Si u delegua Mervan Bejtullahu në dy ndeshje vendimtare të fundjavës

Liria e Ulpiana kanë luajtur ndeshje vendimtare të shtunën. Në Klinë, Liria e Prizrenit fitoi 3:1 në ndeshjen e barazhit të Ligës së Parë. Tani Lirisë i duhet edhe një fitore për të kaluar në Superligë.

Ndeshje vendimtare të dielën luajtën Ferizaj dhe Dukagjini i Klinës. Ferizaj fitoi 2:1 në mënyrë shumë kundërthënëse dhe shmangu rënien nga Superliga. Do të luajë me Lirinë në ndeshjen e barazhit për vendin në Superligë.

Ndeshja e së shtunës në Klinë dhe e së dielës në Ferizaj kishin një të përbashkët, pos peshës së madhe – Mervan Bejtullahun. Arbitri Bejtullahu dhe ekipi i tij kanë drejtuar dy prej ndeshjeve më të rëndësishme të gjithë edicionit.

Nuk është praktikë që një arbitër të drejtojë dy ndeshje vendimtare brenda dy ditëve. Nuk është e ndaluar, por nuk ndodh shpesh, sidomos në vendet me futboll të zhvilluar. Në Kosovë megjithatë kjo ndodhi.

Bejtullahu ishte protagonist në ndeshjen e së dieles në Ferizaj. Për shkak të zhagitjeve të shumta, e vazhdoi ndeshjen për 17 minuta. Në minutat shtesë dha penallti për Ferizajn, që ishte shumë e dyshimtë. Në pikën e bardhë tregoi për lojë me dorë, por pas rishikimit të VAR-it ndryshoi vendimin. Dhe më pas, në minutën e 105-të, Ferizaj shënoi golin e fitores pasi portieri i Dukagjinit, Altik Muhaxhiri, në mënyrë të turpshme u kujdes që mos të goditej nga topi.

Në Federatën e Futbollit të Kosovës kanë arsyetuar vendimin për të deleguar Bejtullahun në dy ndeshjet me shumë rëndësi. Kryetari i Komisionit për delegimin e gjyqtarëve dhe kontrolluesve për Superligë dhe Ligën e Parë, Gani Havolli, ka theksuar se edhe më herët ka ndodhur që arbitrat të drejtojnë dy ndeshje të rëndësishme brenda dy ditëve.

Edhe Futboll 14 mar 2026 Ferizaj mposht Malishevën me gol të minutave shtesë

“Nuk është e ndaluar që një gjyqtar ta ndajë drejtësinë dy herë brenda dy ditëve. Ka ndodhur edhe me Genc Nuzën e po ashtu edhe Alban Shala ka qenë i angazhuar kështu. Zakonisht kështu veprojmë kur ka ndeshje të barazhit. Delegojmë gjyqtarë me stema të FIFA-s për shkak të ndjeshmërisë. Kjo ka qenë arsyeja pse e kemi deleguar Mervan Bejtullahun”, ka thënë Havolli për KOHËN.

Të dielën Ferizaj e Liria luajnë ndeshjen vendimtare për vendin në Superligë. Mbetet të shihet nëse Bejtullahut do t’i besohet edhe ai takim.