Kampioni i Kosovës në hendboll, Rahoveci, ka fituar në Rumani ndaj skuadrës së madhe Minaur Baia Mare, por është eliminuar nga Kupa Evropiane.
“Vreshtarët” të shtunën fituan me rezultatin 40:35 ndaj skuadrës së njohur rumune, por kjo fitore nuk u ka mjaftuar për të avancuar në raundin e katërt të EHF European Cup.
Ishte ndeshja kthyese e raundit të tretë të nivelit të tretë të garave kontinentale. Vendimtar për eliminimin e kampionit kosovar ishte humbja 38:31 në palestrën “Mizahir Isma” në Rahovec, të shtunën e kaluar.
Në ndeshjen në Rumani më efikasi te Rahoveci ishte Victor Alonso Garcia me 10 gola në 15 tentime. Gjashtë prej golave i shënoi nga penalltia.
Me shtatë gola u dallua Arbios Mushkolaj. Gjashtë gola i pati Jon Muqolli, Egzon Gjuka pesë, kurse me nga katër gola kontribuuan Mali Luzha dhe Jeton Bislimi. Alban Haziri realizoi tri herë, ndërsa Adonit Isufi e pati një gol të shënuar.
Edhe
Rahoveci mposhtet në ndeshjen e parë nga skuadra e madhe rumune
Në portë, Arbër Curri priti tetë nga 32 tentime të kundërshtarëve, kurse Arti Luzha pati dy pritje nga 13 tentime.
Te skuadra rumune u dallua Tudor Botea me tetë gola në 11 gjuajtje.
Mysafirët prej minutës së dytë kur shënoi Arbios Mushkolaj për 2:1, ishin në epërsi për kohë të gjatë. Rezultati u barazua në minutën e 21-të në 13:13, ndërsa pjesa e parë u mbyll 19:19. Fillimi i pjesës së dytë i takoi skuadrës rumune, por Rahoveci shpejtë u kthye me mbrojte të fortë e sulm efikas.
Pati edhe epërsi prej pesë golave 33:28, por nuk arriti që të shkëputej më shumë se kaq.
Rahovecit i duhej fitorja me shtatë e më shumë gola dallim për të avancuar tutje. Fitoi me vetëm pesë gola dallim, por paraqitja ndaj ekipit me përvojë në këtë garë është vlerësuar shumë pozitive.
Edhe
Rahoveci pëson humbje të thellë në Luksemburg
Për Rahovecin është hera e dytë që paraqitet në garat kontinentale dhe ishte i vetmi ekip nga Kosova që kishte mbetur në garat ndërkombëtare në këtë edicion.
Në raundin e dytë e eliminoi Bocholtin e Belgjikës. Kështu raundi i tretë mbetet ende i pakalueshëm për skuadrat kosovare të hendbollit.
