Skuadrave që luajnë në Evropë u lejohen stërvitjet

Skuadrave që do ta përfaqësojnë futbollin kosovar në kupat evropiane për edicionin 2020/21 do t’u lejohen stërvitjet, përkundër masave të reja që ka ndërmarrë Qeveria e Kosovës për parandalimin e pandemisë COVID-19. Kështu ka bërë të ditur të premten Sekretari i Përgjithshëm i Federatës së Futbollit të Kosovës (FFK), Eroll Salihu, pas bisedave që ka pasur me krerët e institucioneve përkatëse.

Kampionia Drita, nënkampioni Gjilani dhe Prishtina si fituese e Kupës së Kosovës, do të luajnë në kupat evropiane gjatë këtij muaji. Drita do të paraqitet në turneun preliminar të Ligës së Kampionëve, derisa Gjilani e Prishtina do të luajnë ndeshjet parakualifikuese të Ligës së Evropës. Ditë më parë, Qeveria e Kosovës ka publikuar masat e reja për parandalimin e përhapjes së pandemisë të koronavirusit. Në një numër të madh të masave të reja janë përfshirë edhe ato për aktivitetet sportive, ku, siç thuhej në njoftimin qeveritar, “ndalohen veprimtaritë rekreative, kulturore dhe sportive në mjedise të mbyllura dhe të hapura në të gjithë territorin e Republikës së Kosovës, duke përfshirë shkollat e futbollit dhe sportet e tjera, trajnimet e të gjitha lëmive etj.” Ky vendim ishte vlerësuar i ngutshëm nga komuniteti i futbollit, përfshirë këtu edhe FFK-në, që kishte thënë se do të bëjë të pamundurën që të paktën ekipeve që do të luajnë në Evropë t’u mundësohet të përgatiten për një përfaqësim sa më të denjë.

“Kemi biseduar me kryeministrin Avdullah Hoti, presidentin Hashim Thaçi dhe ministren e Sportit, Vlora Dumoshi, në lidhje me këtë çështje dhe kemi hasur në mirëkuptim. Të gjithë e kanë vlerësuar të rëndësishme paraqitjen e ekipeve tona në garat evropiane, të cilat nuk do të kenë telashe të stërviten përkundër vendimeve të reja të Qeverisë për parandalimin e përhapjes së koronavirusit”, është shprehur Salihu. “Pas kësaj nuk besoj se ekipet që do të përgatiten për Evropë, përfshirë këtu edhe ekipin e femrave të Mitrovicës, do të kenë problem. Së bashku me kryetarin e FFK-së, Agim Ademi, kemi folur për këtë çështje dhe hasëm në një mirëkuptim të plotë prej të gjithëve. Ata e dinin shumë mirë rëndësinë e pjesëmarrjes në kupat evropiane”.

Në fakt, Drita të mërkurën ka nisur më përgatitjet për garat evropiane, derisa Gjilani e Prishtina do t’i fillojnë në ditët e para të javës së ardhshme. Drita, më 8 gusht, do të luajë në gjysmëfinale të turneut preliminar të Championsit kundër kampionit të Andorrës, Interit. Ky turne do të mbahet në Nyon të Zvicrës, kurse fituesi i tij do t’i vazhdojë garat në raundin e parë kualifikues të garës më prestigjioze të Evropës. Për Dritën, kjo është hera e dytë që luan në Champions. Para dy vjetësh, ekipi nga Gjilani e pati fituar turneun preliminar për t’u eliminuar në raundin e parë të kualifikimeve.