UEFA ka konfirmuar se do t’i hetojë të gjitha incidentet që ndodhën gjatë humbjes së Rangersit në shtëpi nga Slavia Praga të enjten në mbrëmje.
Mesfushori i Rangersit, Glen Kamara, ka thënë se është fyer në bazë racore nga qendërmbrojtësi çek i Slavias, Ondrej Kudela, në fund të ndeshjes kthyese të 1/8 së finales.
UEFA fillimisht ka thënë se është e vetëdijshme për atë që ka ndodhur në tunel në fundin e ndeshjes, ndërsa më pas ka njoftuar se do të bëj hetime.
Skuadra e udhëhequr nga Gerrardi, Rangersi, humbi 2:0 dhe u eliminua me rezultatin e përgjithshëm 3:1, ndërsa me të kuq te vendësit u ndëshkuan Kemar Roofe dhe Leon Balogun.
“Glen Kamara për mua është njësoj si të gjithë të tjerët në dhomën e zhveshjes. I besoj 100% në akuzat që ai i ka lëshuar. Lojtarët përreth e kanë dëgjuar. Do t’i qëndroj afër Glen Kamaras”, ka thënë trajneri Gerrard pas ndeshjes.
Në komunikatën e lëshuar nga Slavia në faqen zyrtare në gjuhën angleze, Kudela e ka pranuar se ka përdorur gjuhë ofenduese.
“E kam thënë nën emocione, por mohoj se kam thënë diçka raciste në ato fjalë”, ka shtuar Kudela.