Skuadra “Depërtejshën” e përbërë nga basketbollistë të njohur si, Arti Hajdari, Egzon Gjurka, Blend Matoshi dhe Beqë Kovaçi, janë kampionë të rinj, të ‘Streetball Kosova 2018’.
Ekipi kampion i Pejës, në superfinale mposhti nënkampionin e vitit 2016, ekipin Air Force One, me rezultat 22:15, transmeton KTV.
Superfinalja ishte tejet e luftuar me të dyja skuadrat që dhuruan spektakël edhe për publikun e pranishëm në sheshin “Zahir Pajaziti” në Prishtinë.
Por “Depërtejshën” të udhëhequr nga basketbollisti i Kombëtares së Kosovës, Arti Hajdari si dhe Egzon Gjurka, arritën të triumfonin në Superfinalen e Madhe.
Deri në finale, Depërtejshën erdhi duke mposhtur skuadrat nga Ferizaj dhe Gjilani, por pësoi disfatë nga Air Force One, në ndeshjen vendimtare të grupit A dhe zuri vendin e dytë.
Në gjysmëfinale, Depërtejshën eliminoi nënkampionen e edicionit të kaluar, skuadrën Shmekat, e cila luajti me Qëndrim Birajn, Ujkan Karanezin, Altin Morinën dhe Urim Zenelajn 21:16, për të kaluar në finalen e madhe.
Para finales , publiku në Sheshin Zahir Pajaziti pati mundësi të kënaqej me garën atraktive të ngulitjeve, “SPRITE, gara për ngulitjen më të bukur”.
Edhe
Peja fiton titullin pas një dekade
Arbër Shala, Kreshnik Bërnica dhe Arian Memeti ishin tre garuesit e paraqitur për këtë garë, kurse në fund, basketbollisti gjilanas Arian Memeti, mblodhi duartrokitjet më të mëdha dhe u shpall fitues.
Një tjetër atraksion para ndeshjes finale, ishte ndeshja ekzibicionale e dy ekipeve të femrave, nga streetballistet nga Peja e Gjakova.
Skuadra Depërtejshën me triumfin në Superfinale, fitoi shpërblimin prej 800 eurove dhe të drejtën të përfaqësojë Kosovën në “Challenger Streetball” në Bukuresht të Rumanisë.
