryetar. Rezultati i LDK-së nuk është ai që e kemi pritur dhe dëshiruar. Është moment reflektimi. Kur qytetarët flasin, ne duhet të dëgjojmë. Demokracia funksionon kur udhëheqësit mbajnë përgjegjësi, edhe kur kanë humbje të tilla”, ka thënë Abdixhiku, duke mos e përjashtuar as dorëheqjen.
Ai u shpreh tutje se në këto pesë vjet drejtimi të LDK-së ka vepruar ashtu siç ka besuar se është më e mira për partinë.
“Këto pesë vjet, kam vepruar ashtu siç kam besuar se është më e mira për LDK-në. Megjithatë, sot them hapur nuk kam arritur ta çojë LDK-në aty ku duhet të jetë. Kemi ndërtuar ekip të mirë, kemi ndërtuar fushatë të dinjitetshme, por ky është verdikti qytetar dhe përulemi para tij. Qytetari gjithmonë ka të drejtë”, ka shtuar ai.
Abdixhiku e uroi edhe fituesin e zgjedhjeve, Albin Kurti.
“Më lejoni të urojë fituesin. Shteti është mbi secilin prej nesh. Le të shpresojmë se qytetarët kanë zgjedh drejt këtë herë”, ka deklaruar ai.
Pas rënies së LDK-së, nuk kanë munguar as thirrjet brenda kampit të tyre për reflektim.
Arben Gashi, kandidat për deputet i Lidhjes Demokratike të Kosovës, ka kërkuar veprime të përgjegjshme, pas rezultateve të para të zgjedhjeve të 28 dhjetorit.
“Kur votuesit flasin, rezultati nuk mund të injorohet. Kërkohet reflektim dhe veprim i përgjegjshëm”, ka shkruar Gashi në Facebook.
E ish-deputetja e Lidhjes Demokratike të Kosovës, Jehona Lushaku-Sadriu, u ka bërë thirrje votuesve të partisë ta mbajnë kokën lart.
“Për të gjithë votuesit e sotëm të LDK-së: kokën lart! Ju dua!”, ka shkruar ajo.
Kryetari i AAK-së, Ramush Haradinaj përmes një deklarimi pas mbylljes së kutive të votimit ka thënë se i kanë 8 për qind apo 9 ulëse në Kuvend, tek shtoi se dështon koalicioni me PDK-në e LDK-në
“AAK-ja nuk ka vënë dhe nuk qet kushte për opozitën. Por tani është momenti që të reflektojmë. Nga ne të dy partitë e kanë një partner dhe jemi të gatshëm për bashkëpunim e t’i japin shumicën”, ka thënë ai.
Nga kampi i PDK-së që doli si parti e dytë nuk pati deklarim pas rezultateve
Qetë dhe pa incidente
I gjithë procesi i votimit që nga hapja e vendvotimeve në orën 07:00 ka rrjedhur në atmosferë të qetë, me disa parregullsi kryesisht të natyrës procedurale e teknike. Është raportuar për ndërprerje të energjisë elektrike në disa qendra të votimit, por nuk ka pasur incidente serioze, që do të mund të cenonin integritetin e zgjedhjeve.
Krahas thirrjeve për dalje në votime, presidentja Vjosa Osmani pasi ka votuar në kryeqytet ka thënë se shpreson në krijim sa më të shpejtë të institucioneve.
Sipas saj, zgjedhjet e 28 dhjetorit duhet të rezultojnë me krijim sa më të shpejt të Kuvendit dhe qeverisë, për të çuar përpara procese të domosdoshme për vendin.
“Uroj që Republika jonë të ketë zgjedhje të qeta, të rregullta, demokratike. Uroj të kemi zgjedhje me pjesëmarrje sa më masive të qytetarëve. Zgjedhjet janë proces i rëndësishëm demokratik. Shpresoj që rezultatet të rezultojnë me krijim sa më të shpejt të parlamentit dhe zgjedhje të qeverisë, që janë të domosdoshme për procese të rëndësishme të brendshme dhe ndërkombëtare për Kosovën”, ka thënë presidentja.
Sipas Policisë së Kosovës, zbatimi i planit dhe bashkëpunimi e koordinimi ndërinstitucional ka ndikuar që procesi gjatë ditës së diel të shkojë pa ndonjë incident madhor.
“Zbatimi i planit policor, bashkëpunimi dhe koordinimi ndërinstitucional ka ndikuar në mënyrë pozitive që i tërë procesi zgjedhor të kalojë i qetë dhe pa ndonjë incident madhor që do të kishte penguar apo cenuar procesin zgjedhor, andaj në aspektin e sigurisë vlerësohet se procesi zgjedhor ka kaluar i qetë dhe pa incidente serioze. Një ndër qëllimet e planit operativ policor, ka qenë garantimi i një ambienti të qetë për votime, inicimi dhe procedimi i çdo vepre të mundshme penale në koordinim me organet e drejtësisë dhe dërgimi para organeve të drejtësisë të të gjithë atyre që bien ndesh me ligjin, konkretisht cenojnë procesin zgjedhor”, thuhet në njoftimin e policisë.
Gjithashtu, në koordinim me Prokurorinë e Shtetit, Policia e Kosovës ka njoftuar se ka iniciuar pesë raste penale.
“Policia e Kosovës në bashkëpunim dhe koordinim me Prokurorinë e Shtetit, lidhur me procesin zgjedhor, sot ka iniciuar 5 (pesë) raste penale si; ‘Cenimi i fshehtësisë së votimit’, ‘Cenim i përcaktimit të lirë të votuesve’, ´Pengim i procesit të votimit´ dhe ‘Asgjësimi i dokumenteve të votimit’, ku personat e përfshirë në raste me vendim të prokurorëve kompetent janë liruar në procedurë të rregullt. Janë trajtuar 30 (tridhjetë) informata dhe në 5 (pesë) raste janë evidentuar me ‘shënim zyrtar’, thuhet në njoftimin e policisë.
Po ashtu në bashkëpunim dhe koordinim me organet e drejtësisë, janë trajtuar dhe iniciuar edhe raste të tjera, raste këto të cilat nuk ndërlidhen me procesin zgjedhor.
Prokurori i Shtetit përmes një njoftimi ka bërë të ditur se në zgjedhjet e parakohshme nacionale të 28 dhjetorit, asnjë person nuk ka qenë i ndaluar për vepra penale.
Sipas njoftimit, janë pranuar informata dhe pas verifikimit, deri në mbylljen e procesit të votimit, u konstatua se vetëm pesë prej tyre paraqesin elemente të veprës penale kundër të drejtave të votimit.
“Rasti i parë është iniciuar në fshatin Ranillug –Gjilan, për veprën penale nga neni 210 i Kodit Penal të Kosovës: “Cenimi i përcaktimit të lirë të votuesve”, ku e dyshuara me vendim të prokurorit është liruar në procedurë të rregullt. Rasti i dytë është iniciuar në Zhegër - Gjilan, për veprat penale nga nenet 214 dhe 215 të Kodit Penal të Kosovës “Pengim i procesit të votimit” dhe “Cenimi i fshehtësisë së votimit”, ku i dyshuari me vendim të prokurorit është liruar në procedurë të rregullt. Rasti i tretë është iniciuar në Prizren, për veprën penale nga neni: 217 “Asgjësimi i dokumenteve të votimit”, ku i dyshuari me vendim të prokurorit është liruar në procedurë të rregullt. Rasti i katërt është iniciuar në Drenas, për veprën penale nga neni: 215 “Cenimi i fshehtësisë së votimit”, ku i dyshuari me vendim të prokurorit është liruar në procedurë të rregullt. Edhe rasti i pestë është iniciuar për “Cenim të fshehtësisë së votimit” në Suharekë”, thuhet në njoftimin e Prokurorit të Shtetit.
Rasti i Ranillugut lidhet me dyshimin se kryetarja e Komunës nga Lista Serbe, Tanja Antiq, është intervistuar nën dyshimin se ushtroi ndikim te votuesit për votim sipas udhëzimeve të saj.
Në Graçanicë një person është shoqëruar në stacionin policor pas dyshimit se ka ndikuar te qytetarët për të votuar dhe po ashtu ka kërkuar raporte shëndetësore nga persona të caktuar, që të asistohen gjatë votimit.
Ankesa për votimin me asistencë
Edhe në këto zgjedhje u raportua për probleme të votimit me asistencë. Shumë qytetarë u ankuan se atyre që nuk dinë shkrim-lexim nuk iu lejua të votojnë me asistencë.
Zëvëndësavokatja e Popullit Majlinda Sinani-Lulaj, ka thënë se nga raportimet që kanë marrë nga kolegët në terren, ankesa ka pasur kryesisht për vështirësi në votimin me asistencë.
Sipas saj, përveç personave me aftësi të kufizuara, që për t’iu lejuar që dikush t’i asistojë në procesin e votimit duhet të kenë një dëshmi nga institucionet për aftësinë e kufizuar, as personave që nuk dinë shkrim-lexim nuk u është lejuar të votojnë me asistencë.
“Ekziston edhe një farë konfuzioni edhe te vetë votuesit, në kuptimin asaj që tek pasi shkojnë edhe marrin një përgjigje nga zyrtarët që janë përgjegjës se nuk mund të votojnë pa një dëshmi për aftësinë e kufizuar të personat me aftësi të kufizuara, nuk janë rehat me këtë lloj përgjigje, por gjithashtu kemi edhe rastet kur kemi personat të cilët nuk janë të aftë të shkruajnë dhe të lexojnë dhe kanë problem me procesin e votimit, për të cilët nuk ka një sqarim, ose të paktën nuk jemi në dijeni që ka një sqarim të detajuar se si duhet vepruar me ta”, ka thënë Sinani-Lulaj në emisionin Zgjedhjet në KOHË.
Gjatë ditës së diel, KQZ-ja konfirmoi se ka pranuar ankesa për probleme më energjinë elektrike. Sipas saj, janë raportuar probleme me mungesë të energjisë elektrike në 6 qendra të votimit, në 6 komuna, Istog, Ferizaj, Viti, Rahovec, Graçanicë dhe Gjilan.
Demokracia në Veprim është koalicioni më i madh i organizatave që ka monitoruar procesin e zgjedhjeve.
“Ashtu siç edhe është raportuar në intervalet e tjera gjatë ditës, problematika kyçe që e ka karakterizuar procesin e votimit lidhet me vështirësitë e votuesve për të gjetur vendvotimin e saktë, përkundër që atyre u ishte ofruar mundësia nga KQZ, që përmes linkut ta konfirmojnë Qendrën e tyre të votimit. Kështu, që nga hapja e vendvotimeve në orën 07:00, vështirësi me lokalizimin e vendvotimit të saktë janë raportuar në pothuajse 2/3-tat e vendvotimeve, ndërsa në 20% të vendvotimeve numri i rasteve të tilla ka arritur deri në 30”, shkruan në komunikatën e DNV-së.
“Zbatimi i rregullës që lejon votimin me asistencë vetëm në rastet kur prezantohet dokumenti mjekësor ka bërë që fenomeni i votimit me asistencë të bjerë ndjeshëm krahasuar me proceset e kaluara zgjedhore. Përgjatë 12 orëve të procesit të votimit, më pak se 1% e votuesve kanë votuar me asistencë. Raste kur asistenca nuk ishte regjistruar sipas rregullave, është hasur në 11% të vendvotimeve, deri në 10 raste. Deri në orën 19:00, në mbi 30% të vendvotimeve është hasur votim me dokumente me afat të skaduar (deri në 10 raste) ndërsa numri i rasteve kur është fotografuar fletëvotimi është 32 përgjatë gjithë ditës”.
