Volejbollistët e Kosovës U18 e kanë luajtur të hënën ndeshjen e fundit në grupe në fazën e parë kualifikuese për Kampionat Evropian.
Kosova U18 pësoi 3:0 në sete nga Turqia në Podgoricë.
Turqit e rinj ishin bindës, ndërsa Kosova ishte pa gjasa. Në setin e parë volejbollistët e Kosovës fituan vetëm tetë pikë. Dy setet tjera përfunduan 25:11 në të mirë të Turqisë.
Maksimumi prej 11 pikëve në set në volejboll është bilanc goxha i zbehtë.
Por Kosova e përfundoi gjithë turneun kualifikuar pa e fituar asnjë set të vetëm.
Po në Podgoricë të dielën humbi 3:0 nga Mali i Zi. Në setin e parë volejbollistët e Kosovës i fituan vetëm gjashtë pikë. Në setin e dytë i kishin 17 e në të tretin 16.
Me 3:0 në sete përfundoi edhe ndeshja mes Rumanisë dhe Kosovës U18.
25:11, 25:12, 25:13 ishte rezultati i seteve, në të mirë të rumunëve të rinj.
Kosova U18 përfundoi e katërta në Grupin A dhe e shtata, përkatësisht e fundit, në plasmanin e përgjithshëm. Në grupin tjetër ishin tri përfaqësuese, Bullgaria, Greqia e Serbia.
Kualifikimet evropiane janë të ndara në zona. Në zonën ballkanike dy të parët në grup kualifikohen në gjysmëfinale. I treti në grup luan për vendin e pestë. Vetëm fituesi i gjithë turneut kualifikohet në Evropian.
Në volejboll humbjet e Kosovës janë të rregullta në ndeshje kualifikuese. Madje në shumicën e rasteve me rezultatin 3:0 në sete. Me gjithë përpjekjet e federatës, arritja e rezultateve pozitive po del të jetë shumë sfiduese.