Rrjeti i madh social, Instagram, do të shfaqë veçorinë e kontrollit prindëror në platformën e vet që nga muaji mars i vitit të ardhshëm, ka njoftuar Adam Mosseri, shef i shërbimit. Veçoria e re do t’ua mundësojë prindërve dhe kujdestarëve të fëmijëve të përcjellin se sa fëmijët po kalojnë kohë në Instagram, t’u caktojnë limite përdorimi e të njoftohen nëse fëmija e raporton dikë.
Kontrollet u prezantuan si pjesë e pakos së veçorive të reja që synojnë ta bëjnë platformën një hapësirë më të sigurt, sidomos për adoleshentët.
Edhe pse Mosseri ka thënë se veçoritë janë duke u përpunuar qe një kohë shumë të gjatë, njoftimi vjen vetëm pas dëmeve që pësoi kompania pasi u ribrendua nën emrin “Meta”. Ish-punonjësja Frances Haugen zbuloi se si Instagrami ishte në dijeni se shërbimi i rrjetit social u bën dëm adoleshenteve, por që s’kishte ndërmarrë veprime.
Krahas kontrollit prindëror, Instagrami ka njoftuar se po punon edhe në qendra edukimi për prindërit dhe kujdestarët që t’u ofrojnë shpërblime e këshilla se si fëmijët t’i përdorin rrjetet sociale.