Zgjedhjet në fokus të mediave ndërkombëtare
Zgjedhjet në Kosovë kanë zgjuar interesim edhe tek mediat ndërkombëtare, të cilat i kanë lidhur ato me bllokadën njëvjeçare në 2025-ën.
“Associated Press”, “Reuters”, “The Guardian” e “Washington Post” i kanë cilësuar këto zgjedhje si përpjekje për t’i dhënë fund krizës politike të sivjetme. “Votuesit e Kosovës votojnë në përpjekje të dytë këtë vit për të zgjedhur një qeveri dhe për të shmangur më shumë krizë”, ka shkruar “Associated Press”. Kjo agjenci ka kujtuar se që nga 9 shkurti, Kosova edhe pse mbajti zgjedhje të rregullta, partitë nuk kanë arritur të formojnë qeverinë. Artikullin e njëjtë e ka publikuar edhe “The Guardian”. Ngjashëm ka raportuar edhe agjencia “Reuters”. “Kosova voton në përpjekje për t’i dhënë fund ngërçit politik njëvjeçar”, mban titullin artikulli për Kosovën në “Reuters”.
Kurti: Do t’i përmbushim të gjitha premtimet
Kryetari i Lëvizjes Vetëvendosje, Albin Kurti, në festën e kësaj partie dhe partnerëve për fitoren me afro 50 për qind në zgjedhjet e 28 dhjetorit, është zotuar për t’i përmbushur të gjitha premtimet e dhëna në fushatë.
Fitoren e tij e ka quajtur sërish historike. Tek ka falënderuar votuesit, Kurti ka thënë se “dimrin e kanë bërë verë, e politikën pranverë”.
Ai ka kërkuar që “qytetarët t’i qëndrojnë pranë koalicionit” e “koalicioni do t’u qëndrojë edhe më pranë, me përmbushjen e zotimeve”.
Lista Serbe thotë se i ka fituar të gjitha ulëset e serbëve
Photo: Driton Paçarada
Lista Serbe ka fituar të gjitha ulëset e rezervuara për komunitetin serb, ka deklaruar kryetari i kësaj partie, Zllatan Ellek të dielën pas zgjedhjeve të parakohshme parlamentare.
Sipas rezultateve nga procesimi i më shumë se 99 për qind të vendvotimeve, Lista Serbe ka marrë 41 mijë e 335 vota.
Partia e Nenad Rashiqit deri tash ka marrë 4601 vota.
Ndërkaq Kosovski Savez ka marrë 541 vota.
Nga kjo llogaritje, për të marrë një ulëse duhen 4648 vota.
Rashiq pati siguruar një ulëse në zgjedhjet e shkurtit. Si i vetmi deputet i partisë së tij, ai u zgjodh nënkryetar nga komuniteti serb, pas refuzimit të shumicës së Kuvendit për të votuar propozimet nga Lista Serbe.
PDK-ja në heshtje
Prej kur ka përfunduar periudha për votim, nga Partia Demokratike e Kosovës ka pasur heshtje.
Teksa pas publikimit të rezultateve kryetari i Lidhjes Demokratike të Kosovës, Lumir Abdixhiku, paralajmëroi dorëheqjen e kryetari i Aleancës për Ardhmërinë e Kosovës, Ramush Haradianj, u shpreh optimist për qeveri të opozitës, nga PDK-ja s’ka pasur asnjë reagim.
Sipas rezultateve preliminare, PDK-ja ka 21.17% apo 182.981 vota – rezultat i përafërt me zgjedhjet e 9 shkurtit.
E ndërkohë kryetari i Lëvizjes Vetëvendosje, Albin Kurti, shpalli fitoren më të madhe në histori të vendit.
Kurti për çështjen e presidentit: Fillimisht flas me Osmanin, pastaj me opozitën
Kryetari i Lëvizjes Vetëvendosje, Albin Kurti, ka thënë se për çështjen e presidentit do duhet të flasin edhe me opozitën. Por paraprakisht u shpreh se do të takohet edhe me presidenten aktuale Vjosa Osmani.
“Na duhet të bisedojmë edhe me opozitën për çështjen e presidentit. Paraprakisht, do të ulem me presidenten aktuale dhe më pas do t’i ndërmarrim edhe hapat e ardhshëm në mënyrë që të ecim përpara bashkë sepse dihet që si për marrëveshjet ndërkombëtare, ashtu për zgjedhjen e presidentit, duhet së paku të qëndrojnë në sallë 80 deputetë edhe nëse votojnë kundër. Ky është hapi i tretë”, ka thënë Kurti.
Osmanit i skadon mandati në mars.
Kurti shpall fitoren: Më e madhja në histori të Kosovës
Kryetari i Lëvizjes Vetëvendosje, Albin Kurti, ka shpallur fitoren e partisë së tij në zgjedhjet e 28 dhjetorit, duke thënë se ajo është rrugës për t’u bërë më e madhe ndonjëherë në histori të Kosovës.
Pas procesimit të mbi 96 për qind të vendvotimeve, VV-ja me partnerë ka marrë gati 50 për qind të ulëseve dhe i mjafton vetëm bashkëpunimi me partitë e komuniteteve joshumicë për të formuar vetë Qeverinë.
“Më 9 shkurt fitoi Lëvizja Vetëvendosje, më 28 dhjetor fitoi populli dhe Republika e Kosovës. Urime fitorja më e madhe në histori të vendit”, ka thënë ai.
Kurti më pas u shpreh se sapo të certifikohen rezultatet, do të krijojnë institucionet dhe të vazhdojnë punët e mira. Përmendi marrëveshjet ndërkombëtare, duke thënë se pret bashkëpunimin e partive opozitare për t’i çuar përpara.
“Na presin shumë punë përpara. Duhet të ecim përpara, pa vonesa. Sapo të certifikohen rezultatet, aq më shpejt do na duhet të krijojmë institucionet dhe të vazhdojmë me punën e mirë. Na pret Plani i Rritjes i BE-së në vlerë 880 milionë euro dhe tri marrëveshje me Bankën Botërore në vlerë 120 milionë. Pra mbi 1 miliard. Ftoj nga tash partitë opozitare për bashkëpunim në Kuvend për marrëveshjet ndërkombëtare, marrëveshjet e mira dhe për interesin publik të qytetarëve”, ka deklaruar Kurti.
Kryetari i Lëvizjes Vetëvendosje, Albin Kurti, ka shpallur fitoren e partisë së tij në zgjedhjet e 28 dhjetorit, duke thënë se ajo është rrugës për t’u bërë më e madhe ndonjëherë në histori të Kosovës.
Pas procesimit të mbi 96 për qind të vendvotimeve, VV-ja me partnerë ka marrë gati 50 për qind të ulëseve dhe i mjafton vetëm bashkëpunimi me partitë e komuniteteve joshumicë për të formuar vetë Qeverinë.
“Më 9 shkurt fitoi Lëvizja Vetëvendosje, më 28 dhjetor fitoi populli dhe Republika e Kosovës. Urime fitorja më e madhe në histori të vendit”, ka thënë ai.
Kurti më pas u shpreh se sapo të certifikohen rezultatet, do të krijojnë institucionet dhe të vazhdojnë punët e mira. Përmendi marrëveshjet ndërkombëtare, duke thënë se pret bashkëpunimin e partive opozitare për t’i çuar përpara.
“Na presin shumë punë përpara. Duhet të ecim përpara, pa vonesa. Sapo të certifikohen rezultatet, aq më shpejt do na duhet të krijojmë institucionet dhe të vazhdojmë me punën e mirë. Na pret Plani i Rritjes i BE-së në vlerë 880 milionë euro dhe tri marrëveshje me Bankën Botërore në vlerë 120 milionë. Pra mbi 1 miliard. Ftoj nga tash partitë opozitare për bashkëpunim në Kuvend për marrëveshjet ndërkombëtare, marrëveshjet e mira dhe për interesin publik të qytetarëve”, ka deklaruar Kurti.
KQZ-ja shpall rezultatet preliminare
Komisioni Qendror i Zgjedhjeve në konferencën e fundit për ditën e sotme, ka shpallur rezultatet preliminare.
Në platformën e KQZ-së nga 96% e votave të procesuara, Lëvizja Vetëvendosje ka 49.80 për qind të votave apo 422 mijë e 561 vota. E dyta renditet Partia Demokratike e Kosovës me 21.21 për qind apo 179 mijë e 933 vota. Lidhja Demokratike e Kosovës renditet e treta me 13.76 për qind apo 116 mijë e 777 vota. E katërta bazuar në rezultatet preliminare është renditur AAK-ja me 5.73 për qind apo 48 mijë e 630 vota.
Nisma Socialdemokrate nuk e ka kaluar pragun, me 14 mijë e 545 vota apo 1.71 për qind.
Kryesuesi i KQZ-së, Kreshnik Radoniqi ka deklaruar se numërimi i votave të kandidatëve për deputet do të fillojë nesër, më 29 dhjetor.
Në këto rezultate nuk përfshihen votat e diasporës, votat me kusht dhe ato të personave me nevoja të veçanta.
Pas procesimit të 95 për qind të votave, VV-ja merr 56 ulëse në Kuvend
Photo: Driton Paçarada
Pas procesimit të rreth 95 për qind të vendvotimeve në nivel vendi, Lëvizja Vetëvendosje me pak nën 50 për qind të votave ka siguruar 56 ulëse në Kuvend.
Me përllogaritjen sipas formulës “D’Hondt”, Partia Demokratike e Kosovës me 21 për qind të votave ka 23 ulëse. Lidhja Demokratike ka 15 ulëse, ndërsa Aleanca për Ardhmërinë e Kosovës ka siguruar 6 ulëse.
Në krahasim me zgjedhjet e shkurtit, Lëvizja Vetëvendosje është rritur në Kuvend për tetë ulëse, nga 48 sa i kishte.
Ndërkaq, PDK-ja e humbi një ulëse.
Humbësja më e madhe është LDK-ja që ka humbur pesë ulëse, nga 20 sa kishte.
AAK-ja në koalicion me Nismën ka pasur 8 ulëse.
Kjo përllogaritje vlen pa u numëruar votat nga postë dhe ato në përfaqësi diplomatike.
20 ulëse të tjera ndahen në 10 për komunitetin serb dhe 10 për komunitetet tjera. Për të pasur shumicën mjaftojnë 61 vota.
Abdixhiku fton Kuvendin e LDK-së, paralajmëron dorëheqje
Kryetari i Lidhjes Demokratike të Kosovës, Lumir Abdixhiku, ka marrë përgjegjësinë për dështimin që partia e tij e ka pësuar në zgjedhjet e 28 dhjetorit. Ai ka njoftuar se ditëve në vijim do ta ftojë Kuvendin e partisë për të shqyrtuar “të gjitha çështjet dhe përgjegjësitë si kryetar”. Në një konferencë për media të dielën, Abdixhiku ka dhënë sinjale se mund të dorëhiqet nga posti i kryetarit.
Ai ka thënë se rezultati i LDK-së nuk është ai që e kanë pritur dhe ky do të jetë moment reflektimi. Shtoi se e respekton verdiktin e qytetarëve.
