Trumpi për TikTok-un: Ndoshta duhet ta mbajmë edhe për pak kohë

Presidenti i sapozgjedhur i SHBA-së, Donald Trump, duke folur me mbështetësit konservatorë në “Turning Point USA's AmericaFest 2024” të dielën, ka thënë se do t’i duhet të fillojë të mendojë për TikTok-un, por ka shtuar se ndoshta do të duhet të mbahet platforma edhe për pak kohë.

"Do të më duhet të filloj të mendoj për TikTok-un. Mendoj se do të duhet të fillojmë të mendojmë sepse, ju e dini, ne vazhduam me TikTok dhe patëm një përgjigje të shkëlqyer me miliarda shikime, miliarda dhe miliarda. Më sollën një tabelë, dhe ishte një rekord, dhe ishte aq e bukur për t'u parë, dhe ndërsa e shikoja, thashë: Ndoshta duhet ta mbajmë edhe për pak kohë", ka deklaruar Trumpi.

Trumpi po i referohej përgjigjes që mori fushata e tij në platformën e mediave sociale gjatë zgjedhjeve presidenciale.

Një ligj federal i SHBA-së, i miratuar në prill, caktoi 19 janarin si afatin kur TikTok duhet të shitet nga kompania e tij mëmë kineze ose përndryshe do të përballet me një ndalim në Shtetet e Bashkuara.

Gjykata Supreme e SHBA-së ka vendosur të dëgjojë argumentet muajin e ardhshëm mbi kushtetutshmërinë e ligjit.