Real Madridi ka kaluar në finale të Kupës së Botës për klube pas triumfit të mërkurën në Rabat. Reali mposhti skuadrën Al Ahly të Egjiptit me rezultatin, 4:1. Madrilenët krijuan epërsi prej një goli në minutën e 42-të të ndeshjes nëpërmjet Vinicius Juniorit.
Një minutë pas pushimit, Federico Valverde realizoi tjetër gol për 2:0. 42-herë kampioni i elitës së futbollit të Egjiptit, Al Ahly, ngushtoi epërsinë në minutën e 65-të nëpërmjet Ali Maaloul që shënoi nga penalltia. Luka Modriq humbi mundësinë të shënonte nga penalltia në minutën e 87-të, por ishte Rodrygo ai i cili në minutën e dytë të shtesës, shënoi për 3:1. Rezultati final i ndeshjes 4:1, u vendos në minutën e tetë të kohës shtesë.
Shënues ishte sulmuesi 21-vjeçar, Sergio Arribas. Në finalen e së shtunës, madrilenët do të ballafaqohen me skuadrën e Arabisë Saudite, Al-Hilal. Al Ahly dhe Flamengo po të shtunën luajnë për vendin e tretë në Botërorin e klubeve.