“Duke marrë përgjegjësinë, ditëve në vijim do ta thërras Kuvendin e LDK-së dhe para tij do t’i shpalosim e shqyrtojmë të gjitha çështjet dhe përgjegjësit që mbaj si kryetar. Rezultati i LDK-së nuk është ai që e kemi pritur dhe dëshiruar. Është moment reflektimi. Kur qytetarët flasin, ne duhet të dëgjojmë. Demokracia funksionon kur udhëheqësit mbajnë përgjegjësi, edhe kur kanë humbje të tilla”, ka thënë Abdixhiku.
Abdixhiku tutje u shpreh se në këto pesë vjet drejtimi të LDK-së ka vepruar ashtu që ka besuar se është më e mira për partinë.
“Këto pesë vjet, kam vepruar ashtu siç kam besuar se është më e mira për LDK-në. Megjithatë, sot them hapur nuk kam arritur ta çojë LDK-në aty ku duhet të jetë. Kemi ndërtuar ekip të mirë, kemi ndërtuar fushatë të dinjitetshme, por ky është verdikti qytetar dhe përulemi para tij. Qytetari gjithmonë ka të drejtë”, ka shtuar ai.
Abdixhiku uroi edhe fituesin e zgjedhjeve, Albin Kurti.
“Më lejoni të uroj fituesin. Shteti është mbi secilin prej nesh. Le të shpresojmë se qytetarët kanë zgjedh drejt këtë herë”, ka deklaruar ai.
VV-ja fitoi në 24 komuna
Lëvizja Vetëvendosje po korr fitore bindëse në zgjedhjet parlamentare të 28 dhjetorit.
Kur janë numëruar mbi 91 për qind të vendvotimeve, VV-ja është e para në 24 komuna. Ka mbi 50 për qind të votave.
Është e para në Gjakovë, Gjilan, Dragash, Istog, Kaçanik, Klinë, Fushë-Kosovë, Kamenicë, Mitrovica e Jugut, Lipjan, Obiliq, Rahovec, Pejë, Podujevë, Prishtinë, Prizren, Shtime, Suharekë, Ferizaj, Viti, Vushtrri, Malishevë, Junik dhe Hani të Elezit
Partia Demokratike e Kosovës është e para në Drenas e Skenderaj.
Në Deçan është Aleanca për Ardhmërinë e Kosovës e në Mamushë është subjekti turk KDPT.
Kandidati i LDK-së vajton me këngën e Medës: Ma mirë për mu mos t’kish ardh e hëna
Kandidati për deputet i Lidhjes Demokratike të Kosovës, Ermal Sadiku, e ka postuar këngën e Medës, “Ai plumb” pas publikimit të rezultateve preliminare për zgjedhjet parlamentare.
Sadiku ka ironizuar me pjesën ku këngëtari thotë “Ma mirë për mu mos t’kish ardh e hëna”.
Sipas rezultateve preliminare, LDK-ja e treta ka rreth 14% të votave.
Postimi:
Peci tallet me LDK-në
Kryetari i Mitrovicës, Faton Peci, është tallur me Lidhjen Demokratike të Kosovës pas publikimit të rezultateve për zgjedhjet e 28 dhjetorit.
Peci është parë duke ironizuar për refuzimet e LDK-së për të qeverisur me Lëvizjen Vetëvendosje.
“Hajdi n’qeveri, jo s’po dojme, hajdi more, jo s’po dojme. Ani shkoni pra”, ka shkruar Peci.
VIDEO:
DnV: VV-ja mori 47.91 për qind të votave
Demokracia në Veprim ka procesuar të dhënat nga vendvotimet. Sipas rezultateve nga procesimi i 90% të të dhënave
Aleanca për Ardhmërinë e Kosovës ka marrë 5.62% ndërsa Nisma nuk e ka kaluar pragun me vetëm 1.88%.
Në këtë rezultat nuk përfshihen votat e diasporës dhe ato me kusht.
VV-ja kalon 50-përqindëshin
Kur janë numëruar mbi 61 për qind e vendvotimeve, Lëvizja Vetëvendosje ka kaluar 50 përqindëshin e votave.
Aktualisht, ka 50.24 për qind apo 257.390 vota.
Partia Demokratike e Kosovës ka 20 për qind apo 102.460 votave.
Lidhja Demokratike e Kosovës ka 14.16 për qind apo 72.566 vota.
Aleanca për Ardhmërinë e Kosovës ka 6.57 për qind apo 33.659.
Gashi i LDK-së: Rezultati s’mund të injorohet, kërkohet reflektim
Photo: Driton Paçarada
Arben Gashi, kandidat për deputet i Lidhjes Demokratike të Kosovës, ka kërkuar reflektim dhe veprim të përgjegjshëm, pas rezultateve të para të zgjedhjeve të 28 dhjetorit.
Sipas rezultateve të deritashme, LDK-ja si e treta ka pësuar rënie në këto zgjedhje në krahasim nga zgjedhjet e shkurtit. Sipas rezultateve, Lëvizja Vetëvendosje ka fituar bindshëm, mbi 45 për qind të votave.
“Kur votuesit flasin, rezultati nuk mund të injorohet. Kërkohet reflektim dhe veprim i përgjegjshëm”, ka shkruar Gashi në Facebook.
VV-ja nis festën në Prishtinë (foto)
Photo: Driton Paçarada
Lëvizja Vetëvendosje ka nisur festën në Prishtinë, pas publikimit të rezultateve të para të zgjedhjeve të 28 dhjetorit.
Sipas rezultateve të deritashme, kjo parti është rritur nga zgjedhjet e shkurtit dhe ka kaluar mbi 46 për qind.
Ndjekës të VV-së kanë ndezur fishekzjarrë në shesh të Prishtinës.
Fotot nga vendi i ngjarjes: Driton Paçarada/KOHA
Sveçla: Rinia me Lalin ju sosin
Ministri në detyrë i Brendshëm, Xhelal Sveçla, ka bërë reagimin e parë pas zgjedhjeve të 28 dhjetorit.
Ai ka postuar një foto me disa të rinj dhe duke bërë simbolin e gërshërëve.
“Rinia me Lalin ju sosin +4”, ka shkruar ai.
Policia: Procesi zgjedhor kaloi i qetë dhe pa incidente serioze
Policia e Kosovës ka njoftuar se procesi zgjedhor të dielën ka shkuar në përgjithësi qetë dhe pa incidente serioze. Sipas njoftimit, zbatimi i planit policor dhe bashkëpunimi e koordinimi ndërinstitucional ka ndikuar që procesi gjatë ditës së sotme të shkojë pa ndonjë incient madhor.
“Zbatimi i planit policor, bashkëpunimi dhe koordinimi ndërinstitucional ka ndikuar në mënyrë pozitive që i tërë procesi zgjedhor të kalojë i qetë dhe pa ndonjë incident madhor që do të kishte penguar apo cenuar procesin zgjedhor, andaj në aspektin e sigurisë vlerësohet se procesi zgjedhor ka kaluar i qetë dhe pa incidente serioze. Një ndër qëllimet e planit operativ policor, ka qenë garantimi i një ambienti të qetë për votime, inicimi dhe procedimi i çdo vepre të mundshme penale në koordinim me organet e drejtësisë dhe dërgimi para organeve të drejtësisë të të gjithë atyre që bijën ndesh me ligjin, konkretisht cenojnë procesin zgjedhor”, thuhet në njoftimin e policisë.
Gjithashtu në koordinim me Prokurorinë e Shtetit, Policia e Kosovës thotë se ka iniciuar pesë raste penale.
“Policia e Kosovës në bashkëpunim dhe koordinim me Prokurorinë e Shtetit, lidhur me procesin zgjedhor, sot ka iniciuar 5 (pesë) raste penale si; ‘Cenimi i fshehtësisë së votimit’, ‘Cenim i përcaktimit të lirë të votuesve’, ´Pengim i procesit të votimit´ dhe ‘Asgjësimi i dokumenteve të votimit’, ku personat e përfshirë në raste me vendim të prokurorëve kompetent janë liruar në procedurë të rregullt. Janë trajtuar 30 (tridhjetë) informata dhe në 5 (pesë) raste janë evidentuar me ‘shënim zyrtar’, thuhet tutje në njoftimin e policisë.
Po ashtu në bashkëpunim dhe koordinim me organet e drejtësisë, janë trajtuar dhe iniciuar edhe raste të tjera, raste këto të cilat nuk ndërlidhen me procesin zgjedhor.
Haradinaj: Kemi 8 për qind apo 9 ulëse në Kuvend, duam koalicion me PDK-në e LDK-në
Kryetari i Aleancës për Ardhmërinë e Kosovës, Ramush Haradinaj, ka thënë se në zgjedhjet e 28 dhjetorit, partia e tij ka fituar 8 për qind të votave apo 9 ulëse në Kuvend.
Ai ka thënë se këtë e ka të bazuar nga informatat në qendrat e votimeve.
Në një konferencë për media, Haradinaj ka bërë thirrje për koalicion të partive që deri tash ishin në opozitë, Partinë Demokratike të Kosovës dhe Lidhjen Demokratike të Kosovës.
“AAK-ja nuk ka vënë dhe nuk qet kushte për opozitën. Por tani është momenti që të reflektojmë. Nga ne të dy partitë e kanë një partner dhe jemi të gatshëm për bashkëpunim e t’i japin shumicën”, ka thënë ai.
Lushaku e LDK-së: Kokën lart!
Ish-deputetja e Lidhjes Demokratike të Kosovës, Jehona Lushaku-Sadriu, u ka bërë thirrje votuesve të partisë ta mbajnë kokën lart.
“Për të gjithë votuesit e sotëm të LDK-së: kokën lartë! Ju dua!”, ka shkruar ajo.
Sipas exit-polleve, LDK-ja është në rënie krahasuar me zgjedhjen e 9 shkurtit.
Prokurori i Shtetit: Asnjë i ndaluar për vepra penale në këto zgjedhje
Photo: Driton Paçarada
Prokurori i Shtetit përmes një njoftimi ka thënë se në zgjedhjet e parakohshme nacionale të 28 dhjetorit, asnjë person nuk ka qenë i ndaluar për vepra penale.
Gjatë ditës së sotme sipas njoftimit, janë pranuar informata dhe pas verifikimit, deri në mbylljen e procesit të votimit, u konstatua se vetëm pesë prej tyre paraqesin elemente të veprës penale kundër të drejtave të votimit.
“Rasti i parë është iniciuar në fshatin Ranillug –Gjian, për veprën penale nga neni 210 i Kodit Penal të Kosovës: “Cenimi i përcaktimit të lirë të votuesve”, ku e dyshuara me vendim të prokurorit është liruar në procedurë të rregullt. Rasti i dytë është iniciuar në Zhegër - Gjilan, për veprat penale nga nenet 214 dhe 215 të Kodit Penal të Kosovës “Pengim i procesit të votimit” dhe “Cenimi i fshehtësisë së votimit”, ku i dyshuari me vendim të prokurorit është liruar në procedurë të rregullt. Rasti i tretë është iniciuar në Prizren, për veprën penale nga neni: 217 “Asgjësimi i dokumenteve të votimit”, ku i dyshuari me vendim të prokurorit është liruar në procedurë të rregullt. Rasti i katërt është iniciuar në Drenas, për veprën penale nga neni: 215 “Cenimi i fshehtësisë së votimit”, ku i dyshuari me vendim të prokurorit është liruar në procedurë të rregullt. Edhe rasti i pestë është iniciuar për “Cenim të fshehtësisë së votimit” në Suharekë”, thuhet në njoftimin e Prokurorit të Shtetit.
