-
Nga:
Arsim Maxhera
- 23 tetor 2026 21:35
- Shpërndaje në:
Hendbollistet e përfaqësueses së Kosovës e kanë bërë hapin e madh drejt raundit të fundit të kualifikimeve për Kampionatin Botëror 2027.
Të premten mbrëma në Prishtinë, Kosova fitoi bindshëm, 39:22, ndaj Estonisë. Ishte kjo ndeshja e parë e raundit të parë kualifikues. Ndeshja e dytë është menjëherë të shtunën prej orës 17:00 në palestrën e njëjtë.
Kosova në dy kampanjat e kaluara e mbylli me sukses raundin e parë kualifikues për Botëror. Dhe suksesin e njëjtë thuajse e siguroi pas ndeshjes së parë.
Kroati Nenad Shoshtariq debutoi te Kosova me sukses. Në fakt Shoshtariq drejtoi Kosovën edhe në Lojëra Mesdhetare, ku përfaqësuesja u paraqit kryesisht me lojtare të reja. Tekniku i njohur kroat të premten e kishte sfidën e parë të vërtetë.
Kosova llogaritej favorite ndaj Estonisë dhe këtë e dëshmoi me paraqitje në fushën e lojës. Që në pjesën e parë u krijua epërsi bindëse, që u mbajt vazhdimisht gjatë gjithë pjesës së dytë.
Merlinda Qorraj ishte më efikasja te Kosova. Ajo i shënoi 13 gola nga 14 tentime. Kapitenia Mirjeta Bytyqi i shënoi pesë gola, sa i kishte edhe Elisa Mulaj. Katër gola i shënoi 17-vjeçarja Ardiola Surdulli, kurse nga tri i kishin Dafina Mustafa e Elsa Shala. Plot 20 pritje i bëri Aurora Kryeziu, derisa në mbrojtje dhe organizim të lojës u dallua Mirela Gjikokaj. Pos Surdullit e Shalës debutoi edhe Erza Dreshaj.
“Ishte një paraqitje dhe fitore bindëse. Kanë funksionuar shumë gjëra në lojën tonë, ndërsa tani na mbetet që ta konfirmojmë këtë fitore në ndeshjen e dytë dhe të bëhemi gati për kundërshtarin që na pret. Por natyrisht njëherë i gjithë fokusi është te ndeshja e dytë me Estoninë që duhet ta mbyllim me sukses”, ka thënë Qorraj.
Edhe
Kosova gati për ndeshjet ndaj Estonisë
Përzgjedhësi Shoshtariq është ndarë i kënaqur me paraqitjen, por ka tërhequr vërejtjen se ekipi ka potencial për të ofruar edhe më shumë.
“Ka cilësi në këtë grup, ndërsa duhen ende përmirësime. Disa episode që u paraqitën në mungesë të disiplinës taktike duhet të shmangen. Por në përgjithësi ishte një paraqitje e suksesshme”, ka thënë Shoshtariq.
Synimi i madh i Kosovës është kualifikimi në Evropian apo Botëror.
