Superderbi i Gjilanit nuk do ta ketë madhështinë e zakonshme

Te Drita e te Gjilani janë të vendosur për ta fituar derbin e qytetit dhe përballjen më të madhe të sportit kosovar. Derbi që luhet të dielën, megjithatë, nuk do ta ketë shkëlqimin e zakonshëm. Do të luhet pa shikues, që i japin madhështi përballjes së dy skuadrave nga qyteti i Gjilanit.

Takimi i kampiones me nënkampionin, megjithatë, pritet të ofrojë emocion. Përballë njëra-tjetrës do të jenë dy prej skuadrave kryesore të Superligës, që kërkojnë titullin edhe këtë edicion, shkruan KOHA.

Drita e Gjilani kanë lojtarë cilësorë në përbërje dhe në fushën e blertë nuk pritet të mungojnë momentet e mira. Por, “zjarri” i zakonshëm, që e ka bërë këtë përballje derbin më të madh në vend, do të mungojë.

Lojtarët e të dy skuadrave në fushë do të dalin me të njëjtin synim – për ta fituar derbin dhe për ta marrë primatin në qytet, të paktën deri në derbin e ardhshëm.

Kryendeshja e xhiros së gjashtë luhet të dielën nga ora 13:30 me Dritën si vendase. Por, në stadiumin ku dy skuadrat i luajnë ndeshjet si vendas, këtë herë nuk ka peshë nikoqirllëku. Tifozët nuk do të jenë të pranishëm për t’u vendosur në tribunën kryesore, apo atë përballë.

Edhe Sport 8 nën 2022 Derbi mes Gjilanit e Dritës, luhet sërish pa tifozë

Aktivitetet sportive në vend vazhdojnë të zhvillohen pa shikues, si pjesë e luftës ndaj përhapjes së COVID-19.

Drita, për shkak të garave evropiane, ka luajtur vetëm tri ndeshje në Superligë, të cilat i ka fituar. Renditet e dyta me 9 pikë. Ndërkohë Gjilani ka tetë pikë nga pesë ndeshje dhe renditet i katërti. Prin Ballkani me 16 pikë nga gjashtë ndeshje, kurse e treta është Arbëria me tetë pikë, po nga gjashtë ndeshje.