Prokurorët e shtetit do të vazhdojnë të kujdestarojnë edhe gjatë numërimit të votave në vendvotime deri në dërgimin e tyre në qendrat komunale të numërimit.
Nis publikimi i rezultateve preliminare
Photo: Driton Paçarada
Komisioni Qendror i Zgjedhjeve ka nisur publikimin e rezultateve preliminare për zgjedhjet parlamentare të 28 dhjetorit.
Ndiqni live rezultatet KËTU
Në Prishtinë votuan 53.5 për qind
Photo: Driton Paçarada
Në Prishtinë në zgjedhjet e parakohshme të Kosovës të dielën votuan 117 mijë e 447 qytetarë apo 53.5 për qind të qytetarëve me të drejtë vote.
Prishtina është në mesin e komunave me daljen më të madhe. Më tepër janë vetëm Mamusha 63.76 për qind, Zubin-Potoku 56.45 për qind, Leposaviqi 56.35 për qind, Ranillugu 55.05 për qind e Novobërda 54.6 për qind.
Dalje mbi 50 për qind ka pasur edhe në Kaçanik (52.84 për qind), Shtërpcë (52.22 për qind), Shtime (rreth 51.5 për qind), Obiliq (50.21 për qind).
Muhaxhiri: Opozita ia dhuroi VV-së një fitore spektakolare
Analisti politik, Artan Muhaxhiri, ka thënë se fitorja e thellë e Vetëvendosjes sipas exit-polleve të publikuara, është tregues që “opozita ia dhuroi fitoren spektakolare”.
“Opozita ia ka dhuruar VV-së një fitore spektakolare, sepse pas 5 vjetëve në pushtet pas një viti bllokues, pas shkeljeve të panumërta të Kushtetutës, mungesës së zhvillimit ekonomik e prishjes së raporteve me aleatët... s’ka logjikë tjetër pos asaj që edhe përkundër gjithë mangësive, qytetarët e kanë konsideruar opozitën si më të dëmshme se VV-në”, ka thënë ai në debatin në KTV për zgjedhjet parlamentare të mbajtura sot.
Sipas exit-polleve të publikuara në disa televizione, VV-ja ka shënuar rritje prej zgjedhjeve të 9 shkurtit, ndërsa partitë tjera rënie. VV-ja ka pasur në zgjedhjet e shkuara rreth 42.3 për qind.
Gërvalla: Faleminderit Kosovë
Photo: Driton Paçarada
Kryetarja e partisë Guxo, parti që garoi me LVV-në e Alternativën, Donika Gërvalla, pas përfundimit të procesit të votimit ka shkruar në rrjetin e saj social Facebook, “Faleminderit Kosovë”.
Sipas exit-polleve të publikuara, fitues i zgjedhjeve është ky koalicion.
Thyhet rekordi i votave në vendvotimet në Kosovë
Zgjedhjet parlamentare të 28 dhjetorit kanë hyrë në histori sa i përket daljes së qytetarëve në vendvotimet brenda Kosovës. Sipas procesimit të më shumë se 99.57 për qind të vendvotimeve, të drejtën e votës e kanë shfrytëzuar 899, 567 qytetarë.
Në përqindje, kjo do të thotë se të drejtën e votës e kanë shfrytëzuar 45.00 për qind e atyre me të drejtë vote.
Rekordi i mëhershëm ishte vendosur më 9 shkurt sivjet. Atë kohë në qendrat e votimit në Kosovë kishin votuar 871 mijë e 662 votues. Ndërkaq bashkërisht me votat e diasporës dhe atyre në përfaqësi, numri kishte mbërritur në 966 mijë vota.
Zgjedhjet kanë përkuar këtë herë me kohën e pushimeve. Qindra mijëra qytetarë nga mërgata janë në Kosovë dhe kjo ka qenë kryetemë javëve të fundit.
Kurti bën thirrje të ruhen votat
Photo: Driton Paçarada
Kandidati për kryeministër nga LVV-ja, Albin Kurti, ka bërë thirrje që komisionerët e vëzhguesit të ruajnë votat, tashmë kur ka përfunduar procesit i votimit dhe ka filluar numërimi.
“Vullneti i qytetarëve tashmë gjendet në kutitë e votimit. Ruajtja e këtij vullneti të shprehur është esencial për legjitimitetin dhe kredibilitetin e procesit zgjedhor. Aty e kemi përcaktimin për të ardhmen e vendit tonë dhe të institucioneve të tij. E për këtë gjë, mendjet, sytë dhe veshët tanë janë te ju komisionerë dhe vëzhgues. Keni detyrë tejet të rëndësishme saqë vendimtare”, ka thënë Kurti përmes një videoje të publikuar në rrjetin e tij social Facebook.
Përfundon periudha e votimit
Photo: Driton Paçarada
Në orën 19:00 ka përfunduar periudha e lejuar për të hyrë në qendrat e votimit për të votuar.
Ata që janë në qendrat e votimit kanë të drejtë ta përfundojnë votimin.
Deri në orën 17:00 të drejtën e votës e kanë shfrytëzuar më shumë se 770 mijë votues apo rreth 39 për qind e atyre me të drejtë vote.
Pula: Ka incidente, por nuk ka persona të ndaluar
Koordinatorja nacionale për zgjedhje, prokurorja Laura Pula ka deklaruar se gjatë procesit të sotëm zgjedhor nuk është shënuar ndonjë rast i cili e dëmtoi integritetin e procesit, por janë evidentuar disa incidente për të cilat nuk ka persona të ndaluar, por vetëm të intervistuar.
Ajo deklaroi se aty ku është gjetur elemente të veprës penale kanë filluar hetimet dhe vazhdojnë tutje.
“Përgjithësisht ka shkuar mirë, nuk kemi ndonjë rast eklatant i cili e ka dëmtuar integritetin e këtij procesi zgjedhor kemi incidente të ndryshme të cilat e kanë ndodhur dhe kemi raportuar dhe aty ku kemi gjetur elemente të veprës penale vetëm kemi filluar hetimet në disa raste dhe hetimet vazhdojmë më tutje”, tha ajo për “KosovaPress”.
Prokurorja, Laura Pula tha se vepra penale kanë pasur të bëjnë me cenim të përcaktimit të lirët të votuesit, ku në këtë rast është intervistuar kryetarja e Komunës së Ranillugut, Tanja Antiq, si dhe dy raste të tjera që përbëjnë vepër penale.
“Pothuajse vepra penale ishin cenimi i përcaktimit të lirë të votuesve ku është marr në pyetje kryetarja e komunës së Ranulligut është intervistuar e kemi një vepër penale tjetër e asgjësimi e dokumenteve të procesit zgjedhor që ka ndodhur tek një person i cili e ka shqyer fletëvotimin për faktin se ka pas dëshirë ta asistojë gruan për të votuar dhe nuk e kanë lejuar për shkak se dokumenti mjekësor nuk ka qenë në rregull...Kemi përleshjen në Zhegër e cila ka korresponduar vetëm me intervistim. Persona të ndaluar nuk kemi raste, kemi 3 raste incidente po janë duke u trajtuar edhe raste të tjera por deri në përfundim të shikojmë pas hetimeve që nga një incident a na del ndonjë raste konkrete me përgjegjësi penale”, tha ai.
Edhe në këtë proces zgjedhor të parakohshëm parlamentar të 28 dhjetor janë 4 ose 5 raste të fotografimit të votës, por pas intervisitmit këta persona janë liruar.
Sipas Pulës, rastet e fotografimit të votës ka qenë në Rahovec, Prizren dhe Pejë.
Graçanicë, shoqërohet në polici një i dyshuar për ndikim te qytetarët për votë
Prokuroria Themelore në Prishtinë ka njoftuar se një person është shoqëruar në stacionin policor në Graçanicë pas dyshimit se ka ndikuar te qytetarët për të votuar dhe po ashtu ka kërkuar raporte shëndetësore nga persona të caktuar, që të asistohen gjatë votimit.
“Prokuroria Themelore në Prishtinë njofton opinionin publik, se ka pranuar një informatë anonime lidhur me dyshimet se një person M.S., ka ndikuar te qytetarët për të votuar dhe po ashtu ka kërkuar raporte shëndetësore nga persona të caktuar, me qëllim që personat të asistohen gjatë procesit të votimit. Personi i dyshuar është shoqëruar në stacionin policor në Komunën e Graçanicës, ku ndaj tij janë duke u ndërmarrë të gjitha masat dhe veprimet e nevojshme hetimore, në përputhje me të gjitha procedurat ligjore”, thuhet në njoftimin e Prokurorisë Themelore.
Tutje sipas raportit thuhet se “gjatë kontrollit fillestar nuk është gjetur asgjë e dyshimtë, ndërsa i njëjti është intervistuar nga organet komptente”.
DnV-ja thotë se në dy qendra të votimit po raportohet për probleme me rrymë
Photo: Driton Paçarada
Demokracia në Veprim (DnV) ka njoftuar se dy orë para përfundimit të procesit të votimit janë raportuar ndërprerje të energjisë elektrike në të paktën dy qendra të votimit, ndërsa në një vendvotim tjetër është evidentuar problem me mospërputhjen e kodeve në fletëvotime.
Sipas DnV-së, pas dhjetë orësh nga hapja e vendvotimeve, procesi zgjedhor në përgjithësi po zhvillohet i qetë, ndërsa është vërejtur një rritje e interesimit të qytetarëve për të votuar. Dalja në votime deri në orën 17:00 ka arritur rreth 38,9 për qind, pothuajse e njëjtë me zgjedhjet e 9 shkurtit, kur në të njëjtin interval kohor pjesëmarrja ishte rreth 39 për qind.
Rajonet me dalje më të lartë në votime janë komunat me shumicë serbe me rreth 47 për qind, të pasuara nga rajoni i Prishtinës me rreth 43 për qind.
DnV ka evidentuar edhe disa parregullsi gjatë procesit të votimit. Një ndër më të shpeshtat mbetet vështirësia e votuesve për të gjetur vendvotimin e saktë. Këto probleme janë raportuar në rreth 70 për qind të vendvotimeve, ndërsa në 15 për qind të tyre janë shënuar deri në 30 raste të tilla.
Sa i përket votimit me asistencë, DnV thekson se trendi ka mbetur i ngjashëm me orët e mëngjesit, por i shtrirë në më shumë vendvotime. Në 9 për qind të vendvotimeve janë raportuar raste të mosevidentimit të votimit me asistencë. Po ashtu, në 75 për qind të vendvotimeve, komisionerët kanë kërkuar dokumente mjekësore nga të gjithë qytetarët që kanë kërkuar të votojnë me asistencë, ndërsa në 55 për qind të vendvotimeve votimi me asistencë nuk është lejuar pa këto dokumente, pavarësisht insistimit të votuesve.
Probleme janë raportuar edhe me votimin me dokumente të pavlefshme. Deri në orën 17:00, raste të votimit me dokumente me afat të skaduar janë hasur në 30 për qind të vendvotimeve, ndërsa në 10 për qind të tyre janë evidentuar raste të identifikimit me dokumente jo valide.
DnV ka raportuar edhe për raste të izoluara të fotografimit të votës, duke e cilësuar këtë dukuri si cenim të fshehtësisë së votimit dhe potencialisht të lidhur me blerjen e votës, frikësimin e votuesve apo shtrembërimin e vullnetit të tyre. Deri në orën 17:00 janë shënuar gjithsej 21 raste të tilla, të evidentuara në rreth 3 për qind të vendvotimeve.
Demokracia në Veprim ka bërë të ditur se do të vazhdojë monitorimin e procesit deri në mbylljen e vendvotimeve dhe do të informojë opinionin publik për çdo zhvillim të ri.
Rreth 760 mijë qytetarë shfrytëzuan të drejtën e votës deri në orën 17:00
Photo: Driton Paçarada
Saktësisht 759 mijë e 877 persona kanë shfrytëzuar të drejtën e votës në zgjedhjet e parakohshme parlamentare deri në orën 17:00, sipas procesimit të 97.54 për qind të vendvotimeve në uebfaqen e Komisionit Qendror të Zgjedhjeve.
Në përqindje kjo nënkupton se të drejtën e votës deri tash e kanë shfrytëzuar 38.01 për qind e atyre me të drejtë vote.
Në zgjedhjet e shkurtit, në nivel vendi patën votuar 966 mijë votues, përfshirë votat e diasporës. Në shkurt ishte numri më i madh i votuesve ndonjëherë.
Palokaj: Diaspora vazhdon të jetë e lidhur me Kosovën, kjo dëshmohet edhe me pjesëmarrjen në zgjedhje
Korrespondenti i KOHËS në Bruksel, Augustin Palokaj, ka thënë se diaspora e Kosovës është mjaft e angazhuar politikisht dhe e lidhur me Kosovën. Palokaj ka thënë se kjo dëshmohet edhe përmes pjesëmarrjes në zgjedhje.
“Diaspora e Kosovës është mjaft e angazhuar politikisht. Vazhdon të jetë e lidhur me Kosovën dhe ta ndien atë lidhje, që dëshmohet edhe përmes pjesëmarrjes në zgjedhje që nuk shihet aq shumë te disa popuj tjerë. Kosova është prapë një fenomen, ka qenë gjithmonë. Politika e Kosovës prej që e mbaj mend unë, nuk është zhvilluar asnjëherë pa pjesëmarrjen aktive të diasporës në të gjitha partitë politike, në të gjitha strukturat intelektuale, mediatike, madje edhe ushtarake. Kjo nuk është varur nga përkatësia partiake e nuk varet as tani. Fakti se në një moment të caktuar diaspora më shumë voton për një parti apo një tjetër, pak a shumë reflekton edhe situatën në Kosovë. Ndoshta ka ndonjë tendencë pak të ndryshme, por nuk ka ndonjë ndryshim të madh”, ka thënë Palokaj në “Zgjedhjet në KOHË”.
VIDEO:
Palokaj ka treguar edhe që diaspora e kishte shpëtuar Rumaninë nga ndikimi rus.
“Ka shtete ku kanë diasporë të madhe. Rumania ka me miliona. Me përqindje krahasuar me popullin që jeton në vendin amë nuk është aq sa e Kosovës, por Rumania ka mbi 20 milionë banorë dhe ka diasporë të madhe. Diaspora rumune ka qenë kyç për të parandaluar fitoren e forcave proruse në Rumani. Po ashtu edhe Moldavi, ku ishin zgjedhjet dhe referendumi për t’iu bashkuar BE-së. Falë votës proevropiane të diasporës, pasi ajo ndodhet kryesisht në BE, fituan forcat proevropiane e përpak u parandalua që të ngadhënjejnë forcat proruse në ato vende”, tha Palokaj.
Palokaj tregoi edhe dallimin mes diasporës së Kroacisë dhe të Kosovës.
Ai ka thënë se diaspora e Kroacisë ka humbur interesimin më të votojë.
“Unë jam shtetas i Kroacisë dhe votoj në Ambasadën e Kroacisë këtu në Belgjikë në zgjedhjet e Kroacisë. E kam vërejtur zhdukjen shumë të shpejt të vullnetit të kroatëve për të marrë pjesë në zgjedhjet e Kroacisë. Si shembull e marr Brukselin ku nuk ka aq shumë kroatë, e po shtu edhe Dublinin në Irlandë ku janë mbi 45 mijë kroatë e nuk votojnë as 100 apo 200. Do të thotë se ata të rinj që janë larguar nga Kroacia janë shkëputur tërësisht e nuk duan të kenë më asnjë lidhje, përveçse kur shkojnë në pushime në det”, tha Palokaj.
Ai tregoi se si në Kroaci në periudhën e pasluftës diaspora ishte jashtëzakonisht e angazhuar.
“Kroacia është shtet ku i ka të rezervuara tri vende në Kuvend për përfaqësues të diasprës, për të vlerësuar kontributin e saj në pavarësinë e Kroacisë, financimin e luftës mbrojtëse dhe kontributin që ka dhënë në rimëkëmbjen e shtetit...Në anën tjetër Kroacia ka keqpërdorim të diasporës. Si diasporë, çdo shtetas kroat që jeton jashtë Kroacisë, e këtu konsiderohen edhe shtetasit kroatë në Bosnjë-Hercegovinë e që janë mbi 1 milion. As gjysma e tyre nuk janë kroat, por kanë shtetësinë e Kroacisë dhe rrjedhimisht ato tri vende i mbushin kroatët e Bosnjës. Gjithmonë ato vende i kanë fituar partitë e qendrës së djathtë”, ka thënë Palokaj.
E analisti politik Adrian Zeqiri ka treguar se si në Izrael ata që nuk janë banor rezident nuk lejohen të votojnë në zgjedhjet nacionale.
“Ka plotë shtete që përballen me votë të diasporës duke përfshirë edhe vendin prej nga lind edhe emri diasporë, Izraeli. Është komuniteti hebre që është i shtrirë gjithandej botës, duke përfshirë më së shumti në SHBA. Ka po aq hebre në SHBA ndoshta sa ka në Izrael. Mirëpo, aty pa qenë rezident në Izrael, edhe nëse e ke nënshtetësinë e nuk e dëshmon se je rezident, nuk ka të drejtë vote. Kuptimin që janë kufizuar dmth disa të drejta ndaj shtetasve izraelitë që nuk jetojnë në Izrael...Është ndryshe për dy-tri javë me ardh me jetu në Kosovë si shembull e ndryshe për ata që jetojnë për çdo ditë këtu e përballen”, tha Zeqiri.
Diaspora e Kosovës votoi nëpër Ambasada të shtunën për zgjedhjet e parakohshme të 28 dhjetorit.
Shoqërohet në Polici një person nën dyshimin për fotografim të votës
Një person është shoqëruar në stacion policor nën dyshimin për fotografim të votës.
“Betimi për Drejtësi” mëson se rasti ka ndodhur në fshatin Gelanc të Suharekës.
Lidhur me procedimin e këtij rasti, ju informojmë pas përfundimit të intervistimit të të dyshuarit.
“Përpjekje që t’i jepet fund krizës” – titujt e mediave botërore për zgjedhjet në Kosovë
Photo: Driton Paçarada
Zgjedhjet parlamentare të 28 dhjetorit në Kosovë kanë zënë vend edhe në ballinat e mediave më prestigjioze ndërkombëtare. “Associated Press”, “Reuters”, “The Guardian” e “Washington Post” i kanë cilësuar këto zgjedhje si përpjekje për t’i dhënë fund krizës politike të sivjetme.
“Votuesit e Kosovës votojnë në përpjekje të dytë këtë vit për të zgjedhur një qeveri dhe për të shmangur më shumë krizë”, është titulli i agjencisë “Associated Press”.
Kjo agjenci ka kujtuar se që nga 9 shkurti, Kosova edhe pse mbajti zgjedhje të rregullta, partitë nuk kanë arritur të formojnë qeverinë.
Për këtë medium ka folur edhe një pensionist nga Prishtina. Ilmi Deliu ka thënë se shpreson që zgjedhjet “të sjellin ndryshim ose do të përfundojmë në humnerë”. “Të rinjtë nuk duan të jetojnë më këtu”, ka thënë ai.
Artikullin e njëjtë e ka publikuar edhe “The Guardian”.
Ngjashëm ka raportuar edhe agjencia “Reuters”. “Kosova voton në përpjekje për t’i dhënë fund ngërçit politik njëvjeçar”, mban titullin artikulli për Kosovën në “Reuters”.
Kryetarja e Ranillugut intervistohet nën dyshimin se ushtroi ndikim te votuesit
Kryetarja e Komunës së Ranillugut, Tanja Antiq, është intervistuar nën dyshimin se ushtroi ndikim te votuesit për votim sipas udhëzimeve të saj.
Kështu konfirmoi për KOHËN, Ismet Hashani, zëdhënës i Policisë për rajonin e Gjilanit.
“Me datën 28.12.2025, përmes rrugëve operative kemi pranuar informacion se anëtarja e kryesisë së forumit të gruas nga partia Lista Serbe dhe aktualisht Kryetare e Komunës së Ranillugut, dyshohet se përmes anëtarëve të Komisionit Komunal zgjedhor të kësaj partie në komunën e Ranillugut ka ushtruar ndikim tek votuesit e pa përcaktuar ose votuesit e subjekteve të tjera. Të njëjtit dyshohet se janë kanosur për ndërprerje të benifiteve të cilat këta qytetar i përfitojnë nga shteti i Serbisë, në rast të mos votimit sipas udhëzimeve”, tha Hashani.
E dyshuara është intervistuar dhe ndaj saj është iniciuar rasti “Cenimi i fshehtësisë së votimit”.
“E dyshuara është shoqëruar në ambientet e hetimeve rajonale dhe intervistuar në prezencën e avokatit me qëllimi të verifikimit të informacioneve dhe sqarimit të rrethanave. Pas intervistimit me vendim të Prokurorit të Shtetit është liruar, ndërsa rasti “Cenim i fshehtësisë së votimit” do vazhdoj të hetohet nga Njësiti i Hetimeve Rajonale në Gjilan në koordinim të plotë me Prokurorinë Themelore”, tha Hashani.
Deri në orën 15:00 votuan 28.65% të qytetarëve, mbi 14 mijë më shumë se më 9 shkurt
Photo: Driton Paçarada
Sipas të dhënave të Komisionin Qendror të Zgjedhjeve (KQZ) deri në orën 15:00 kanë votuar 28.65% të qytetarëve.
Sipas të dhënave të publikuara në faqen e KQZ-së deri në këtë orë të drejtën e tyre për të votuar e kanë shfrytëzuar 572 mijë e 723 qytetarë nga 1 milion e 999 mijë e 204 qytetarë sa kanë të drejtë vote.
Këto të dhëna janë publikuar nga procesimi i të dhënave nga 97,15 e vendvotimeve.
Krahazuar me zgjedhjet e 9 shkurtit kanë votuar 14 mijë e 477 qytetarë më shumë.
Kryetari i KQZ-së, Kreshnik Radoniqi, ka thënë se në zgjedhjet e 9 shkurtit deri në orën 15 kishin votuar 28.32%.
“Në të njëjtën kohë në zgjedhjet e shkurtit, nga rreth 91% të vendvotimeve kishin votuar 28.32% apo 558,246 votues”, ka theksuar Radoniqi.
Radoniqi ka thënë se janë raportuar probleme me energji elektrike në disa qendra votimi,
Sipas raportit të orës 15:00, në dhomën operative të KQZ-së janë raportuar disa probleme me mungesë të energjisë në 3 qendra votimi në Komunën e Skenderajt, dy në Komunën e Malishevës, dy në Novobërdë dhe Obiliq. Për këto raste është njoftuar KEDS-i për të ndërmarrë hapa për të rikthyer energjinë dhe sipas informacioneve kjo ka ndodhur shumë shpejt”, ka thënë ai.
Deri në orën 13:00 votuan 18.59% të qytetarëve
Photo: Driton Paçarada
Sipas të dhënave të Komisionin Qendror të Zgjedhjeve (KQZ) deri në orën 13:00 kanë votuar 18.35% të qytetarëve.
Sipas të dhënave të publikuara në faqen e KQZ-së deri në këtë orë të drejtën e tyre për të votuar e kanë shfrytëzuar 371 mijë e 516 qytetarë nga 1 milion e 999 mijë e 204 qytetarë sa kanë të drejtë vote.
Këto të dhëna janë publikuar nga procesimi i të dhënave nga 98.56% e vendvotimeve.
Vështirësi në gjetjen e emrit në listën votuese e fotografime të votës - parregullsitë që gjeti DnV
Photo: Driton Paçarada
Që nga hapja e vendvotimeve në orën 07:00, sipas vëzhguesve të Demokracisë në Veprim (DnV) procesi i votimit në të gjithë vendin po rrjedh në mënyrë të qetë. Megjithatë, DnV ka evidentuar disa parregullsi.
Ankesa ka pasur nga votues që nuk e kanë gjetur emrin në qendrën e votimit ku janë paraqitur.
Vëzhguesit e DnV-së kanë raportuar se deri në orën 12:00, vështirësi për ta gjetur emrin në listë është raportuar në 50% të vendvotimeve, por që numri i rasteve ka qenë i vogël, deri në 10 raste të tilla.
Por ka pasur edhe vendvotime (1,6%) ku një numër i konsiderueshëm i votuesve (deri në 30 votues) nuk e kanë gjetur emrin e tyre në listë, e këtu prijnë komunat e Prishtinës dhe Pejës.
Ka pasur disa raste kur votuesit janë ankuar që dikush tjetër është nënshkruar në emër të tyre në Listën e Votuesve dhe atë në 1.4% të vendvotimeve, njoftoi DnV.
Sa i përket votimit me asistencë, deri në mesditë, komisionerët në 61% të vendvotimeve janë duke e zbatuar rregullën dhe janë duke kërkuar dokumentet për të lejuar votimin me asistencë. Në 35% të vendvotimeve, edhe pse votuesit kanë kërkuar të votojnë me asistencë, nuk janë lejuar të votojnë në mungesë të dokumenteve mjekësore, njoftoi tutje.
“Deri në orën 12:00, nga numri i deritanishëm i qytetarëve që kanë votuar, vetëm 1% prej tyre kanë votuar me asistencë. Po ashtu, në 5% të vendvotimeve kemi hasur në raste të izoluara (deri në 4 raste) ku votues të rinj në moshë kanë kërkuar të votojnë me asistencë. Si trend i përgjithshëm, votimi me asistencë po evidentohet në Libër, por nuk kanë munguar edhe rastet kur votimi me asistencë nuk është zhvilluar konform rregullave, dhe kjo ka ndodhur në 5% të vendvotimeve, ku deri në 10 raste nuk janë evidentuar fare në Librin e Votimit”.
Ndërkaq, janë raportuar edhe raste të fotografimit, gjithsej 13.
“Deri në orën 12:00, raste të fotografimit të votës janë 13”, tha DnV.
DnV ka thënë se në komunat me shumicë serbe, në veri të vendit, dalja në votime është raportuar të jetë mbi 22% që është gati dyfish më e lartë sesa mesatarja e përgjithshme e daljes në nivel vendi.
Avokati i Popullit: Personave që nuk dinë shkrim-lexim nuk po u lejohet të votojnë me asistencë
Zëvëndësavokatja e Popullit Majlinda Sinani-Lulaj, ka thënë se nga raportimet që kanë marrë nga kolegët në terren, ankesa ka pasur kryesisht për vështirësi në votimin me asistencë.
Sipas saj, përveç personave me aftësi të kufizuara, që për t’iu lejuar që dikush t’i asistojë në procesin e votimit duhet të kenë një dëshmi nga institucionet aftësinë e kufizuar, as personave që nuk dinë shkrim-lexim nuk u është lejuar të votojnë me asistencë.
“Ekziston edhe një farë konfuzioni edhe te vetë votuesit, në kuptimin asaj që tek pasi shkojnë edhe marrin një përgjigje nga zyrtarët që janë përgjegjës se nuk mund të votojnë pa një dëshmi për aftësinë e kufizuar të personat me aftësi të kufizuara, nuk janë rehat me këtë lloj përgjigje, por gjithashtu kemi edhe rastet kur kemi personat të cilët nuk janë të aftë të shkruajnë dhe të lexojnë dhe kanë problem me procesin e votimit, për të cilët nuk ka një sqarim, ose të paktën nuk jemi në dijeni që ka një sqarim të detajuar se si duhet vepruar me ta”, ka thënë Sinani-Lulaj në emisionin Zgjedhjet në KOHË.
Sinani-Lulaj ka thënë se edhe as personave të moshuar që kanë nevojë për asistencë nuk po u lejohet asistenca ose po kanë vështirësi për të votuar.
Për këtë të dielën ka folur kryesuesi i Komisionin Qendror të Zgjedhjeve (KQZ) Kreshnik Radoniqi.
“Për personat që nuk dinë shkrim dhe lexim nuk ka rregulla, ligji këtë kategori në 2023 e ka larguar si kategori për të votuar me asistencë. Sa i përket KQZ-së kemi një procedurë standarde edhe për këta persona, këtyre nuk iu mohohet e drejta e votimit, por këtyre personave asistimi nuk mund të bëhet prapa kutisë së votimit, asistimi i tyre bëhet vetëm deri tek kutia e votimit. Por mund të komunikojnë me këdo për të votuar, por votën duhet ta vendosin vetë”, ka thënë ai.
Osmani: Shpresoj që këto zgjedhje të rezultojnë me krijim sa më të shpejtë të institucioneve
Photo: Driton Paçarada
Presidentja Vjosa Osmani ka thënë se zgjedhjet e 28 dhjetorit duhet të rezultojnë me krijim sa më të shpejt të Kuvendit dhe qeverisë, për të çuar përpara procese të domosdoshme për vendin.
Pasi ka ushtruar edhe vetë të drejtën e votës, Osmani ka shtuar se është e bindur që “të gjitha partitë politike do të gjejnë një rrugë përpara që të kemi institucione funksionale dhe me legjitimitet të plotë”.
“Uroj që Republika jonë të ketë zgjedhje të qeta, të rregullta, demokratike. Uroj të kemi zgjedhje me pjesëmarrje sa më masive të qytetarëve. Zgjedhjet janë proces i rëndësishëm demokratik. Shpresoj që rezultatet të rezultojnë me krijim sa më të shpejt të parlamentit dhe zgjedhje të qeverisë, që janë të domosdoshme për procese të rëndësishme të brendshme dhe ndërkombëtare për Kosovën”, ka thënë presidentja.
Në Rahovec ankesa për shenja të dukshme në numra te fletëvotimet
Photo: Driton Paçarada
Kryetari i Komisionit Qendror të Zgjedhjeve (KQZ) Kreshnik Radoniqi, ka thënë se kanë pranuar ankesa nga disa qendra të votimit në Rahovec për shenja në numrat e fletvotimeve.
“Kemi pranuar njoftim nga Komuna e Rahovecit, ku në qendra të votimit është vërejtur se fletëvotimet kanë shenja të dukshme në numra. Kjo ka shkaktuar ankesa në radhët e këshillave të vendvotimit”, ka theksuar Radoniqi në konferencën për media.
Ai nuk e ka sqaruar se për çfarë shenjash bëhet fjalë.
Raportohen probleme me rrymë në 6 qendra votimi
Photo: Driton Paçarada
Kryetari i Komisionit Qendror të Zgjedhjeve (KQZ) Kreshnik Radoniqi, ka thënë se kanë pranuar ankesa për probleme më energjinë elektrike në 6 qendra të votimit.
“Sipas raportit të orës 11 në dhomën operative të KQZ-së janë raportuar probleme me mungesë të energjisë elektrike në 6 qendra të votimit, në 6 komuna, Istog, Ferizaj, Viti, Rahovec, Graçanicë dhe Gjilan”, ka thënë Radoniqi në konferencën për media.
Ai ka thënë se komisionet komunale të zgjedhjeve kanë njoftuar KEDS-in për këtë.
KQZ: 8.27% të votuesve votuan deri në orën 11:00
Photo: Driton Paçarada
Mbi 165 qytetarë me të drejtë vote kanë votuar deri në orën 11:00 të dielën.
Kryesuesi i Komisionit Qendror të Zgjedhjeve, Kreshnik Radoniqi, ka njoftuar se 165,404 persona apo 8.27% nga totali i votuesve kanë votuar deri tash.
“Nga të dhënat që kemi marrë nga rreth 94% të vendvotimeve, numri i qytetarëve që kanë votuar është 165,404 votues apo 8.27%. deri në të njëjtën kohë në zgjedhjet në shkurt kishin votuar 169,650 votues”, ka thënë ai.
Qytetari ankohet se nëna e tij që nuk di shkrim dhe lexim nuk u lejua të votonte
Photo: Driton Paçarada
Një votues është ankuar mëngjesin e së dielës se nëna e tij, që nuk di shkrim dhe lexim, nuk ka mundur ta shfrytëzojë të drejtën e votës sepse ai nuk është lejuar të jetë me të. Zenel Cërnaveri ka thënë se ka kërkuar informacion nga KQZ-ja nëse duhet të ketë ndonjë dokument, por se i është thënë se nuk i duhet.
Cërnaveri ka thënë se nëna e tij është në gjendje të mirë fizike për të ecur vetë dhe për ta hedhur votën në kuti, por se nuk di të lexoj fletëvotimin me emrat e kandidatëve.
“Isha sot të shkolla ‘Iliria’ të votoj me nënën, por paraprakisht në zgjedhjet lokale isha me nënën dhe nuk e lejuan të votojë. Nëna i ka 84 vjet, nuk din të shkruajë. Më thanë që duhet vërtetim. Isha të mërkurën në Matiqan te mjekët dhe i pyeta për dokument që ajo të votojë. Kam thirrë në KQZ, i pyeta se nëna i ka 84 vjet dhe çfarë dokumenti më duhet që unë ta asistoj nënën. Ata më thanë se nuk ke nevojë asgjë. I pyeta a jeni të sigurt se kështu më ka ndodhur, më thanë nuk ka problem. Kur shkova tash më nënën nuk na lejuan. Thanë ju duhet një dokument. Mbetëm pa votuar”, ka treguar ai për Kohën.
E, kryesuesi i KQZ-së, Kreshnik Radoniqi, pasi vetë ka shfrytëzuar të drejtën e votimit të dielën ka shpjeguar procedurën e votimit për personat që nuk dinë shkrim e lexim,
“Për personat që nuk dinë shkrim dhe lexim nuk ka rregulla, ligji këtë kategori në 2023 e ka larguar si kategori për të votuar me asistencë. Sa i përket KQZ-së kemi një procedurë standarde edhe për këta persona, këtyre nuk iu mohohet e drejta e votimit, por këtyre personave asistimi nuk mund të bëhet prapa kutisë së votimit, asistimi i tyre bëhet vetëm deri tek kutia e votimit. Por mund të komunikojnë me këdo për të votuar, por votën duhet ta vendosin vetë”, ka thënë ai.
Limaj, qytetarëve: Sot vendosni se në dorën e kujt do ta lini vendimmarrjen për vendin
Kryetari i Partisë Socialdemokrate, Fatmir Limaj, ka thënë se sot është ditë e rëndësishme për demokracinë e Kosovës.
Ai ka deklaruar se sot është dita e vendimmarrjes së çdo qytetari për ta bërë këtë shtet më funksional.
“Vendimmarrja sot është në dorën e çdo qytetari për t’i dhënë një mundësi, shpresë zhvillimit të shtetit të Kosovës. Shpresoj që çdo qytetar i Kosovës do të vendos për funksionimin e shtetit. Sot do të vendosni se në dorën e kujt do ta lini vendimmarrjen për Kosovën”, ka thënë ai.
Voton Abdixhiku: Në zgjedhje vendimmarrja kthehet te qytetari
Photo: Driton Paçarada
Kryetari i Lidhjes Demokratike të Kosovës, Lumir Abdixhiku, ka thënë se në zgjedhje vendimmarrja kthehet të qytetari.
Ai ka thënë se shpreson që dita e zgjedhjeve të shkojë mbarë e mirë.
"Më lejoni t’iu uroj në këtë ditë ku vendimmarrja i kthehet sovranit qytetarit, është ditë e mirë, e mbarë dhe të shpresojmë që në vazhdimësi gjithë procesi i votimit do të shkojë mbarë e mirë. Uroj që qytetarët e Kosovës në këtë ditë të rëndësishme që përcakton fatin e katër viteve të ardhshme”, është shprehur Abdixhiku, pasi ka votuar.
Hamza - qytetarëve: Votoni sipas bindjeve e vullnetit tuaj
Foto: Arkiv
Kryetari i Partisë Demokratike të Kosovës (PDK), njëherësh kandidat për kryeministër, Bedri Hamza, i ka ftuar të gjithë qytetarët që të votojnë, siç ka thënë, sipas bindjeve dhe vullnetit të tyre.
Ai pasi ka votuar ka theksuar se pret rezultat të mirë.
Kreu i PDK-së ka thënë se pret që dita e zgjedhjeve të jetë e qetë.
Kurti: Uroj që legjislatura e dhjetë ta konstituojë sa më shpejt Kuvendin
Photo: Driton Paçarada
Kryetari i Lëvizjes Vetëvendosje, Albin Kurti, ka ftuar qytetarët që ta ushtrojnë të drejtën e tyre dhe ta përdorin mundësinë për t’u përcaktuar për përbërjen e Kuvendit të ardhshëm.
Ai ka thënë se uron që legjislatura e dhjetë të konstituojë sa më shpejt Kuvendin e ardhshëm dhe ta formojë qeverinë e re.
“I falënderoj qytetarët për pjesëmarrjen në fushata, pastaj edhe për durimin dhe angazhimin që kanë treguar. Mendoj që pjesëmarrja do të jetë masive”, ka thënë ai.
DnV: 3% e vendvotimeve u hapën me vonesë, disa në mungesë të komisionerëve e disa të rrymës
Vetëm 3% e vendvotimeve janë hapur me vonesë të dielën, sipas koalicionit Demokracia në Veprim, e kjo kryesisht për shkak të mungesës së komisionerëve. Por, vonesën në dy vendvotime e ka shkaktuar edhe mungesa e energjisë elektrike.
E problem ka pasur edhe me kamerat në një numër të vogël vendvotimesh, ka njoftuar koalicioni i organizatave joqeveritare për vëzhgimin e zgjedhjeve, DnV.
“Sipas të dhënave të terrenit, me vonesë janë hapur vetëm 3% e vendvotimeve. Vonesa më të theksuara ka pasur në rajonin e Pejës. Është raportuar se shkaku kryesor pas vonesave në hapjen e vendovotimeve me kohë lidhet me mungesën e komisionerëve. Vetëm në 2% të vendvotimeve nuk ka pasur vendosje adekuate të kabinave të votimit apo kamerave. Vendosja jo e duhur e kamerave ka qenë më e shprehur në komunat me shumicë serbe”, thuhet në komunikatën për media.
DnV vlerësoi se një numër i konsiderueshëm i Qendrave të Votimit në Kosovë vazhdojnë të jenë të paqasshme për personat me aftësi të kufizuara fizike.
“Është raportuar se 16% e Qendrave të Votimit në nivel vendi nuk kanë infrastrukturë adekuate ose pjerrina që mundësojnë qasje më të lehtë në objekte ku po zhvillohet votimi”.
Vëzhguesit e DnV-së kanë raportuar prani të posterëve dhe materialeve tjera propaganduese të subjekteve politike brenda 100 metra të qendrës së votimit, konkretisht në afërsi të 3% të qendrave.
Po ashtu kanë raportuar se në 18% të qendrave nuk ka tavolina ndihmëse, që si problematikë është më e shprehur në rajonin e Ferizajt, Gjilanit dhe Pejës.
Demokracia në Veprim (DnV) po vëzhgon mbarëvajtjen e procesit zgjedhor me 500 vëzhgues statikë, të cilët janë janë prezentë në 500 vendvotime.
Haradinaj - qytetarëve: Votimi është vendimi më i madh që mund ta merrni
Kryetari i Aleancës për Ardhmërinë e Kosovës (AAK), njëherësh kandidat për kryeministër Ramush Haradinaj, u ka bërë thirrje qytetarëve që të votojnë.
Ai ka thënë se vendimi që të votojnë, është vendimi më i madh që mund ta marrin.
Haradinaj ka thënë se ka vendosur që të votojë në Gllogjan në mënyrë që t’i bashkohet pjesës tjetër të familjes, duke potencuar se pjesa e tjetër e familjes së tij do të votojë në Prishtinë.
Lista Serbe sërish voton në grup
Lista Serbe edhe në këto zgjedhje, si në ato lokale, ka votuar në grup.
Kreu i kësaj partie, Zlatan Elek, ka thënë se pret që këto zgjedhje të jenë të qeta dhe demokratike.
Ai ka bërë apel te qytetarët serbë të Kosovës që të dalin sa më shumë në numër të votojnë.
“Sot, një ditë e lumtur, ditë pune dhe zgjedhje. Siç po e shihni është një numër i madh i qytetarëve që kanë ardhur në vendvotime. Pres që këto zgjedhje të jenë të qeta dhe demokratike, apeloj te qytetarët tanë që në numër sa më të madh të dalin e të votojnë dhe ta shfrytëzojnë të drejtën e tyre demokratike dhe t`i zgjedhin ata që do t`i përfaqësojnë nesër, përkatësisht t`i zgjedhin përfaqësuesit e tyre të drejtë”, ka thënë ai.
Edhe në më 12 tetor, në zgjedhjet lokale, Lista Serbe pati votuar në grup, gjë që ishte konsideruar e jashtëligjshme.
Rreth 100 prokurorë të angazhuar për mbarëvajtjen e zgjedhjeve
Photo: Driton Paçarada
Rreth 100 prokurorë të shtetit dhe staf mbështetës të sistemit prokurorial janë angazhuar në zgjedhjet e sotme.
Në një komunikatë për media bëhet e ditur se Prokurori i Shtetit ka bërë të gjitha përgatitjet e nevojshme për të realizuar mbrojtjen e votës së lirë të qytetarëve, duke garantuar integritetin e procesit zgjedhor.
“Në këto zgjedhje janë angazhuar rreth 100 prokurorë të shtetit dhe zyrtarë të sistemit prokurorial, të cilët po qëndrojnë kujdestarë në gjithë territorin e Republikës së Kosovës, deri në përfundim të procesit zgjedhor, me qëllim të procedimit të çdo parregullsie që mund të ndodhë në këto zgjedhje të parakohshme për Kuvendin e Republikës së Kosovës. Prokurorët janë duke qëndruar në zyrat e tyre në qytetet ku ekzistojnë prokuroritë themelore, ndërsa në ato vende ku prokuroria nuk ka objekt, prokurorët do të qëndrojnë në stacione policore, ku në bashkëpunim me hetuesit e Policisë së Kosovës do të jenë në mbrojtje të votës së lirë të qytetarëve”, thuhet në njoftim.
Ndërkaq, koordinatorja nacionale për zgjedhje, prokuroja Laura Pula njoftohet se po e mbikëqyrë gjithë mbarëvajtjen e zbatimit të detyrave të koordinatorëve rajonal, prokurorëve të angazhuar dhe prokurorit me detyrë në KQZ.
KQZ: Procesi i votimit ka nisur në kohë në të gjitha qendrat
Materiali zgjedhor, përfshirë fletëvotimet, është shpërndarë në orët e hershme dhe votimit veçse ka nisur siç është paraparë në orën 7:00, njoftoi Komisioni Zgjedhor i Kosovës.
Zëdhënësi i KQZ-së, Valmir Elezi, ka thënë se procesi i votimit ka nisur me rregull në të gjitha qendrat e votimit.
“Procesi i votimit ka nisur në të gjitha qendrat e votimit në Kosovë. Sot procesi i votimit do të zhvillohet në 948 qendra të votimit me 2614 vendvotime, prej të cilave 910 janë qendra dhe 38 qendra për votim me kusht. Numri i qytetarëve me të drejtë vote është 1,999,204 votues”, ka thënë ai në konferencën për media.
Elezi ka treguar se para orës 20:00 të së dielës do të nis transmetimi i rezultateve preliminare.
“KQZ ka bërë përgatitje që gjatë ditës së sotme të transmetoj të dhënat nga procesi i pjesëmarrjes në qytetarëve në votime në disa orare dhe në mbrëmje të filloj me transmetimin e rezultateve preliminare për subjektet politike. Besojmë se para orës 20:00 do të fillojmë me transmetimin e të dhënave nga vendvotimet e para që deri në atë kohë arrin që ta përfundojnë numërimin e fletëvotimeve”, ka thënë Elezi.
Radoniqi: Qytetarët ta shfrytëzojnë të drejtën e votës
Kryetari i Komisionit Qendror të Zgjedhjeve, Kreshnik Radoniqi, pas votimit u ka bërë thirrje qytetarëve të dalin dhe ta shfrytëzojnë të drejtën e tyre të votës.
Ai ka thënë para mediave se përkundër kohës së shkurt dhe sfidave, janë bërë të gjitha përgatitjet e duhura dhe gjithçka është gati sa i përket KQZ-së.
“Dje e kemi pas procesin e votimit në diasporë dhe gjithçka ka shkuar qetë sipas njoftimeve. Uroj që të jetë një ditë e qetë dhe e mbarë për të gjithë dhe procesi të mos ketë asnjë problem”, ka thënë ai.
Radoniqi ka thënë se pa përfshirë Amerikën dhe Kanadanë, numri i atyre që kanë votuar në diasporë është mbi 15 mijë.
Hapen vendvotimet
Photo: Driton Paçarada
Nga ora 7 e mëngjesit janë hapur vendvotimet në qendrat zgjedhore në komunat e Kosovës.
Të drejtë vote në këto zgjedhje kanë 1 milion e 999 mijë e 24 persona.
Një ditë para fillimit të votimit, Komisioni Qendror i Zgjedhjeve bëri të ditur se janë zhvilluar të gjitha përgatitjet e nevojshme për mbarëvajtjen e procesit.
Përveç qendrave të rregullta të votimit, në secilën komunë do të ketë nga një qendër për votim me kusht.
Sipas KQZ-së, procesi zgjedhor do të zhvillohet në 910 qendra të votimit në 2557 vendvotime.
Kosova voton
Foto: Arkiv
Photo: Driton Paçarada
Rreth dy milionë shtetas të Kosovës do të kenë mundësi të votojnë të dielën, në zgjedhjet e parakohshme parlamentare që u shpallën pasi legjislatura e dalë nga zgjedhjet e 9 shkurtit, nuk e miratoi asnjërin prej dy kabineteve qeveritare që u propozuan.
Të shtunën në mëngjes, ekipe të Komisionit Qendror të Zgjedhjeve (KQZ), kanë shpërndarë materialin zgjedhor, përfshirë fletëvotimet për në 38 komunat e Kosovës. Që nga ora 7:00, 1 milion e 999 mijë e 24 shtetas kanë të drejtë t’u drejtohen vendvotimeve, për ta zgjedhur legjislaturën e dhjetë.
Zëdhënësi i KQZ-së, Valmir Elezi, tha se të gjitha përgatitjet janë bërë në mënyrë që procesi i votimit të nisë me kohë.
“Numri i qendrave të votimit që do të hapen më 28 dhjetor është 948, prej të cilave 910 për votimin e rregullt me 2,557 vendvotime. Po ashtu, do të hapen edhe 38 qendra të votimit me gjithsej 57 vendvotime për të mundësuar votimin me kusht”, ka treguar Elezi.
Për zgjedhjet e së dielës, garojnë 24 subjekte politike me 1,180 kandidatë për deputetë. Nga to, 8 subjekte politike janë të shqiptarëve me 624 kandidatë që synojnë 100 vendet në Kuvend, ndërkaq pjesa tjetër janë subjekte nga radhët e komuniteteve që garojnë për 20 ulëset e garantuara.
Zgjedhjet e muajit shkurt e edhe këto të dhjetorit do të organizohen konform ndryshimeve ligjore, sipas të cilave deri në orën 7:00 kur të hapen vendvotimet, subjektet politike kanë të drejtë të bëjnë fushatë. Ndryshimet kërkojnë që pasi të mbyllen kutitë në orën 19:00, numërimi i votave në vendvotime të bëhet vetëm për partitë, ndërsa për kandidatët për deputetë procedura do të zhvillohet nga e hëna.
Zëdhënësi Elezi bëri të ditur se në kohë reale do të nisë publikimi i rezultateve preliminare në orën e parë pasi të përfundojë votimi.
“KQZ-ja ka bërë përgatitjet që më 28 dhjetor të publikohen rezultatet preliminare të subjekteve politike nga zgjedhjet për Kuvendin e Kosovës. Rezultatet nga vendvotimet e para, do të fillojnë të publikohen duke filluar para orës 20:00 dhe ato do të përditësohen vendvotim pas vendvotimi”, ka thënë ai. “Pra, brenda një kohe të shkurtër pasi numërohen fletëvotimet e një vendvotimi, do të publikohen të dhënat në platformën e rezultateve”.
Në zgjedhjet e 9 shkurtit, pati dështuar platforma për publikimin e rezultateve në kohë reale. Zyrtarë të KQZ-së patën thënë se ka pasur ndërhyrje të jashtme në sistem.
Por, në vjeshtë, në zgjedhjet lokale dhe në balotazhin që pasoi, platforma ka funksionuar dhe që në orën e parë pas mbylljes së votimit, ka nisur të publikohen rezultatet.
Përveç rezultateve, KQZ-ja do të publikojë në pesë orare të ndryshme edhe të dhëna për pjesëmarrjen e votuesve: 09:00, 11:00, 13:00, 15:00, 17:00 dhe 19:00.
Kryetari i KQZ-së, Kreshnik Radoniqi, u ka bërë apel të gjithë anëtarëve të komisioneve komunale zgjedhore dhe të këshillave të vendvotimeve që të jenë në nivel të detyrës, të respektojnë ligjin dhe rregullat zgjedhore të KQZ-së.
“Na pret një ditë e gjatë nesër, një ditë ku duhet t’i ofrojmë qytetarëve të drejtën e votës, andaj shpresojmë që të gjithë janë në nivel të detyrës dhe të respektojnë rregullat dhe ligjin”, ka thënë Radoniqi, në konferencën e KQZ-së, të organizuar në orët e mbrëmjes.
Edhe në institucione të tjera kanë thënë se janë ndërmarrë të gjitha veprimet, për ta garantuar një proces të drejtë votimi.
Policia ka hartuar dhe e ka në zbatim urdhrin operativ për ditën e zgjedhjeve dhe një ditë më parë në ambientet e Drejtorisë së Përgjithshme të Policisë janë mbajtur dy takime koordinuese lidhur me planifikimin, zbatimin dhe koordinimin e këtij urdhri.
Drejtori i Përgjithshëm i Policisë, Gazmend Hoxha, ka kërkuar nga të gjithë menaxherët rajonalë e ata qendrorë mbikëqyrje dhe ka dhënë porosinë që policia të kryejë këtë aktivitet me profesionalizëm e integritet sa më të lartë.
Policia ka dhënë zotimin se, në bashkëpunim me institucionet vendore dhe ndërkombëtare, do t’i zbatojë detyrat dhe përgjegjësitë e saj me qëllim të garantimit të ushtrimit të lirë dhe demokratik të drejtës së votës për të gjithë qytetarët. Ky institucion ka inkurajuar qytetarët që të bashkëpunojnë dhe të raportojnë çdo rast të dyshuar apo veprim të kundërligjshëm që ndërlidhet me sigurinë dhe procesin zgjedhor.
Apel të njëjtë ka bërë edhe Prokuroria.
Zyra e Prokurorit të Shtetit ka ftuar qytetarët, subjektet politike, institucionet dhe organizatat e ndryshme që të denoncojnë çdo rast për të cilin dyshohet se ka keqpërdorim apo manipulim të votës, në çfarëdo forme dhe nga kushdo qoftë.
Në njoftimin e këtij institucioni është thënë se kanë përfunduar të gjitha përgatitjet me qëllim të mbrojtjes së votës së lirë të qytetarëve dhe garantimi i integritetit të procesit zgjedhor.
Kjo zyrë ka bërë të ditur se të dielën do të angazhohen rreth 100 prokurorë të shtetit dhe zyrtarë të sistemit prokurorial.
“Ata do të jenë të shpërndarë në të gjithë territorin e Republikës së Kosovës dhe do të qëndrojnë kujdestarë deri në përfundim të plotë të procesit zgjedhor, me qëllim të trajtimit dhe procedimit të çdo parregullsie apo shkeljeje të mundshme ligjore që mund të ndodhë gjatë zgjedhjeve”, ka bërë të ditur organi i akuzës.
Mbarëvajtja e këtij procesi zgjedhor do të monitorohet edhe nga vëzhgues vendorë e ndërkombëtarë. Të shtunën mbrëma, në zyrat e KQZ-së janë pritur edhe vëzhguesit nga Shqipëria. Në cilësinë e vëzhguesve të këtyre zgjedhjeve, pos organizatave joqeveritare e disa të tjerave ndërkombëtare, i akredituar është edhe Këshilli i Evropës me 23 vëzhgues.
Para zgjedhjeve pati fushatë 11-ditore. Grupi i organizatave joqeveritare, Demokracia në Veprim (DnV), ka vlerësuar se fushata ka qenë konkurruese, por e përqendruar te liderët, dhe ka pasur nivel të zbehtë të entuziazmit qytetar.
Në një konferencë për media në ditën e fundit të fushatës, Ismet Kryeziu, drejtues i DnV-së u shpreh se gara ka qenë e qetë dhe pa incidente serioze.
Megjithatë, sipas DnV-së, vëzhgimi ka treguar disa prirje dhe sfida që kanë ndikuar drejtpërdrejt në cilësinë e fushatës.
“Pjesëmarrja e qytetarëve në aktivitetet e fushatës është luhatur ndjeshëm mes subjekteve politike dhe formave të organizuara të takimeve, nga qindra pjesëmarrës deri në mbi 1000 pjesëmarrës. Llojet e aktiviteteve kanë qenë të kombinuara me pjesëmarrje të mesme dhe me pjesëmarrje të gjerë në prezantimin e listave, dhe janë zhvilluar kryesisht në ambiente të mbyllura. Shtrirja e aktiviteteve ka treguar përqendrim të subjekteve në qendrat urbane dhe komunat më të mëdha e me peshë elektoral, ndërsa komunat më të vogla kanë qene më pak të ekspozuara”, thuhet në njoftimin e DnV-së.
Ky grup organizatash ka konstatuar edhe personalizim dhe centralizim fushatash.
“Liderët partiakë, apo kandidatët për kryeministër kanë dominuar pothuajse të gjitha aktivitetet, ndërsa kandidatët për deputetë dhe strukturat e tjera partiake ka pasur rol dytësor. Edhe pse ka pasur takime dhe organizime të kandidatëve pa prezencën e liderit, këto takime kryesisht kanë qenë të karakterit të takimeve të vogla. Ky personalizim i fushatës drejt liderit, ka kufizuar mundësitë dhe paraqitjet programore nga ana e kandidatëve”, ishte gjetja tjetër.
Sipas DnV-së, fushata ka qenë e përqendruar kryesisht në çështjet ekonomike, sociale dhe të sigurisë. Temat kanë qenë punësimi, pagat, mirëqenia sociale, arsimi, shëndetësia, infrastruktura dhe anëtarësimi në NATO. Këto tema kanë dominuar mesazhet publike të subjekteve politike dhe janë përdorur si elemente kyçe për mobilizimin e elektoratit.
Sipas DnV-së, përdorimi i gjuhës fyese e diskriminuese ka qenë shumë më pak i shprehur në këtë fushatë.
Të dielën, DnV-ja do të vëzhgojë procesin zgjedhor, me 550 vëzhgues në terren, që do të raportojnë gjatë gjithë ditës për mbarëvajtjen e votimit dhe numërimin e votave, ndërsa 50 operatorë në Qendrën e Thirrjeve do të përpunojnë të dhënat në mënyrë digjitale.
Por, për ditën e zgjedhjeve, është shprehur një brengë në KQZ – 888 qendra të votimit nga 948 sa do të jenë të hapura të dielën mund të përballen me ndërprerje të rrymës në ditën e zgjedhjeve. E, përfaqësues të KEDS-it, pas takimit me ata të KQZ-së, kanë dhënë zotimin se do të sigurojnë kushte për furnizim të qëndrueshëm me rrymë dhe thanë se për këtë qëllim do të angazhohen ekipe në çdo qendër votimi.
Në kuadër të ndryshimeve ligjore për zgjedhjet, është kërkuar që në vendvotime e edhe në qendra të numërimit të rezultateve, të ketë kamera të instaluara.